ECI o vangula la vakuene catiamẽla kocipango ca Suku, cikale pokolika cikale eci o vanguila kembumbua, eci o vangula te ca tiamisiwila kueci ci kasi Vondaka ya Suku. Vonepa eyi, ndomo ca siata, mu kongela oku tanga ovinimbu vimue Viembimbiliya, pole, ci kuete oku lingiwa ciwa.

Voku Lekisa Ongusu yi Sesamẽla Poku Tanga, Mua Kongela Ocikembe. Ovisonehua vi sukila oku tangiwa locikembe. Konomuisa yimue ongangu. Eci o tanga Osamo 37:11 lolukandi, ondaka yove yi sesamẽla oku yevalisa esanju omo lielavoko liombembua yi keya kovaso yi tukuiwamo. Eci o tanga eci catiamẽla kesulilo liohali loku fa ndomo ca sonehiwa Kesituluilo 21:4, ondaka yove te yi lekisa oku sanjukila kuolopandu omo lieci ci kasi loku tukuiwamo. Eci ca sonehiwa Kesituluilo 18:2, 4, 5, catiamẽla koku tunda ‘Kombavulono yinene’ yeyuka akandu, ci sesamẽla oku tangiwa lelaka limue li lekisa onjanga yoku tundamo. Ocili okuti, ocikembe caco ci kuete oku lekisiwa lutima wosi pole ka ci sukila oku ci pitahãisa ño enene. Unene wocikembe ci sesamẽla oku lekisiwa u tepisiwila kocisonehua kuenda kesunga lieci ocisonehua caco ci kasi loku tangiwila.

Eca Ongusu Kolondaka Via Sunguluka. Nda eci o yongola oku lombolola catiamẽla ño konepa yimue yocinimbu o yongola oku tanga, o kuete oku tukula longusu onepa yaco. Ndeci, poku tanga Mateo 6:33, ove ku ka eca evetiyo lia velapo kolondaka via popia hati “esunga liaye” ale “ovina evi viosi” nda o yongola oku lekisa eci ci lomboloka olondaka via popia hati “tete vanjiliyi usoma.”

Poku linga ohundo yimue Vohongele Yupange, ove pamue o sokiya oku tanga Mateo 28:19. Olondaka vipi hẽ oka velisapo oku tukula? Nda o yongola oku vetiya vamanji oco va kale vakuambili koku fetika alilongiso Embimbiliya, eca evetiyo kolondaka via popia hati, “va linge olondonge.” Handi vali, nda o kasi loku sima oku lekisa ocikele Cakristão coku sapula ocili Cembimbiliya komanu va tunda kolofeka vikuavo, ale nda o yongola oku vetiya akundi vamue oco vaka talavaye oku kuli esukila lia piãla liakundi, o kuete oku velisapo oku tukula onepa ya linga hati, “ka tavisi olofeka viosi.”

Ndomo ca siata, ocisonehua ci tangiwila oku tambulula epulilo limue, ale oku lekisa uvangi watiamẽla kondaka yimue okuti omanu vamue va yi sokisa ndu ya tatama. Nda ovisimĩlo viosi vi sangiwa vocisonehua caco vi tangiwa levetiyo limuamue, olonjeveleli viove ka vika tẽla oku limbuka oku litepa ku kasipo. Etosi liaco pamue ove lia ku lomboloka, pole ovo, ka lia va lombolokele.

Ndeci, nda o kasi loku tanga Osamo 83:18 Vembimbiliya lina okuti li kuete onduko ya Suku, nda wa eca ongusu ya velapo kondaka ya popia hati “Tõlo,” omunu o vangula laye, kaka tẽla oku limbuka okuti Suku o kuete onduko. Omo liaco, ove te wa velisapo oku tukula onepa ya linga hati, onduko yove “Yehova.” Pole, eci o tanga osamo yaco poku vangula eci catiamẽla kuviali wa Yehova, o kuete oku velisapo oku tukula onepa ya linga hati, ove, lika wove, “Tõlo,” koluali luosi. Cimuamue haico, eci o tanga Tiago 2:24 poku lekisa esilivilo lioku ambatisila kumosi ovilinga lekolelo. Nda wa velisapo oku tukula onepa ya linga hati, omunu o tendiwa “ndukuesunga,” okuti ku velisapo onepa ya linga hati mekonda “liovilinga,” eci ci pondola oku lingisa okuti vamue va ku yevelela, ka va tẽla oku limbuka etosi o yongola oku lekisa.

