Ndomo o Pandikisa Eci Ohueli Yove yi ku Lueyela

MARGARITA lulume waye Raúl, va vumbila kumosi Yehova vokuenda kualima alua kupange wakundi votembo yosi.a Pole, noke yoku cita omõlavo uveli, oco Raúl a fetika oku tinduka ku Yehova. Kuenje, Raúl wa li imba vukahonga yu wa tundisiwa vekongelo Liakristão. Margarita wa popia hati: “Eci Raúl a tundisiwa vekongelo, ca kala ndu okuti omuenyo wange upuamo. Utima wange wa teka teka, kuenda sia kũlĩhile eci ndi linga.”

Eci Jane a kuela, noke lioloneke vimue, ulume waye wo lueyela kuenda wa linga ovina vialua vio sumuisa. Eye wa fetikavo oku u tipula. Jane wa popia hati: “Eci a mbeta onjanja yatete, nda komoha, nda kutisua osõi, kuenda sia kũlĩhile onjila ndi kuama. Puãi eye wa minga ongecelo, ndomo a ci lingaile olonjanja viosi. Omo Ndukristão, nda kũlĩha okuti nda kuatele ocikele coku u tetela loku ivalako. Nda simile okuti ka ca sungulukile oku sapuilako omanu ocitangi cetu, ndaño muẽle kakulu vekongelo. Ocitangi caco ca amamako vokuenda kuanyamo alua. Votembo yaco, nda kala oku sima eci nda sukilile oku linga oco ndi soliwe lulume wange. Eci a ndi siapo lomõletu, nda simile okuti nda lueya, momo nda sukilile oku linga ocina cikuavo oco olohuela vietu ka vi ka tepiwe.”

Ndeci ca pita la Margarita kuenda Jane, pamue ove o kasivo oku liyaka lesumuo, lekambo liolombongo, loku hongua kespiritu omo ulume wove wa ku lueyela. Pamue ove wulume, wa sumua omo ukãi wove wa ku lueyela. Ocili okuti, tu kasi ‘kotembo yohali’ ndomo ca lekisiwa Vembimbiliya. Ovitumasuku vi lekisa okuti, “koloneke via sulako,” elitokeko vepata li setekiwa, kuenda omanu ka va kuetele ocikembe vakuavo. Vamue va likala oku kolela Suku ndaño va limolẽhisa nda vakuekolelo. (2 Tim. 3:​1-5) Akristão vocili va liyakavo lovitangi viaco. Oco hẽ, nye ci ku kuatisa oku pandikisa nda ohueli yove ya ku lueyela?

Litenda Ove Muẽle Ndomo Yehova a ku Tenda

Kefetikilo, ca tĩla oku tava okuti omunu o sole calua oku lueyela, ale o ku sumuisa. Pamue o livetela evelo omo lielinga lĩvi liohueli yove.

Ivaluka okuti, ndaño Yesu wa lipua, omunu umue eye a solele haeye a kolelele, wo lueyelavo. Osimbu Yesu ka nõlele 12 kovapostolo vaye, wa likutilila kuenda wa sokolola calua. Vosi yavo va kala afendeli va Yehova va koleliwa. Eli olio esunga lieci Yesu a sumuilile eci Yuda a “linga omakuli.” (Luka 6:​12-​16) Haimo lumue, Yehova ka tendele okuti Yesu wa kuata ongole omo liekandu lia Yuda.

Ocili okuti, ka kuli ohueli ya lipua. Vosi vakuakulueya. Umue ukualosamo, wa soneha hati: “A Yehova, nda ove o patekela olongole, helie o talama, a Yehova?” (Osa. 130:⁠3) Kuenje, ciwa okuti olohueli vi setukula Yehova, poku litetela olongole viavo.​—⁠1 Pet. 4:⁠8.

Pole, ivaluka okuti “omunu omunu o lilombolola ku Suku.” (Va Rom. 14:​12) Nda umue pokati kolohueli o kuete ocituwa coku tipula ale oku tonda ukuavo, omunu waco eye o ka lilombolola ku Yehova. Yehova o nyale ungangala lupopi ka wa sungulukile, momo ka kuli esunga lalimue lioku tata lãvi ohueli yove okuti ku lekisa ocisola kokuaye ndaño esumbilo. (Osa. 11:5; Va Efe. 5:33; Va Kol. 3:​6-8) Omo liaco, nda Ukristão olonjanja viosi o tata lãvi ohueli yaye kuenda ka likekembela, o sesemẽla oku tundisiwa vekongelo. (Va Gal. 5:​19-21; 2 Yoa. 9, 10) Ohueli yi kasi oku tatiwa lãvi ka yi sukila oku livetela evelo omo lioku sapuilako akulu vekongelo elinga lĩvi liohueli yaye. Ocili okuti, Yehova o kuetele ocikembe omanu va tatiwa lãvi.

