-
Ku Ka Ecelele Okuti Cimue Ci Tepa Ukamba Wove La YehovaUtala Wondavululi—2013 | Susu 15
-
-
Ku Ka Ecelele Okuti Cimue Ci Tepa Ukamba Wove La Yehova
“Nõli etaili u vu yongola oku vumba.”—YEH. 24:15.
1-3. (a) Ongangu yipi yiwa Yehosua a sila vana va yongola oku nõla onjila ya sunguluka komuenyo wavo? (b) Nye tu sukila oku ivaluka poku ñola onjila tu yongola oku kuama?
ONDAKA “oku nõla,” yi kuete unene walua. Osimbu omunu ka nõlele onjila a yongola oku kuama, o kũlĩhĩsa lutate ndomo a pondola oku yi kuama komuenyo waye. Kũlĩhĩsa ocindekaise eci: Sokolola ndeci okuti ulume umue o kasi oku linga ungende, kuenje o pitĩla panyaha. Onjila yipi a sukila oku kuama? Nda wa ivaluka oku a yongola oku enda, yimue pokati kolonjila viaco, yu kuatisa oku pitĩla kocitumãlo a loña, osimbu okuti nda wa kuama onjila yikuavo o nyelẽla.
2 Vembimbiliya mu sangiwa ovolandu omanu va pita locitangi ndeci ca tukuiwa ndeti. Kaini wa sukilile oku nõla nda o likandangiya konyeño, ale sio. (Efet. 4:6, 7) Yehosua, wa sukililevo oku nõla nda o fendela Suku yocili, ale olosuku viesanda. (Yeh. 24:15) Omo okuti Yehosua wa kuata ocimaho coku pamisa ukamba waye la Yehova, wa nõla onjila yo kuatisa oku ci linga. Pole, Kaini ka kuatele ocimãho caco, kuenje, wa nõla onjila yimue ya tepa ukamba waye la Yehova.
3 Citava okuti tu liyaka locitangi coku nõla onjila tu yongola oku kuama. Nda tu kuete ocitangi caco, tu sukila oku ivaluka okuti, ocimaho cetu oku linga ovina vi eca esivayo ku Yehova, kuenda oku yuvula ovina vi pondola oku tepa ukamba wetu laye. (Tanga Va Heveru 3:12.) Vocipama cilo, leci ci kuãimo, tu konomuisa olonepa epanduvali vi tu kuatisa oku endela vonjila ya sunguluka, kuenda oku kũlĩhĩsa okuti, ovina viosi tu linga, ka vi tepa ukamba wetu la Yehova.
UPANGE WOKU SANDA ETEKU KUENDA OVIMAHO VIKUAVO
4. Momo lie upange woku sanda eteku u kuetele esilivilo?
4 Akristão vocili, va kuete ocikele coku talavaya oco va tekule epata liavo. Embimbiliya li lekisa okuti, nda umue ka yongola oku tata ciwa vakuanjo yaye, una ka fendela Yehova wo velapo. (2 Va Tes. 3:10; 1 Tim. 5:8) Ndaño okuti upange woku sanda eteku u kuete esilivilo komuenyo, pole, nda ka tua lavuluile, tu tepa ukamba wetu la Yehova. Ovina viaco vi pita ndati?
5. Ovina vipi tu sukila oku kũlĩhĩsa osimbu ka tua tavele upange umue?
5 Sokolola ndeci okuti o kasi oku sanda upange umue. Nda o kasi vofeka yina okuti ka ca lelukile oku sanga upange, citava okuti o tava upange wosi wa sanga. Nye o sukila oku linga nda upange wa sanga ka u li kuata lolonumbi Viembimbiliya? Anga hẽ esokiyo liupange wove ale ungende o linga u ku tateka oku tẽlisa ovikele viove vekongelo, kuenda oku kala ocipãla lepata liove? Ove hẽ o tava oku linga upange waco ale o nõlapo oku u yuvula? Ivaluka okuti, nda kua nõlele onjila ya sunguluka, o tepa ukamba wove la Yehova. (Va Hev. 2:1) Nda o kasi oku sandiliya upange umue, ale o yongola oku siapo upange wove wosimbu, o nõla ndati onjila ya sunguluka?
6, 7. (a) Ovina vipi omunu o sandiliya upange woku sanda eteku a sukila oku sokolola lutate? (b) Ovimaho vipi vi pamisa ukamba wove la Yehova, kuenda momo lie?
6 Ndomo ca lomboluiwa kefetikilo liocipama cilo, tu sukila oku sokolola ovina tu yongola oku linga. Li pula ndoco: ‘Ndecelela hẽ oku yapuisiwa lupange ale ovimaho vikuavo? Nda wa siapo upange waco okuti o kuama onjila yikuavo yoku tekula epata liove,—oco o linge upange wa—Yehova, eye o ka sumũlũisa alikolisilo ove. (Mat. 6:33) Yehova wa kũlĩha ndomo a pondola oku ku kuatisa, nda wa siapo upange umue, ale vofeka o kasi muli ekambo liolombongo. (Isa. 59:1) Eye ‘wa kũlĩha ndomo a pondola oku popela kovitangi omanu vana vo sumbila.’—2 Pet. 2:9.