Ongangu yikuavo yi sangiwa ko Va Roma 15:7-13. Eyi onepa yimue yukanda upostolo Paulu a sonehelele ekongelo limue mua kala Vakualofeka kuenda va Yudea olonyitiwe. Vukanda waco, upostolo Paulu o va vetela evelo okuti upange Wukristão ka u kuatisa lika va Yudea va tunda evamba, pole u kuatisavo omanu vakualofeka, omo “vakualofeka va kemainya Suku mekonda liohenda yaye.” Noke upostolo Paulu wa tukula ovisonehua vikuãla, poku lekisa uvangi wokuti vakualofeka va kuetevo epuluvi lioku va kundila olondaka viwa. Ndamupi o kuete oku tanga ovisonehua eye a tukula oco wece evetiyo ketosi lia kala vovisimĩlo via Paulu? Nda o yongola oku kapa ondimbukiso kolondaka o sesamẽla oku vetiya longusu, ci tava okuti o tukula longusu ondaka ya linga hati, “vakualofeka” vocinimbu 9, “a vakualofeka” vocinimbu 10, “a vakualofeka viosi” kuenda “omanu vosi” vocinimbu 11, kuenda vali “vakualofeka” vocinimbu 12. Seteka oku tanga Va Roma 15:7-13 loku kapa ongusu kolondaka evi. Nda wa ci linga, cika leluka oku kuata elomboloko liocisimĩlo cosi cupostolo Paulu.

Onjila Yoku Eca Ongusu. Olondaka vi kuete ocisimĩlo o yongola oku velisapo oku tukula, vi pondola oku tukuiwa muiñi muiñi. Pole, onjila o kuama, te yina yi likuata locisonehua kuenda leci ci kasi loku lomboluiwa vohundo. Olonumbi vimue vievi.

Oku tõlisa ondaka. Omu mua kongela oku pongolola ocileñi condaka oco ku velisiwepo oku tukuiwa kuolondaka vi kuete ocisimĩlo ci kasi loku lomboluiwa pokati kolondaka vikuavo. Oku tõlisa ondaka, ku tẽlisiwa loku pongolola ocileñi condaka, poku vokiyako ale poku tepululako ondaka. Valimi amue, oku pongolola elaka poku tanga, ku vokiya ongusu kueci ci popiwa. Pole valimi akuavo, eci pamue ci pongolola elomboloko liosi lieci ci kasi loku popiwa. Eci apa pa sangiwa olondaka via velapo pa tangiwa levando, ci vokiya ongusu kolondaka viaco. Alimi ana okuti ka a ecelela oku tõlisa ondaka ndonjila yoku eca ongusu kolondaka vimue, cika sukila oku linga eci ca siata oku lingiwa valimi aco oco kupitiliwe kocimãho ci sukiliwa.

Oku talamapo kamue. Eci pamue ci lingiwa tete ale noke yoku tanga etosi limue lia velapo vocisonehua. Ale ku kuamiwa olonjila viaco vivali. Oku talama osimbu handi kua tangele ocisimĩlo cimue ca velapo, ci vetiya olonjeveleli oku kevelela eci cika kuamamo. Oku talama noke yoku tanga, ku vetiya utima wolonjeveleli oku patekela eci ca tangiwa. Pole, nda omunu o talayama ño enene, lacimue cika limbukiwa okuti oco ca velapo.

Oku pitulula. Ove ci tava okuti eca ongusu ketosi limue, poku litalamisa ove muẽle kuenda oku pitulula vali oku tanga ondaka ale ulala wolondaka wa tanga ale. Onjila ya siata oku kuamiwa olonjanja vialua, oku tanga ocinimbu caco cosi okuti noke ku pituluiwa vali oku tangiwa kuolondaka via velapo.

Oku ilaika. Oku senga senga ovoko kuenda oku lekisila ocisimĩlo pupolo ku vokiya ongusu kondaka yi popiwa.

