Oloseketa Vioku Pongolola vi Kuatisa Omanu Valua

Ci pitahãla 60 kolopursento viovimunga vietu vioku pongolola, ka vi kasi oku talavayela koloseketa vio filiale pole, koloseketa vioku pongoluila alivulu kalimi (RTO). Momo lie eliangiliyo liaco lia siatela oku kuatisa? Ovimalẽho vipi vakuakupongolola va sukila oco va talavaye lonjila ya sunguluka ko RTO? Kuenda ndamupi ocitumãlo ku kasi ocimunga coku pongolola ci kuatisa ale sio kupange woku pongolola?

O RTO yimue yecelela okuti vakuakupongolola va kala kocitumãlo ku vanguiwa elimi liavo. Karin, okuti ukuakupongola kelimi lio Baixo-Alemão wa lombolola ndoco: Tunde eci tua yilukila ko RTO ko Cuauhtémoc, Chihuahua, ko Mexiku, olonjanja viosi tu sapela o Baixo-Alemão la vamanji tu talavayela kumosi kuenda kupange woku kunda ndaño ceci tu enda povitanda. Tua ñualiwa lomanu va vangula elimi lietu. Tu pondola oku yevelela olondaka viovindekaise okuti lalimue eteke tua vi yevele vali kuenda tua lilongisavo oku kuama eleka omanu va siata oku popia.

James, okuti o talavaya locimunga ci pongolala elimi lio Frafra ko Ghana, wa popia okuti olonjanja vialua o kuata ongeva lioku kala lepata lio Betele. Pole, wamisiko hati: “Ndi sole oku talavaya ko RTO. Oku kundila kocitumãlo ku vanguiwa elimi kuenda oku mola ndomo omanu va tava kolondaka viwa ci vetiya utima wange.”

Vamanjetu va nõla ndati ocitumãlo ku ku ka kala o RTO? Manji Joseph okuti wa tiamẽla koseketa yi Songuila Upange Woku Tunga voluali luosi ko Warwick, ko Nova York, Estados Unidos wa popia hati “ocitangi cimue tua siata oku liyaka laco ceci okuti kovitumãlo vimue ka kuli olusu ya koleliwa ale ovava, o internet yi sukiliwa oco ku tambuiwe ovolandu a sukila oku pongoluiwa.” Omo liaco, poku nõla oku ku ka kala o RTO yimue ka tu konomuisa lika ocitumãlo cimosi, tu konomuisavo kovitumãlo vi kuavo ku vanguiwa elimi.

Olonjanja vialua, onjila ya leluka haiyo yonjanga kuenda yi tetẽlela olombongo oku kapa o RTO Konjango yimue Yolohongele Vinene, Konjango Yusoma ale konjo yolomisionario kuna vakuakupongolola va pondola oku talavaya. Nda ka kuli ovitumãlo viaco, vamanji va pondola oku taviwa oco va lande onjo kuenda oloseketa muna vakuakupongolola va pondola oku kala loku talavaya. Nda ekalo liocimunga coku pongolola lia pongoloka, ocitumãlo caco ci leluka oku landisiwa kuenje olombongo viaco vi talavayiwa lavio kovina vi sukiliwa vali.

Oku Malehĩwa Oco Upange Wamameko

Vokuenda kunyamo wupange 2020, tua pesela eci cisoka 13 kolondolale oco olo RTO viamameko oku talavaya. Olo RTO vietu vi sukila olokombutador, o software ya velapo, ovimelẽho vioku ngãlavala, o internet, kuenda ovina vikuavo vi sukiliwa. Ndeci, oku kapa ovina vi sukiliwa vo kombutador ondando yaco yi pondola oku soka 750 kolondolale. Olo kombutador vi malẽhiwa lo software ya landiwa kuenda o Watchtower Translation System okuti (Ocimalẽho coku pongolola co Torre de Vigia) oco ocipama cimue ci kuatisa vakuakupongolola oku sokiya upange wavo kuenda oku kuata ovimalẽho vikuavo.

Vakuakupongolola va tambulavo ovimalẽho vioku ngãlavala vina vi ecelela oku ngãlavala vo seketa. Ovimalẽho vioco via kuata esilivilo lialua eci efengi lio COVID-19 lia fetika, momo valua vakuakupongolola va tẽla oku ambata ovimalẽho viaco kolonjo viavo loku amamako oku ngãlavala ovipama via sonehiwa kuenda olovideo.

Vamanji va lieca olumue vo pocitumãlo va siata oku kuatisa oku kũlĩhĩsa alivulu a pongoluiwa, loku tata ocitumãlo co RTO. Cirstin okuti o talavaya ko RTO yelimi afrikaner ko Cape Town, kofeka yo Afrika do Sul wa popia hati: “Akundi valua kuenda akundi votembo yosi va kuete epuluvi lioku talavaya lovoloño avo.”

Vamanji vaco va lieca olumue va sanjukila esumũlũho liaco. Manji umue ukãi wa siata oku kuatisa ko RTO wa popia hati, oku talavayako ci kasi “ndofela yi talala.” Vamanji vamue vo pocitumãlo va siatavo oku panga onepa koku ngãlavala. Juana okuti o pongolala o Totonac yo Veracruz, ko Mexiku, wa popia hati: “ omo okuti tu kasi ocipepi lalupale a vangula elimi lietu, ca leluka vali vamanji valua oku kuatisa oku ngãlavala olovideo vietu.”

Anga hẽ olo RTO via kuatisa ko ku mioñolola upange woku pongolola? Olohuluwa vialua viavakuakutanga va popia okuti oco. Cédric, o talavaya kocimunga cimue ko Republika Demokratika do Kongo wa popia hati: “Vamanji vamue va enda oku tukula onjila yetu yoku pongolola o Kongo okuti, ‘o Kongo ya livulu o Torre de Vigia,’ momo ka ya situluile onjila ndomo o Kongo ya enda oku popiwa. Pole cilo, ovo va popia okuti alivulu etu a pongoluiwa lo Kongo yo koneke vilo okuti onjila ndomo omanu vangula eteke leteke.”

Andile, okuti o talavaya kocimunga celimi lio Xhosa, wa siata oku yeva ulandu umuamue ko Afrika do Sul. Eye hati: “Valua va siata oku tu sapuila okuti va limbuka a pongoloko kupange wetu woku pongolola. Ndaño muẽle omãla va enda oku tanga Utala Wondavululi kelimi liongelesi, cilo va tanga kelimi lio Xhosa.” Ovo va sole calua upopi wa leluka u sangiwa Vepongoluilo Lioluali Luo Kaliye.

Olombongo viosi vi pesiwa kovitumalo vio RTO kuenda koku vi semulula via siata oku eciwa lolombanjaile vi eciwa lutima wosi kupange u lingiwa voluali luosi, oku kongelamo vina vi eciwa ponumbi donate.jw.org.