7 Nye o sukila oku linga nda o kuete lika ocimaho coku sandiliya upange oco o linge ohuasi? Citava okuti o pondola oku kala ohuasi. Pole, ivaluka okuti, oku tiamisila utima ‘kovokuasi,’ ci kapa ekalo liove kohele. (Tanga 1 Timoteo 6:9, 10.) Ivaluka okuti, oku tiamisila utima kovokuasi kuenda kovimaho vikuavo, ci tepa ukamba wove la Yehova.
8, 9. Apulilo api olonjali vi sukila oku kũlĩhĩsa atiamẽla kupange woku sanda eteku? Lombolola ulandu waco.
8 Nda ove unjali ivaluka okuti ovina o linga, vi pondola oku kuatisa omãla vove, ale vi va yapuisa. Omãla vove va siata hẽ oku limbuka okuti, wa velisapo upange woku sanda eteku, ale ukamba wove la Yehova? Nda va limbuka okuti wa velisapo ekemãlo, kuenda ovokuasi, eci va kula, va kuama hẽ onjila yĩvi wa nõlapo? Anga hẽ, esumbilo va ku kuetele li pondola oku tepuluka? Umalẽhe umue Ukristão wa popia hati: “Ndi ivaluka okuti kosimbu, isia yange wa enda oku sakalala calua lupange waye. Kefetikilo, wa kala ndu okuti o talavaya calua oco a lande ovina via velapo tu sukila. Momo wa yonguile okuti, tu kuata ekalo liwa. Pole, vokuenda kuotembo tua limbuka okuti, ovina via pongoloka. Eye, wa fetika oku talavaya calua, loku landa ovina via tĩla okuti ka tu vi sukila. Noke, omanu va limbuka okuti, tu kuete olombongo vialua, pole, tua liwekapo oku vetiya vamanji oku pamisa ukamba wavo la Yehova. Omo liaco, ndi yongola okuti, isia yange o tu kuatisa oku pamisa ukamba wetu la Yehova okuti, oku kuata olombongo ci sule.”
9 Ene alonjali, yuvuli oku tepa ukamba wene la Yehova, omo lioku salakala calua lovopange ene. Lekisi komãla vene okuti, oku pamisa ukamba la Yehova, owo ukuasi wa velapo okuti olombongo vi sule.—Mat. 5:3.
10. Nye amalẽhe va sukila oku kũlihĩsa catiamẽla koku nõla ovimaho viavo?
10 Nda ove umalẽhe okuti kovaso yoloneke o yongola oku kuata upange, o pondola ndati oku nõla onjila ya sunguluka? Ndomo ca lomboluiwa vocipama cilo, o sukila oku sokolola lutate ovina o yongola oku linga komuenyo wove. O kasi hẽ, oku lilongisa uloño umue oco u ku kuatise oku sanga upange wecelela oku tẽlisa ovikele viove vekongelo, ale upange waco u pondola oku tepa ukamba wove la Yehova? (2 Tim. 4:10) Ove hẽ o yongola oku kuama ekalo liomanu voluali okuti, va sanjuka lika nda va kuete olombongo vialua? Ale o nõlapo oku sokolola olondaka Daviti a popia hati, ‘nda kala umalẽhe, cilo nda kuka, pole, sia la mola ondingesunga ya yandulukiwa, pamue ombuto yaye yi pinga okulia’? (Osa. 37:25) Ivaluka okuti, nda wa nõla onjila ka ya sungulukile, o tepa ukamba wove la Yehova, pole, nda wa nõla onjila ya sunguluka, o ka kuata omuenyo ko pui. (Tanga Olosapo 10:22; Malakiya 3:10.) Onjila yipi o yongola oku nõla?a
OLOMAPALO KUENDA OVITALUKILO
11. Nye Embimbiliya li popia catiamẽla kovitalukilo kuenda kolomapalo? Pole, nye tu sukila oku ivaluka?
11 Embimbiliya ka li pisa olomapalo lovitalukilo, kuenda ka li lekisia okuti, oku linga ovina viaco ci lomboloka oku pesela otembo olivovo. Paulu wa sonehela Timoteo hati ,‘oku pindisa etimba, ku kuete esilivilo’ lia velapo. (1 Tim. 4:8) Embimbiliya li popiavo hati, kuli otembo ‘yoku yola, lotembo yoku piluka,’ kuenda li tu vetiya oku sokiya otembo yoku puyuka. (Uku. 3:4; 4:6) Pole, nda ka tua lavuluile, olomapalo lovitalukilo, vi pondola oku tepa ukamba wetu la Yehova. Ci pita ndati? Poku nõla olomapalo tu yongola oku linga, kuenda otembo tu pesila kovina viaco.