Elaka. Valimi amue, olondaka olonjanja vimue vi tangiwa lonjila yimue okuti oyo yi lekisa eci vi lomboloka kuenda oyo yi vi tepisa. Konepa eyi, elunguko li sukiliwavo, ca piãla enene koku yuvula oku vangula ocenyo.

Ceci Vakuetu va Tanga Ovisonehua. Eci okuti omunu tu kasi loku kundila eye o tanga ocisonehua, eye pamue eca ongusu ya velapo kolondaka vina okuti havioko ale o vi tanga ño viosi lelaka limosi. Nye tu pondola oku linga konepa eyi? Ndomo ca siata, hĩse oku lekisa ciwa esilivilo liovisonehua viaco poku lekisa ndomo vi kapiwako. Noke yoku lekisa ndomo vi kapiwako, ove ci tava okuti o luluvalela vali enene kolondaka vi kuete ocisimĩlo o yongola oku velisapo Vembimbiliya.

POKU longisa vakuetu, ku kisikiwa vali calua okuti hakutangako lika ovinimbu Viembimbiliya. Upostolo Paulu eci a sonehela ekamba liaye Timoteo, wa popia hati: “Kolisako oku lilekisa ku Suku ndu we lipua, ndondingupange ka yi kuete eci ci yi kutisa osõi, haiyo yi kunda lesunga ondaka yocili.”​—2 Tim. 2:15.

Eci ci lomboloka okuti oku situlula kuetu ovisonehua, tu kuete oku ku tiamisila kueci Embimbiliya li longisa. Eci ci kisika okuti tu kuama eci ca lomboluiwa vulandu wosi, okuti ka tu nõla lika olondaka tu sima okuti viwa kokuetu kuenje tu vokiyako ovisimĩlo vietu muẽle. Vonduko yuprofeto Yeremiya, Yehova wa lungula omanu kueci catiamẽla kovaprofeto vamue va enda loku limolẽhisa soketi va kasi loku vangula eci ca tunda vomẽla wa Yehova, pole, va kala loku “popia evi vi tunda kovitima viavo muẽle.” (Yer. 23:16) Upostolo Paulu wa lungula Akristão oco va yuvule oku vĩhisa Ondaka ya Suku lovilongua viomanu eci a soneha hati: “Oku endisa upange wetu levi vi kutisa osõi levi viatutu ãvi, ka tu kuatako. Tu likala oku pengisa ondaka ya Suku.” Koloneke viaco, ava va landasaile ovinyu okuti havakuaciliko, kovinyu yavo va enda loku itilako ovava oco yilue okuti va nganyalelako olombongo vialua. Etu ka tu pengisa Ondaka ya Suku loku yi tenga lovilongua viomanu. Upostolo Paulu wa popiavo hati: “Etu ka tua sokele la va lua okuti tu fũla fũla londaka ya Suku. Etu, puãi, tu popia vu Kristu lesunguluko, ndakuenje va Suku kovaso a Suku.”​—2 Va Korindo 2:17; 4:2.

Olonjanja vimue, ove pamue o tukula ocisonehua cimue oco o lekise onumbi yimue yi sangiwamo. Embimbiliya lieyukisua lovihandeleko vialua vieca olonumbi vioku litunda ciwa kovina viñi viñi. (2 Tim. 3:16, 17) Pole, ove o kuete oku kolela okuti oku situlula kuove ocisonehua cimue kua sunguluka, kuenda ove ku kasi loku pengisa ocisonehua caco, loku molẽhisa soketi o kasi loku popia eci wa yonguile oku popia. (Osa. 91:11, 12; Mat. 4:5, 6) Oku lekisa ndomo ocisonehua cimue ci kapiwako, te ku likuata locipango ca Yehova ci lomboluiwa Vondaka ya Suku.