Eci ohueli yi linga ukahokolo, ka yi lueyela lika ohueli yaye, puãi yi lueyelavo Yehova. (Mat. 19:​4-9; Va Hev. 13:⁠4) Nda ohueli va lueyela yi likolisilako oku kuama olonumbi Viembimbiliya, ka yi sukila oku livetela evelo omo liekandu liulume, ale liukãi waye.

Ivaluka okuti Yehova wa kũlĩha evalo o yevite. Eye wa litenda eye muẽle ndulume wofeka yo Isareli, kuenda Vondaka yaye mu sangiwa ovolandu alua a lekisa ndomo eye a liyeva eci ofeka ya linga ukahonga konepa yespiritu. (Isa. 54:​5, 6; Yer. 3:​1, 6-​10) Kolela okuti nda ohueli yove ya ku lueyela, Yehova o lete asuẽlela ove. (Mal. 2:​13, 14) Eye wa kũlĩha okuti ove o sukila elembeleko kuenda oku pamisiwa.

Ndomo Yehova a Eca Elembeleko

Ekuatiso li eciwa lekongelo Liakristão oyo onjila yatete Yehova a eca layo elembeleko. Jane wa tambula elembeleko liaco. Eye wa popia hati: “Eci ukulu ukuakunyula akongelo vimbo eya konjo yange nda sumuile cocili. Eye wa kũlĩhile okuti nda nyumalele calua omo lioku linyala lulume wange. Kuenje, wa mbetiya oku sokolola ocisimĩlo ci sangiwa kelivulu 1 Va Korindo 7:15. Ocinimbu caco kumue lolondaka a popia, via ndembeleka cimue haivio via nyiha ombembua yutima.”b

Margarita, una tua tukula ale, wa limbukavo okuti Yehova eca ekuatiso lekongelo Liakristão. Margarita wa popia hati: “Eci nda limbuka okuti ulume wange ka kasi oku likekembela, nda ilukila vimbo likuavo lomãla vange. Eci nda pitila vimbo liaco, nda sanda onjo yimue yoku fetela. Veteke lia kuamamo, lesumuo lialua, nda kala oku sondolola olonjeke viange kuenje nda yeva oku totuiwa kuepito. Nda sima okuti ukãi o lisungue letu eye wa kala oku totola epito. Puãi, manji ukãi wa longisa ina yange Embimbiliya haeye wa kuatisa epata liange oku lilongisa ocili, eye wa kala puvelo. Eye ka lavokaile oku ndi mola momo weyilile oku longisa Embimbiliya kukãi o lisungue lame. Hesanjukuolio nda yeva! Ndo lomboluila ocitangi cange, kuenje kavali ketu, tua lolula asuẽlela. Keteke liaco eye wa tu kuatisa oku enda kohongele. Vamanji vosi vekongelo va tu yolela, kuenda akulu va linga esokiyo lioku kuatisa epata liange konepa yespiritu.”

Ndomo Vakuavo va Pondola Oku Kuatisa

Omanu vosi vekongelo citava okuti va eca ekuatiso liavo volonepa viñi viñi. Omo Margarita wa sukilile oku sanda upange, epata limue vekongelo lia likuminya oku u tatelako omãla vaye eci va tunda kosikola.

Margarita wa lombolola hati: “Ci ndi sanjuisa calua oku tala ndomo vamanji va lieca olumue poku tunda lame kuenda omãla vange kupange woku kunda.” Poku ci linga, vamanji vekongelo va ‘ambatisako vakuavo ovilemo viavo’ kuenje va kapako “ocihandeleko ca Kristu.”​—⁠Va Gal. 6:⁠2.

Vosi va kasi oku tala ohali omo liakandu a vakuavo va sanjukila ekuatiso liaco. Monique, una okuti ulume waye wo usiapo lomãla vavali lofuka yeci ci soka 15.000 kolondolare, wa popia hati: “Vamanji vekongelo va nata locisola calua. Nda ka va ñuatisile, si ci eci nda ca pita lame. Ngeca olopandu ku Yehova wa nyiha vamanji vakuacisola, vana va ñuatisa ame kumue lomãla vange. Nda sanjuka calua poku tala ndomo ekuatiso liaco lia vetiya omãla vange oku kula kespiritu. Eci ndi sukila elungulo, akulu vekongelo va ñuatisa. Eci ndi yongola oku sapela lomunu umue, ovo va njevelela.”​—⁠Mar. 10:​29, 30.