Olomapalo via sunguluka, vi nena esanju
12. Apulilo api o sukila oku kũlĩhisa lutate osimbu kua nõlele ovitalukilo lolomapalo oyongola oku linga?
12 Catete, sokolola olopamalo o yongola oku linga. Noke, kũlĩhĩsa nda olomapalo kuenda ovitalukilo viaco via sunguluka ale sio. Koloneke vilo, kuli olomapalo vialua vi vetiya oku linga ovina Suku a nyãle, oku kongelamo ungangala, umbanda, kuenda ukahonga. Omo liaco, o sukila oku nõla lutate olomapalo kuenda ovitalukilo o yongola oku linga. Anga hẽ ovitalukilo wa nõla vi pondola oku ku kuatisa? Vi vetiya hẽ ungangala, oku livelisapo, ale olonepele viakova? (Olosap. 3:31) Vi pesela hẽ olombongo vialua? Vi kokela hẽ ocilondokua vakuene? (Va Rom. 14:21) Akamba vapi o nõla oco u lingile kumosi olomapalo kuenda ovitalukilo viaco? (Olosap. 13:20) Ovitalukilo viaco vi ku vetiya hẽ oku linga ovina ka via sungulukile?—Tia. 1:14, 15.
13, 14. Nye o sukila oku kũlĩhĩsa catiamẽla kotembo o pesila kolomapalo?
13 Konomuisa otembo o pesila kovitalukilo lo kolomapalo. Noke lipula ndoco: ‘Nda siata hẽ oku pesila otembo yalua kovitalukilo okuti ndi kuata otembo yitito yoku tẽlisa ovikele viekongelo?’ Nda wa nõlapo oku pesila otembo yalua kolomapalo lo kovitalukilo, ku kuata otembo yepuyuko. Omo liaco, vana va yuvula oku pesila otembo yalua kolomapalo lo kovitalukilo, va kuete esanju lialua. Momo lie? Momo va kũlĩha okuti, va tẽlisa ‘ovina vi kuete esilivilo,’ kuenda, ka va livetela evelo omo lioku sokiya otembo yoku puyuka.—Tanga Va Filipoi 1:10, 11.
14 Ndaño okuti ca sunguluka oku pesila otembo yalua kovitalukilo, pole, vi pondola oku tepa ukamba wetu la Yehova. Manji umue ufeko o kuete 20 kanyamo o tukuiwa hati Kim, wa pita locitangi caco. Eye wa popia hati: “Nda enda oku pesila otembo yalua kovitalukilo oku upisa Votãlo, toke Calumingu. Noke nda limbuka okuti, kuli ovina vialua vi kuete esilivilo ndi sukila oku linga. Omo okuti cilo nda litumbika kupange wakundi votembo yosi, nda siata oku pasuka kowola yepandu komẽle, oco ngende kupange woku kunda. Nda liwekapo oku kala kovitalukilo toke kowola yatete ale yavali komẽle. Kuenje, nda limbuka okuti, ndaño ca sunguluka oku kala kolomapalo, pole, vi pondola oku tu yapuisa. Omo liaco, tu sukila oku lavulula otembo tu pesila kolomapalo.”
15. Olonjali vi pondola ndati oku kuatisa omãla vavo oku linga ovitalukilo vi nena esanju?
15 Olonjali vi kuete ocikele coku sokiya ovina viosi vi sukiliwa, loku kuatisa omãla vavo oco va kuate ukamba la Yehova. Vovina viaco mua kongela olomapalo vi nena esanju. Nda unjali, o sukila oku yuvula oku sima okuti, olomapalo viosi ka via sungulukile. Pole, o kuete ocikele coku lavulula oco o yuvule olomapalo vina ka via sungulukile. (1 Va Kor. 5:6) Nda wa sokolola lutate, o pondola oku linga olomapalo kuenda ovitalukilo vi nena esanju liocili kepata liove.b Nda wa ci linga, ove kumue lomãla vove u pondola oku nõla onjila yi pamisa ukamba wene la Yehova.
UKAMBA VEPATA
16, 17. Ovitangi vipi olonjali vialua via siata oku liyaka lavio? Tu limbuka ndati okuti Yehova wa kũlĩha esumuo liaco?
16 Ocili okuti, pokati konjali lomõla pali ocisola ca pama. Momo Yehova wa siata oku lekisa ocisola komanu vosi, ndeci onjali yi lekisa ocisola komõla waye. (Isa. 49:15) Nda umue ukuepata wa tepa ukamba waye la Yehova, tu sumua. Manji umue ukãi okuti omõla waye ufeko wa tundisiwile vekongelo wa popia hati: “Esumuo nda kuata, lia ndi vetiya oku li pula ndoco: ‘Momo lie a tundila vocisoko ca Yehova?’ Noke, nda fetika oku livetela evelo.”
17 Nda o kasi locitangi caco, ivaluka okuti, Yehova wa kũlĩha esumuo liove. Kosimbu, Yehova wa kuata ‘esumuo lialua vutima,’ eci Adama la Heva va tomba ocihandeleko caye. Noke, weya oku kuatavo esumuo eci omanu va kala kulo kilu lieve va lekisa esino osimbu Etande ka lieyile handi. (Efet. 6:5, 6) Omanu vana okuti lomue vepata liavo wa tundisiwa vekongelo, pamue ka va kuata elomboloko liesumuo liaco. Omo liaco, ka ca sungulukile oku tepa ukamba wove la Yehova omo okuti umue vepata wa tundisiwa vekongelo. O pondola ndati oku amamako lesanju liove ndaño umue vepata wa tundisiwa vekongelo?
