Esapulo Liusoma Lia Pitila Kolofeka Vi Kasi Ocipãla

OLUPALE luo Chiva, lu sangiwa Kofeka yo Rusia ocipepi lo Siberia, kombuelo yo Mongolia. Omanu valua volupale luo Chiva, va sangiwa vovambo a kasi ocipãla okuti, ka ca lelukile oku va kundila esapulo Liusoma. Pole, otembo yimue, kua kala omanu va tundile kovambo amue oko Chiva, va endele kolupale luo Kyzyl oco va pindisiwe kosikola yimue. Manji umue o tukuiwa hati, Maria okuti, ukundi wotembo yosi kolupale luo Kyzyl, wa mola eci omanu vaco va pitila. Kuenje, wa limbuka okuti, wa kuata epuluvi lioku va kundila olondaka viwa.

Manji Maria wa lombolola ulandu a pita lawo poku popia hati: “Kosikola ndi longisa, kua kala omanu vamue va tambula epindiso lia lombolola eci catiamẽla kuholua, kuenda oku sipa eliamba. Kua kala eci ci soka 50 komanu va tunda kovambo o Chiva. Pokati komanu vaco pa kala alongisi, olonoño, vakuacisoko coku teyuila omãla, kuenda omanu vakuavo.” Ohongele yaco, ya eca ku manji Maria epuluvi lioku eca uvangi komanu, ndaño ka ca lelukile oku ci linga. Eye wa popia hati: “Omo okuti ndi kuete osõi, ka ca lelukile oku kundila omanu vaco. Pole, nda likutilila ku Yehova oco ndi kuate utõi woku yula usumba okuti, ndi va kundila.” Anga hẽ, wa kuata onima yiwa?

Manji Maria wamisako loku popia hati: “Nda sanga o Despertai! muli ocipama ci lombolola ocitangi comanu va kuete usumba lovina vimue. ‘Omo okuti, onoño yimue ya lekisa onjongole yoku tanga ocipama caco,’ nda nena o revista yaco kosikola. Eteke liaco, umue pokati kalongisi wa kala kepindiso liaco, weya voseketa yange, kuenje ndo wĩha o revista yikuavo. Ulongisi waco, wa tava oku yi tambula. Kuenje, wa popia hati, o kuetevo usumba lovina vimue. Eteke likuavo, ndo nenela elivulu losapi hati, Os Jovens Perguntam​—⁠Respostas Práticas, Volume 1. Eye wa tavavo oku tambula elivulu liaco. Onjongole yaye ya ndi vetiya oku sima okuti, alongisi vakuavo vaka yongolavo oku tambula elivulu liaco. Omo liaco, nda nena kosikola okasia yeyuka alivulu Os Jovens Perguntam, kuenda alivulu akuavo.” Ka papitile otembo yalua kuenje alivulu aco osi nda va eca kokuavo. Manji Maria wa lombolola ulandu a pita lawo hati: “Akamba vulongisi wa tambuile elivulu Os Jovens Perguntam, veya voseketa yange kuenje va ndi pulisa hati: ‘Pi va kasi oku eca alivulu?’” Voseketa yange omo nda kala oku eca alivulu aco!

Epindiso va kala oku tambula, lia malusuiwa Casapalo. Omo okuti eteke liaco manji Maria ka longisile olondonge kosikola, wa kapa alivulu kolomesa voseketa yaye. Kilu liomesa yimue, wa kapako opapelo lolondaka hati: “Alongisi wa Soliwi! Citava okuti, omunu lomunu upa alivulu, kuenje akuavo o pondola oku a eca ku vana va yongola oku a tanga. Alivulu ava, vaka ku kuatisi kupange wene, kuenda vaka pamisa epata liene.” Nye ceyililako? Eye wamisako hati: “Noke eci nda iñila voseketa yange, nda limbuka okuti, alongisi vambata alivulu osi. Noke nda kapa kolomesa alivulu akuavo kuenda olorevista.” Eci epindiso liaco lia malusuiwa, manji Maria wa eca eci ci soka 380 kolorevista, 173 kalivulu, kuenda 34 kolombrochura. Vana veyile kepindiso liaco eci va tiukila kovambo avo kuenda kovopange avo, vambata alivulu. Omo liaco, manji Maria wa popia hati: “Nda sanjuka calua omo okuti, esapulo liusoma lia pitila kovambo osi atiamẽla kolupale luo Chiva!”​—⁠Uku. 11:⁠6.

[Omapa kemẽla 32]

(Tava omapa yaco vorevista)

RUSIA

OFEKA YO CHIVA