“[Voku] kunda lesunga ondaka yocili” mua kongelavo oku kũlĩhĩsa eci Embimbiliya li kasi loku popia. Embimbiliya “hosikoteko” yoku lingisa usumba vakuetu. Asongui vetavo, vina via enda loku tamãlala la Yesu Kristu, via enda loku tukula Ovisonehua, pole ka via kapeleko ovina via velapo vali ndeci, esunga, ohenda, kuenda ekolelo, okuti ovio ovina Suku a yonguile okuti ovio va linga. (Mat. 22:23, 24; 23:23, 24) Eci Yesu a longasaile Ondaka ya Suku, wa setokola muẽle ongangu ya Isiaye. Ombili Yesu a lekasaile kocili ya tengiwile locisola cocili eye a kuatelele omanu a longasaile. Etu tu sukilavo oku likolisilako oco tu kuame ongangu yaye.​—Mat. 11:28.

Ndamupi tu pondola oku kuata ekolelo liokuti tu kasi loku situlula muẽle ciwa ocisonehua? Oku kuata ocituwa coku tanga Embimbiliya, ci kuatisa cocili konepa eyi. Tu sukilavo oku sanjukila aliangiliyo a siata oku lingiwa “[l]ukuenje wa kolelua haeye wa lunguka,” ocimunga Cakristão va wavekiwa lespiritu okuti pokati kavo opo ukuenje wa kolelua a siatela oku eca okulia kuespiritu ku vakuanjo yaye vekolelo. Elilongiso liopokolika loku endaenda olonjanja viosi kolohongele viekongelo, vi tu kuatisa okupa esilivilo kelongiso lieciwa locimunga caco eci cukuenje wa kolelua haeye wa lunguka.

Nda elivulu Raciocínios à Base das Escrituras li sangiwavo velimi liove kuenda o tẽla oku talavaya lalio ciwa, oka sanga lonjanga olonumbi vi sukiliwa koku situlula ciwa ovisonehua okuti oco ca siata oku kuamiwa olonjanja vialua kupange woku kunda. Nda wa sokiya oku ka tanga ocisonehua cimue kua kũlĩhĩle ciwa, umbombe uka ku vetiya oku konomuisa eci catiamẽlako okuti poku vangula, oka kunda lesunga ondaka yocili.​—Olosap. 11:2.

Eci o Situlula ci Lomboloke Muẽle Ciwa. Poku longisa vakuene, kũlĩhĩsa ciwa okuti ovo va tẽla oku limbuka elitokeko li sangiwa pokati kombangulo o kasi loku lombolola kuenda ocisonehua o kasi loku tanga. Nda osimbu kua tangele ocisonehua wa votola epulilo, olonjeveleli viove te vi tẽla oku limbuka etambululo liepulilo liaco vocisonehua o kasi loku tanga. Nda o kasi loku tanga ocisonehua cimue oco o lekise uvangi watiamẽla kondaka yimue, kũlĩhĩsa ciwa okuti ondonge yi tẽla oku limbuka ndomo ocisonehua wa tanga ceca uvangi watiamẽla ketosi liaco.

Oku tanga lika ocisonehua, ndaño muẽle longusu yi sesamẽla, ka ci tẽla. Ivaluka okuti, omanu vamue pokati kolonjeveleli ka va kũlĩhĩle eci ci sangiwa Vembimbiliya. Omo liaco, pamue ka va tẽla oku limbuka etosi o kasi loku va sapuila nda wa tanga ño onjanja yimosi. Lekisa onepa yocisonehua yi likuata ciwa leci o kasi loku lombolola.

Eci, ndomo ca siata, ci kisika okuti ove o nõlamo olondaka via velapo, vina okuti vi likuata ciwa londaka yi kasi loku lomboluiwa. Onjila yimue ya leluka yoku ci linga, oku pitulula oku tukula olondaka vi pitiya ocisimĩlo condaka yi kasi loku lomboluiwa. Nda o kasi loku vangula lomunu umue, ci tava okuti o linga apulilo ana a kuatisa omunu waco oku limbuka olondaka via velapo. Olohundi vimue, eci vi vanguila kovaso yocimunga cimue, oco vi tẽlise ocimãho eci, vi nõlapo oku tukula olondaka via lisetahãla ale vi pitulula oku tukula ocisimĩlo ca velapo. Pole, nda wa nõlapo oku linga eci, kuata utate oco olonjeveleli ka vika pumbe oku limbuka elitokeko li sangiwa pokati ketosi li kasi loku lomboluiwa lolondaka vi kasi vocisonehua.