18. Momo lie olonjali vi yuvuila oku livetela evelo nda omõla umue wa tundisiwa vekongelo?
18 Yuvula oku livetela evelo omo liocitangi cimue. Omunu wosi vepata okuti wa litumbika ku Yehova kuenda wapapatisiwa, o kuete ocikele coku ‘ambata ocitele caye,’ kuenda o kuete elianjo lioku nõla nda o vumba Yehova ale sio. (Va Gal. 6:5) Kovaso a Yehova, omunu wosi wa lueya, ekandu liaco liu wila eye muẽle. (Esek. 18:20) Omunu waco, o sukila oku yuvula oku vetela evelo vakuavo, pole, a lekise esumbilo keliangiliyo lia Yehova lioku pindisa vana va lueya. Omo liaco, Yuvula eyonjo Lieliapu lioku pisa vamanji va kuete ocikele coku teyuila ekongelo.—1 Pet. 5:8, 9.
Ca sunguluka oku kuata elavoko liokuti, eteke limue ukuepata lietu wa tundisiwa vekongelo o tiuka
19, 20. (a) Olonjali vina vi kuete omãla va tundisiwa vekongelo nye vi sukila oku linga oco vi yuvule esumuo? (b) Elavoko lipi olonjali vi kuete?
19 O sukila hẽ oku kuatela Yehova ocikumbiti omo liomõla wove wa tundisiwa vekongelo? Nda wa ci linga, o tepa ukamba wove la Yehova. Epata liove li sukila oku limbuka okuti, wa velisapo ocisola o kuetele Yehova, kuenda ukamba o lekisa kokuavo. Oco o yuvule esumuo liaco, o sukila oku linga ovina vi pamisa ekolelo liove. Omo liaco, yuvula oku kala ocipãla la vamanji. (Olosap. 18:1) Sapuila Yehova ovitangi viove poku likutilila. (Osa. 62:7, 8) Tu yuvuli oku kuata ukamba la umue ukuepata lietu wa tundisiwa vekongelo, ale oku u tumisa ovikanda. (1 Va Kor. 5:11) Amamako oku linga upange wa Yehova. (1 Va Kor. 15:58) Manji wa tukuiwa ndeti vocipama cilo wa popia hati: “Nda kũlĩha okuti, ndi sukila oku amamako lupange wa Yehova, kuenda oku pamisa ekolelo liange okuti, eci omõla wange a tiuka vekongelo, ndi pondola oku u kuatisa.”
20 Embimbiliya li popia hati, ocisola ‘ci lavoka ovina viosi.’ (1 Va Kor. 13:4, 7) Ca sunguluka oku kuata elavoko liokuti, eteke limue ukuepata lietu wa tundisiwa vekongelo o tiuka. Unyamo lunyamo, omanu valua va siata oku likekembela loku tiuka vocisoko ca Yehova. Eye, ka kuetele ocikumbiti omanu vana va likekembela. Pole, wa siata ‘oku ecela’ akandu avo.—Osa. 86:5.
NÕLA LOLONDUNGE ONJILA O KUAMA
21, 22. Onjila yipi wa nõlapo, ndaño o kuete elianjo lioku ci linga?
21 Yehova wa eca komanu elianjo lioku nõla ovina va yongola oku linga. (Tanga Esinumuĩlo 30:19, 20.) Pole, elianjo liaco li lomboloka okuti, tu sukila oku nõla lutate ovina tu yongola oku linga. Vosi yetu tu sukila oku lipula ndoco: ‘Onjila yipi nda nõla? Ndecelela hẽ okuti upange woku sanda eteku, ovimaho vikuavo, olomapalo, kuenda ovitalukilo, ale ukamba vepata, vi tepa ukamba wange la Yehova?’
22 Yehova lalimue eteke a liwekapo oku lekisa ocisola kafendeli vaye. Pole, nda tua nõla onjila yimue ka ya sungulukile, tu tepa ukamba wetu la Yehova. (Va Rom. 8:38, 39) Tu yuvuli oku ci linga! Omo liaco, ku ka ecelele oku tepa ukamba wove la Yehova. Vocipama ci kuãimo, tu ka konomuisa ovina vikuãla vi pondola oku tu kuatisa oku nõla onjila tu yongola oku kuama.
-
-
Amamako Lukamba Wove La YehovaUtala Wondavululi—2013 | Susu 15
-
-
Amamako Lukamba Wove La Yehova
“Ameli ku Suku kuenje eye amela kokuene.”—TIA. 4:8.
1, 2. (a) ‘Olonjila’ vipi Satana a siata oku kuama oco a yapuise omanu? (b) Nye ci tu kuatisa oku kuata ukamba la Yehova?