Ocili okuti, akamba vakuacisola va tẽla oku limbuka nda vepuluvi limue citava oku tukula ovolandu a sumuisa ale sio. (Uku. 3:⁠7) Margarita wamisako hati, “Olonjanja viosi eci ndi sapela la vamanji vekongelo, tu vangula ovina vialua ndeci, upange woku kunda, alilongiso Embimbiliya, ovina via tiamẽla komãla vetu, okuti, ovitangi viange havioko. Ndi sole calua vamanji vaco omo va ñuatisa oku ivalako ovitangi viange loku fetika omuenyo wokaliye.”

Yuvula Oku Fetuluinya

Ove pamue o sima okuti o kuete eko liekandu liohueli yove, pole evalo liaco liyilila koku lueya kuohueli yove. Nda wa ecelela okuti ocisimĩlo caco ci amamako, eci ci ka ku tateka oku vumba Yehova lekolelo. Kuenje eci ci ka ku vetiya oku sandiliya onjila yoku fetuluinya ohueli yove.

Nda wa limbuka okuti o kuete onjongole yoku fetuluinya, sokolola kulandu wa Yehosua la Kalembe. Alume ava vavali va kapele omuenyo wavo kohele oco va kũlĩhise Ofeka Yohuminyo. Pole, olondavululi vikuavo omo liekambo liekolelo, va vetiya omanu oku sinila Yehova. Vamue pokati ka va Isareli va yonguile oku sosola lovawe Yehosua la Kalembe, omo lioku vetiya omanu oku amameko oku kolela Yehova. (Ate. 13:25–14:​10) Omo lielinga lia va Isareli, Yehosua la Kalembe va kisikiwa oku ñuala ñuala vekalasoko 40 kanyamo omo liekandu lia vakuavo, okuti liavo halioko.

Ndaño Yehosua la Kalembe va sumuile, ka va ecelele okuti ekandu lia vamanjavo li va vetiya oku fetuluinya. Ovo va tiamisilile utima wavo koku linga upange wa Yehova. Noke lioku pita 40 kanyamo vekalasoko, Yehosua la Kalembe kumue la va Lewi, va kala pokati komanu va puluka, kuenje va iñila Vofeka Yohuminyo.​—⁠Ate. 14:​28-30; Yeh. 14:​6-12.

Elinga lĩvi liohueli yove, citava okuti li ku kokela ohali vokatembo kamue. Oku linyala ku ku nenela esumuo lekambo liolombongo vokuenda kuotembo. Ku ka ecelele oku yuliwa lovisimĩlo vĩvi, pole ivaluka okuti Yehova wa kũlĩha eci a ka linga la vana ka va pokola kolonumbi viaye, ndeci ca pita la va Isareli va kala vekalasoko.​—⁠Va Hev. 10:​30, 31; 13:⁠4.

O Pondola Oku Yula Ocitangi Caco!

Yuvula ovisimĩlo vĩvi haivio vi ku sumuisa, kuenje yukisa utima wove lovisimĩlo via Yehova. Jane wa popia hati: “Nda limbuka okuti oku yevelela ovipama Viutala Wondavululi lo Despertai! volokasete, via ndi kuatisa oku yula ovitangi. Olohongele viekongelo via ndi pamisa calua. Oku kuata onepa kolohongele viaco, kuenda upange woku kunda via ndi vetiya oku yuvula oku sokolola ovitangi viange. Oku kuatisa vakuetu oku kolela Yehova, ca pamisavo ekolelo liange. Oku songola alilongiso Embimbiliya ca ndi kuatisa oku tiamisila utima kovina via velapo.”

Monique wa tukuiwa ale, wamisako hati: “Oku likolisilako oku endaenda kolohongele viekongelo kuenda kupange woku kunda, ca ñuatisa oku pandikisa lovitangi viange. Epata liange li kuete ukamba uwa la vamanji vekongelo. Ocitangi cange ca ndi kuatisa oku limbuka oku hongua kuange. Ndaño loloseteko vialua, Yehova wa siata oku ndi kuatisa oku vi yula.”

Ove o pondola oku yula ovitangi ndevi tua konomuisa ndeti. Ndaño okuti wa sumua omo ohueli yove ya ku lueyela, likolisilako oku kuama elungulo lia Paulu wa popia hati: “Ka tu ka kavi oku linga eci ciwa, momo kotembo yaco tu lombola nda ka tua leñelele.”​—⁠Va Gal. 6:⁠9.

[Atosi pombuelo yamẽla]

[Elitalatu kemẽla 31]

Olohueli vi kasi lika liavo vi sanjuka calua eci vamanji va talavaya lavo kupange woku kunda