Pana okuti wa nõla ale olondaka via velapo, ove wa tumbika ale ociseveto ciwa. Kaliye amako kovaso. Anga hẽ wa fetika ciwa oku tanga ocisonehua kuenda wa lekisa esunga lieci o kasi loku ci tangela? Nda oco, lekisa ciwa ndomo olondaka wa velisapo oku tukula vi likuata leci wa vetiya olonjeveleli viove oku kevelela. Lekisa ciwa elitokeko li sangiwapo. Ndaño muẽle ceci okuti kua fetikile oku tanga ocisonehua loku tukula olondaka vimue, te pa kala ekuamẽlelo limue.

Va fariseo va linga ku Yesu epulilo limue ovo va simĩle okuti lia tĩla calua, poku popia hati: “Ci tava okuti ulume o nyalela ukãi waye evelo limue?” Yesu watiamisila etambululo liaye kelivulu Liefetikilo 2:24. Kũlĩhĩsa okuti eye wa tukula lika onepa yimue yocisonehua eci, kuenje noke wa lekisa ndomo ci kapiwako. Loku lekisa okuti ulume lukãi va linga “etimba limuamue,” Yesu wa sulako loku popia hati: “Oco eci ca tokekisa Suku omunu ka ka ci tepise.”​—Mat. 19:3-6.

Ovina viñami oka lombolola oco o lekise ciwa ndomo ocisonehua cimue ci kapiwako? Eci ci ka tepisa, omanu va kongeliwa vocimunga colonjeveleli viove kuenda esilivilo lietosi li kasi loku lomboluiwa. Pole, nõlapo oku teta onimbu kuenda oku vangula eci ca leluka.

Oku Situlula Ovisonehua. Catiamẽla kupange woku kunda upostolo Paulu a lingila ko Tesalonike, elivulu Liovilinga 17:2, 3 li tu sapuila okuti eye wa “va situluila ovisonehua.” Owu uloño umue olondingupange via Yehova viosi vi sesamẽla oku likolisilako oku kuata. Ndeci, upostolo Paulu wa tokekisa eci catiamẽla komuenyo lo kupange woku kunda wa Yesu, poku lekisa okuti, ca tukuiwile ale Vovisonehua vio Heveru, kuenje noke wa sulako loku popia hati: “Yesu u ñasi loku u vu lomboluila, eye Mesiya.”

Poku sonehela va Heveru, Paulu wa tukola olonjanja vialua Ovisonehua vio Heveru. Oco a velisepo ale oco a lombolole ciwa etosi limue, eye olonjanja vialua wa nõlailemo ondaka yimue ale ocinimbu cimue, loku lekaisa elomboloko liavio. (Va Hev. 12:26, 27) Kulandu u sangiwa kelivulu lia Va Heveru kocipama 3, Paulu wa tukula Osamo 95:7-11. Kũlĩhĩsa okuti eye wa lombolola ovina vitatu vi sangiwa vocisonehua eci: (1) wa tukula utima (Va Hev. 3:8-12), (2) wa lekisa eci ondaka “etaili” yi lomboloka (Va Hev. 3:7, 13-15; 4:6-11), kuenda (3) wa lekisa eci ci lomboloka olondaka via popia hati: “Lalimue eteke va iñila vowusa wange”. (Va Hev. 3:11, 18, 19; 4:1-11) Omo liaco, likolisilako oku kuama ongangu eyi eci o lekisa ndomo ocisonehua locisonehua ci kapiwako.

Kũlĩhĩsa uloño Yesu a situlula lawo Ovisonehua vulandu u sangiwa kelivulu lia Luka 10:25-37. Umue ulongisi wovihandeleko wa pula Yesu hati: “Olongisi, ndinga nye okuti ñuata omuenyo ko pui?” Ketambululo, Yesu tete wa pinga ulume waco oco a lombolole ocisimĩlo caye catiamẽla kondaka yaco, noke Yesu wa velisapo esilivilo lioku linga eci Ondaka ya Suku yi popia. Eci a limbuka okuti ulume ka kale loku kuata elomboloko lieci eye a kala loku vangula, Yesu wa vangula calua catiamẽla kondaka ya linga hati, “u o lisungue laye” yi sangiwa vocisonehua. Eye ka tukuile lika eci ondaka yaco yi lomboloka, puãi wa ta olusapo lumue oco a kuatise ulume oku kuata elomboloko.