YEHOVA SUKU wa lulika omanu lonjongole yoku kuata ukamba laye. Pole, Satana o tu vetiya oku sima okuti ka tu sukila ekuatiso lia Yehova. Eci oco ocisimĩlo Satana a vetiya laco Heva poku u kemba eci a kala vocumbo ce Endene. (Efet. 3:4-6) Tunde kosimbu omanu valua va siatavo oku kuata ocisimĩlo caco.
2 Etu ka tu sukila oku yapuisiwa latutu a Satana. Momo ‘tua kũlĩha atutu aye.’ (2 Va Kor. 2:11) Satana wa siata oku seteka oku tepa ukamba wetu la Yehova, poku tu vetiya oco tu nõle onjila ka ya sungulukile. Pole, ndomo tua ci konomuisa vocipama capita, tu pondola oku nõla ovina via sunguluka ndeci upange, ovitalukilo kuenda ovina viatiamẽla kepata. Ocipama cilo, ci lekisa okuti, nda tua yuvula oku pitisa kovaso ovoloño, uhayele, olombongo kuenda ocipululu, ci tu kuatisa oku ‘amamako lukamba wetu la Yehova.’—Tia. 4:8.
OVOLOÑO
3. Lombolola ndomo omunu a pondola oku lavulula poku talavaya lokombutador.
3 Omanu valua voluali va siata oku talavaya lokombutador kuenda ovikuata vikuavo. Nda tu talavaya ciwa lovina viaco, ci pondola oku tu kuatisa. Pole, nda tu talavaya lonjila yimue ka ya sungulukile lovina viaco, tu tepa ukamba wetu la Isietu wokilu. O kombutador yi pondola oku tu kuatisa. Utala Wondavululi o kasi oku tanga, wa sonehiwa kuenda wa pangiwa lekuatiso liokombutador. Citava okuti, lekuatiso liokombutador, tu pondola oku konomuisa ovina tu yongola, oku sapela lakamba kuenda oku linga olomapalo via sunguluka. Pole, nda ka tua lavuluile, tu yapuisiwa luloño waco. Vakualomĩlu va siata oku vetiya omanu hati, va sukila oku landa ovina viosi viokaliye. Umalẽhe umue okuti wa yonguile oku landa o kombutador, wa landisa olungela luaye vuyombeki oco a lande o kombutador. Eye, wa linga ocina cimue ka ca sungulukile!
4. Manji umue ulume wa siapo ndati ocituwa ka ca sungulukile coku talavaya lokombutador?
4 Ka ca sungulukile oku tiamisila lika utima kovoloño okuti, tu tepa ukamba wetu la Yehova. Manji Jon o kuete 28 kanyamoa wa popia hati: “Ndaño nda kũlĩhĩle olonumbi Viembimbiliya, pole nda enda oku pesila otembo yalua loku tala vokombutador. Noke nda limbuka okuti o kombutador ya kala unyali wange.” Manji Jon wa enda oku tala vo Internet toke vokati kuteke. Eye wamisako hati: “Nda enda oku kava calua, kuenda ka ca lelukile oku seleka ovikuata viaco, ndaño okuti ovina nda enda oku tala ka viakuatele esilivilo lialua.” Oco manji Jon a siepo ocituwa caye ka ca sungulukile, wa kapa ocipama cimue vo kombutador oco yi liyike oyo muẽle eci owola yaye yokupekela yi pitĩlapo.—Tanga Va Efeso 5:15, 16.
Ene alonjali, kuatisi omãla vene oku lekisa olondunge poku talavaya lo kombutador
5, 6. (a) Ocikele cipi olonjali vi kuete coku tata omãla vavo? (b) Olonjali vi vetiya ndati omãla vavo oku kuata akamba vawa?
5 Ene alonjali, ndaño ka vu pondola oku lavulula ovina viosi omãla vene va linga, pole, u sukila oku kũlĩhĩsa ovina vi kasi volokombutador viavo. Ka u ka eceleli okuti va tala ovina ka via sungulukile ndeci: Olofilme vi lekisa ungangala, umbanda, kuenda oku linga ukamba lomanu ka va kuete ovituwa viwa. Nda wa ci lingi, ‘omãla vene va limbuka okuti olonjali viavo ka vi tendi ovina viaco ndocina cimue ca sunguluka.’ Ene ulonjali u kuete ocikele coku teyuila omãla vene oco okuti lacimue ci pondola oku tepa ukamba wavo la Yehova. Ovinyama via siata oku teyuila omãla vavo kovina vi koka ohele. Ivaluka okuti, nda omãla va linga cimue ci koka ohele, ina yavo o sumua!—Sokisa Hosea 13:8.
6 Kuatisa omãla vove oku linga ukamba lavamanji amalẽhe kuenda akulu okuti va kuete ovituwa viwa. Ivaluka okuti omãla vove va sukila oku kala otembo yalua love! Omo liaco, sokiya otembo yoku lingila kumosi olomapalo, ovopange amue, kuenda “pamisili kumosi ukamba wene la Yehova.”b
UHAYELE
7. Momo lie vosi yetu tu yonguila oku kuata uhayele?
7 Olonjanja vimue tua siata oku pula vakuetu ndoco: “U kasi ciwa?” Olondaka evi vi situlula nda tu kuete uhayele ale sio. Momo olonjali vietu viatete via ecelela okuti Satana o tepa ukamba wavo la Yehova, kuenje, vosi yetu tua piñala ekandu. Satana o sanjuka calua eci tu kuatiwa loku vela, momo ka ci leluka oku vumba Yehova. Nda tua fa, ka tu pondola vali oku vumba Yehova. (Osa. 115:17) Tu sukila oku likolisilako oku linga ovina vi tu kuatisa oku kuata uhayele.c Kuenje, tu likolisilako oku kuatisa vamanji oco va kuate uhayele.
8, 9. (a) Tu yuvula ndati oku sakalala calua loku sandiliya uhayele? (b) Asumũlũho api a tunda koku kuata esanju?
8 Tu sukila oku yuvula oku sakalala calua loku sanda uhayele. Omanu vamue va siata oku pesila otembo yalua koku vangula catiamẽla kovina va yongola oku lia, kovihemba, ale kuhayele, kuenda kovina vioku liposuisa, kuenje, ka va kuata otembo yalua yoku kunda olondaka viwa Viusoma wa Suku. Ovo va siata oku sima okuti, oku ci linga ci kuatisa vakuavo. Pole, ka ca sungulukile oku vangula ovina viaco, nda tu kasi Vonjango Yusoma, kolohongele vimbo, ale kolohongele viofeka. Momo lie?
9 Tua siata oku enda kolohengele, oco tu pamise ekolelo lietu kuenda oku yevelela ovina vi tu nenela esanju li tunda kespirito sandu lia Suku. (Va Gal. 5:22) Olohongele ka vi lingiwa locimaho coku vangula ovina viatiamẽla kovihemba. Nda tua ci linga, ci honguisa ekolelo lietu, kuenda ci tepulula esanju lia vakuetu. (Va Rom. 14:17) Omunu lomunu o kuete ocikele coku nõla onjila a yongola oku kuama poku sakuiwa. Ka kuli lacimue ci pondola oku sakula ovoveyi osi. Momo olondotolo via siatavo oku vela, vi kuka, kuenda vi fa. Oku sakalala calua luhayele wetu, ka ci vokiya otembo yetu yoku kala komuenyo. (Luka 12:25) Momo ‘utima wa sanjuka, owo ovihemba viwa.’—Olosap. 17:22.
10. (a) Ovina vipi Yehova a velisapo viatiamẽla keposo lietimba lietu? (b) Otembo yipi tu ka kuata uhayele wa suapo?
10 Oku liposuisa ku kuete esilivilo lia velapo kokuetu. Pole, tu yuvuli oku sakalala loku liupa olosima viosi vi molẽha vetimba lietu. Momo vi lekisa oku kula kuomunu, esumbilo kuenda eposo liovutima. Embimbiliya li popia hati: “Owele ocifuto culamba, nda ci sangiwa vonjila yesunga.” (Olosap. 16:31, NW) Olondaka evi vi lekisa okuti eposo lio vutima, olio ocina ca velapo ku Yehova. (Tanga 1 Petulu 3:3, 4.) Tu sukila hẽ oku kapa kohele uhayele lomuenyo wetu, poku sakuiwa ale oku pelaliwa oco tu kuate eposo liwa? Cikale okuti tua kuka, ale tu kuete uhayele, eposo liocili, li tunda koku “sanjukila Yehova.” (Neh. 8:10) Tu sukila oku ivaluka okuti, oluali luokaliye oluo lika lu ka nena uhayele wa lipua, kuenda vosi yetu tu ka kala amalẽhe. (Yovi 33:25; Isa. 33:24) Tu sukila oku kuata olondunge poku nõla ovina tu yongola oku linga, kuenda oku kolela kolohuminyo via Yehova. Nda tua ci linga, ci tu kuatisa oku pamisa ukamba wetu la Yehova, osimbu tu likolisilako oku linga ovina via sunguluka.—1 Tim. 4:8.
OLOMBONGO
11. Oku sola olombongo ku pondola ndati oku tepa ukamba wetu la Yehova?
11 Oku kuata olombongo ale oku vi sanda lonjila yimue ya sunguluka, kacivĩko. (Uku. 7:12; Luka 19:12, 13) Pole, oku “sola olombongo” ci tepa ukamba wetu la Yehova. (1 Tim. 6:9, 10) ‘Oku sakalala calua lovina violuali lulo’ oco tu kuate ovina tu yongola, ci nyõla ekolelo lietu. Citava okuti tu kembiwa ‘lunene wovokuasi’ poku sima okuti, olombongo vi nena esanju kuenda oku kolapo. (Mat. 13:22) Yesu wa lekisa okuti “lomue” o pondola oku kuata esanju poku vumba Suku kuenda ovokuasi.—Mat. 6:24.