Ocili okuti, poku tambulula apulilo, Yesu ka tukowaile lika ovisonehua oco a ece etambululo limue lionimbu. Eye wa enda loku situlula eci ocisonehua caco ci popia, kuenje noke o tiamisila ocisonehua caco kepulilo vo linga.

Eci elavoko liepinduko lia kala ekatanga ku va Sadukeo, Yesu wa tiamisila ovisimĩlo viavo konepa yimue yelivulu Lietundilo 3:6. Pole, eye kohĩleko noke yoku tukula ocisonehua caco. Eye wa situlula ocisonehua caco poku lekisa ciwa okuti epinduko onepa yimuevo yocipango ca Suku.​—Marko 12:24-27.

Oku kala omunu umue wa loñoloha koku situlula ciwa ovisonehua, oyo onepa ya velapo yoku kala ulongisi umue uwa.

CIKALE eci o vangula lomunu umosi ale ceci o vangula lolonjeveleli vialua, ka ca sungulukile oku sima okuti olonjeveleli viove vika kuatela onjongole kocipama, omo ño okuti ove o ci kuetele onjongole. Ondaka oka vangula yi kuete esilivilo, pole kuka sanjuisa olonjeveleli viove nda kua lomboluile ndomo eci ca vanguiwa ci kapiwa kovimuenyo viavo.

Eci ci kapiwako, ndaño muẽle kolonjeveleli Vonjango Yusoma. Ovo ci tava okuti va ku yevelela lutate eci o lombolola ulandu umue ka va kũlĩhĩle. Pole, ci tava okuti ovisimĩlo viavo vi tungayalela kumue kuiñi eci o vangula cimue ovo va kũlĩha ale, ca piãla enene nda alomboluilo aco ka va vanguiwile ndociseveto ku vokiyiwa alomboluilo akuavo. Ove o sukila oku va kuatisa oku limbuka esunga kuenda ndomo eci o kasi loku vangula ci kuete esilivilo liocili kokuavo.

Embimbiliya li tu vetiya oku sokolola eci ci kapiwako muẽle lesilivilo. (Olosap. 3:21) Yehova wa ecele ocikele ku Yoano Upapatisi coku songuila omanu “kolondunge via vakuesunga.” (Luka 1:17) Olondunge viaco vi iyilila koku sumbila Yehova. (Osa. 111:10) Vosi vana va limbuka esilivilo liolondunge viaco, va kuatisiwa oco va ambate omuenyo uwa cilo kuenda oku lavoka omuenyo wocili u kasi lokuiya kovaso, okuti owo omuenyo ko pui.​—1 Tim. 4:8; 6:19.

Oku Linga Ohundo Yimue Okuti Omanu Vopako Esilivilo. Oco ohundo yove yi kale yimue okuti omanu vopako esilivilo, te kua tiamisilile lika ovisimĩlo viove kocipama, pole te wa kapakovo olonjeveleli viove. Ku ka va tende ño ndocimunga. Vocimunga caco mu sangiwa omunu lomunu kuenda apata. Ci tava okuti vocimunga caco mu sangiwa omãla vatito, amalẽhe, akulu kuenda vana okuti va kuka. Ci tavavo okuti vocimunga caco mu sangiwa omanu vana va fetika oku lilongisa ndopo kuenda vana va fetika oku vumba Yehova eci handi ove kua citiwile. Vamue pamue va pama cocili kespiritu, vakuavo ci tava okuti handi haimo va kuamẽla ovituwa vimue violuali. Lipula ove muẽle ndoco: ‘Ndamupi ocipama eci ndika lombolola ndeti cika kuatisa omunu lomunu pokati kolonjeveleli? Ndamupi ndi pondola oku va kuatisa oku kuata elomboloko lietosi lia velapo?’ Ove ci tava okuti o nõlapo oku luluvalela lika kocimunga cimosi ale kovimunga vivali via tukuiwa ndeti. Pole, ku ka ivaleko vakuavo va tukuiwavo.