12. Ovina vipi omanu va siata oku linga oco va kuate olombongo vialua? Tu yuvula ndati ovina viaco?
12 Nda tua sima okuti olombongo ovio ocina ca velapo, tu pondola oku vetiyiwa oku linga ovina ka via sungulukile. (Olosap. 28:20) Kuli omanu vamue va siata oku sima okuti, va sukila oku landa ovikanda vioku imba ombatota, oco va kuate olombongo vialua. Vamanji vamue, va siata oku linga olomĩlu vimue lelavoko lioku nganyala olombongo vialua, kuenje, va vetiya vakuavo hati, nda va ci linga, va kuata olombongo vialua. Ku ka ecelele oku kembiwa locisimĩlo caco, pole lekisa olondunge. Momo ka ca lelukile oku sanda olombongo lonjanga, oco omunu a kale ohuasi.
13. Ocisimĩlo ca Yehova catiamẽla kolombongo ca litepa ndati leci coluali?
13 Nda tua pitisa kovaso ‘usoma wa Yehova kuenda esunga liaye,’ eye o sumũlũisa alikolisilo etu oku sandiliya lika ovina tu sukila komuenyo wetu. (Mat. 6:33; Va Efe. 4:28) Yehova ka yongola okuti, nda tu kasi Vonjango Yusoma kolohongele tu suñila, omo lioku talavaya calua kupange woku sanda eteku, ale oku tiamisila utima kolombongo. Omanu valua voluali va siata oku sima okuti, oku sanda olombongo ci va kuatisa oku kolapo, kuenda ka va yongola oku ci linga noke komuenyo. Olonjanja vimue va siata oku vetiya omãla vavo oku kuata ocimaho coku sandiliya ovokuasi. Yesu wa lekisa okuti ovisimĩlo viaco ka via sungulukile. (Tanga Luka 12:15-21.) Gehasi wa simĩle okuti, ndaño o kuete ocipululu, pole, o pondola oku kuata ukamba la Yehova.—2 Olos. 5:20-27.
14, 15. Momo lie ka ca sungulukilile oku sima okuti olombongo vi tu kuatisa oku kuata ekalo liwa komuenyo? Tukula ulandu umue.
14 Kuli ovolandu a lekisa okuti, olongonga vimue, via siata oku iñila kosi yovava poku seteka oku kuata ombisi yimue ka va kũlĩhĩle okuti, yi lema calua. Ukristão o pondola hẽ oku pita locitangi caco? Manji umue o tukuiwa hati Alex, wa popia hati: “Nda siata oku lavulula ndomo ndi pesela olombongo viange. Poku lisukula, ndi tetẽlela onjapãu oco ka yi kapue lonjanga.” Eye wa ci lingila oco a kuate olombongo okuti, noke yoku siapo upange waye woku sanda eteku, o litumbika kupange wakundi votembo yosi. Noke, wa konomuisa asapulo atiamẽla koku landa loku landisa ovina. Omo liaco, wa levala olombongo oco a lande ovina vialua vioku landisa. Pole, ovina viaco a landa, ka via kuatele esilivilo oco vi landisiwe. Noke, manji Alex wa popia hati: “Nda kuata onjongole yoku tiukila kovitumãlo nda landa ovina viaco, oco va ndi tiuwile olombongo viange. Pole, nda sokolola okuti, nda nda kevelela, ovina viaco vi ka kuata vali esilivilo.”
15 Manji Alex wamamako oku sokolola ocitangi caco vokuenda kuolosãi vialua. Ka ca lelukile kokuaye oku pitisa kovaso upange wa Yehova, kuenda wa enda oku pumba otulo. Momo ka tẽlele oku landisa ovina viaco oco opemo olombongo viaye. Manji Alex wa pumba ovina viaye viosi a kuatele kuenda wa landisa onjo yaye. Eye wa popia hati: “Nda kokela ovitangi vialua epata liange.” Pole, ulandu waco, wo longisa oku kuata olondunge. Kuenje, wa amisako lulandu waye hati: “Nda limbuka okuti, oku kolela koluali lua Satana, kua ndi kokela esumuo lialua.” (Olosap. 11:28) Nda tua tiamisila lika utima wetu kolombongo ale tu talavaya calua oco tu kuate olombongo, ci lekisa okuti, tua kololela Satana okuti eye “o suku yoluali lulo.” (2 Va Kor. 4:4; 1 Tim. 6:17) Manji Alex cilo wa leluisa omuenyo waye, kuenda o kuete otembo yalua yoku “kunda olondaka viwa.” Eye wa siata oku likolisilako oku linga ovina vi sanjuisa epata liaye kuenda oku va kuatisa oco va amameko oku pamisa ukamba wavo la Yehova.—Tanga Marko 10:29, 30.
OCIPULULU
16. Tu lekisa ndati ocipululu kovina viwa, kuenda ca litepa ndati loku kuata ovisimĩlo ka via sungulukile?
16 Ca sunguluka oku lekisa ocipululu kovina viwa. Tu sukila oku sanjukila esumũlũho tu kuete lioku kala Olombangi Via Yehova. (Yer. 9:24) Omo liaco, tu sukila oku lavulula poku nõla olonjila tu yongola oku kuama, oco ka tu ka yapuisiwe lovina ka via sungulukile. Pole, nda tua pitisa kovaso ovisimĩlo ale ekalo lietu, ci tepa ukamba wetu la Yehova.—Osa. 138:6; Va Rom. 12:3.
Lekisa ombili yoku tẽlisa ovikele viove vekongelo loku sanjukila upange wove woku kunda!
17, 18. (a) Tukula ovolandu a sangiwa Vembimbiliya omanu va lekisa umbombe kuenda ocipululu. (b) Nye manji umue a linga oco ka ka ecelele okuti ocipululu ci tepa ukamba waye la Yehova?
17 Vembimbiliya mu sangiwa ovolandu omanu va lekisa ocipululu kuenda ava va lekisa umbombe. Soma Daviti wa lekisa umbombe poku kuama olonumbi via Yehova kuenda wa tambula asumũlũho kokuaye. (Osa. 131:1-3) Pole, Yehova wa yambula Soma Nevukandesa kuenda Belsiatare. (Dan. 4:30-37; 5:22-30) Koloneke vilo kuli ovina vialua vi pondola oku seteka umbombe wetu. Manji umue o tukuiwa hati Ryan okuete 32 kanyamo okuti o ñuatisi yekongelo, eci a ilukila kekongelo liokaliye wa popia hati: “Nda sima okuti ndi ka nõliwa oco ndi kale ukulu wekongelo. Pole, noke liunyamo umosi, sia nõliwile oku kala ukulu wekongelo.” Anga hẽ manji Ryan wa sumuile loku sima okuti, akulu vekongelo ka va lekisile esumbilo kokuaye? Wa liwekapo hẽ oku endaenda kolohongele okuti wa tepa ukamba waye la Yehova kuenda lafendeli Vaye? Nda ove wa pitile locitangi caco nye nda wa linga?
18 Manji Ryan wa popia hati: “Osimbu nda kala oku kevelela nda konomuisa ovolandu alua valivulu etu.” (Olosap. 13:12) “Noke, nda limbuka okuti nda sukilile oku kuata epandi kuenda umbombe. Nda sukililevo oku ecelela oku pindisiwa la Yehova.” Noke, manji Ryan wa fetika oku sokolola ndomo a pondola oku kuatisa vamanji vekongelo kuenda omanu a sanga kupange woku kunda. Kuenje, wa kuatisa omanu valua poku va longisa Embimbiliya. Eye wa popia hati: “Noke yunyamo umosi, nda nõliwa oku kala ukulu wekongelo. Kuenje, nda liwekapo oku sakalala lika lovina viange muẽle kuenda ndeya oku kuata esanju lialua kupange woku kunda.—Tanga Osamo 37:3, 4.
PAMISA UKAMBA WOVE LA YEHOVA!
19, 20. (a) Tu kũlĩha ndati okuti ovina tu linga ka vi tepa ukamba wetu la Yehova? (b) Ovolandu api tu pondola oku kuama atiamẽla komanu va amamako lukamba wavo la Yehova?
19 Ovina viosi tua konomuisa vocipama cilo, leci ca pita, vi kuete esilivilo komuenyo wetu. Tu sanjuka calua omo lioku kala afendeli va Yehova. Momo epata li kuete esanju kuenda uhayele, ombanjaile yimue ya tunda ku Yehova. Tua kũlĩha okuti upange woku sanda eteku kuenda olombongo, vi tu kuatisa oku landa ovina tu sukila. Tua kũlĩhavo okuti olomapalo vi tu nenela esanju kuenda ovoloño a pondola oku tu kuatisa. Pole, nda tua pitisa kovaso ovina viaco, ale tu pesila otembo yalua kovina viaco, ci nyõla efendelo lietu, kuenda ci tepa ukamba wetu la Yehova.
Ku ka ecelele okuti cimue ci tepa ukamba wove la Yehova!
20 Satana o yongola okuti, tu nyõla ukamba wetu la Yehova. Pole, ove kumue lepata liove u pondola oku liteyuila kovitangi viaco! (Olosap. 22:3) Omo liaco, pamisa ukamba wove la Yehova, oco eye amẽle kokuove. Vembimbiliya mu sangiwa ovolandu alua a tu kuatisa oku ci linga. Enoke la Noha “va enda enda la Suku yocili.” (Efet. 5:22; 6:9) Mose “wa pandikisa ndu o lete Una ka muiwa lovaso ositu.” (Va Hev. 11:27) Yesu olonjanja viosi wa linga ovina Isiaye a yonguile okuti o vilinga kuenje wo sumũlũisa. (Yoa. 8:29) Omo liaco, tu kuami ongangu yavo. Embimbiliya li tu vetiya hati: “Sanjuki olonjanja viosi. Kali locituwa coku likutilila. Pokati kovina viosi, [kuati ocituwa coku eca] olopandu.” (1 Va Tes. 5:16-18) Omo liaco, ka tu ka eceleli lacimue okuti, ci tepa ukamba wetu la Yehova!
a Olonduko via pongoluiwa.
b Tanga o Despertai! yosãi ya Mbalavipembe yunyamo wo 2011, kocipama losapi hati: “Como criar filhos responsáveis”.
c Tanga o Despertai! yosãi Yelombo yo 2011, kocipama losapi hati: “Cinco passos para melhorar a saúde.”
-