Oco hẽ nda wa tambula ocikele coku vangula eci catiamẽla kelongiso limue lia velapo Liembimbiliya? Ndamupi hẽ o lingisa okuti ohundo yaco yi kuatisa olonjeveleli vina okuti vi tava ale, kelongiso liaco? Likolisilako oku pamisa ekolelo liavo kelongiso liaco. Ndamupi hẽ? Poku lombolola uvangi u sangiwa Vovisonehua watiamẽla kelongiso liaco. Ci tavavo okuti o va vetiyila koku sola elongiso liaco Liembimbiliya. Eci ci pondola oku lingiwa loku lekisa ndomo elongiso liaco li likuata locili cikuavo Cembimbiliya kuenda ndomo li likuata lekalo lia Yehova. Lombolola ovolandu a pita muẽle ocili vomuenyo womanu vamue, a lekisa ndomo oku kuata elomboloko lielongiso liaco lia kuatisa omanu vaco, kuenda ndomo elongiso liaco lipongolola ovisimĩlo viomunu vieci catiamẽla kotembo yokovaso.

Ku ka kevelele lika oku lekisa ndomo eci ca lomboluiwa ci kapiwako poku sulako lohundo yove, okuti o lombolola ño olondaka vimue vionimbu. Okupisa muẽle kefetikilo liohundo, omunu lomunu pokati kolonjeveleli o kuete oku limbuka okuti “vondaka eyi nda kongeliwamovo.” Pana okuti wa tumbika ale ociseveto eci, amamako loku lekisa ndomo eci ci kasi loku lomboluiwa ci kapiwako, poku amamako loku lombolola etosi letosi lia velapo liohundo, kuenda ci lingavo poku sulako lohundo.

Eci o lekisa ndomo eci ci kasi loku lomboluiwa ci kapiwako, kũlĩhĩsa ciwa okuti o kasi loku ci linga lonjila yimue yi likuata lolonumbi Viembimbiliya. Eci ci lomboloka nye? Eci ci lomboloka oku ci linga locisola kuenda lohenda. (1 Pet. 3:8; 1 Yoa. 4:8) Ndaño muẽle ceci a liyaka lovitangi via tĩla ko Tesalonike, upostolo Paulu wa nõlapo oku velisapo oku tukula ovina viwa viatiamẽla koku amamako kespiritu kua vamanjaye Akristão alume lakãi. Eye wa kolelelevo okuti kondaka ya kala loku lomboluiwa, ovo va kala lonjongole yoku linga eci ca sunguluka. (1 Va Tes. 4:1-12) Hangangukuoyo yiwa oku yi setukula!

Anga hẽ, ohundo yove yi kuete ocimãho coku vetiya oku talavaya kupange woku kunda kuenda oku longisa olondaka viwa komanu? Eca evetiyo lioku kuatela esanju kuenda ocisola kesumũlũho liaco liupange. Pole poku ci linga, kũlĩha okuti oku talavaya kuomanu kupange waco owu kua litepa, kuenda Embimbiliya li kapako oku litepa kuaco. (Mat. 13:23) Ku ka lemise vamanjove lovisimĩlo viokuti va kuete eko. Kelivulu lia Va Heveru 10:24, ku tu vetiya “oku livetiya pokati oku kala locisola lovilinga viwa.” Nda tu livetiya oku kala locisola, ovilinga viwa vi keyilila kovaso yaco. Ku ka seteke oku silĩha omanu oku kuama onjila yimue, pole limbuka okuti Yehova o yongola okuti tu vetiya oku “pokola [lekolelo, NW].” (Va Rom. 16:26) Locisimĩlo eci, tu sandiliya oku pamisa ekolelo lietu muẽle leli lia vamanjetu.

Oku Kuatisa Omanu Oku Limbuka Esilivilo Lieci ci Kasi Oku Vanguiwa. Osimbu o kundila omanu, ku ka ivaleko oku lekisa esilivilo liolondaka viwa Viusoma vomuenyo wavo. Oku ci linga, ci kisika oku kũlĩhĩsa eci ci kasi vovisimĩlo viomanu vana va kasi vocikanjo cove. Ndamupi o pondola oku kũlĩha ovisimĩlo viavo? Yevelela asapulo vo rádio ale vo televisão. Vanja kemẽla liatete liukanda wasapulo. Handi vali, likolisilako oku vangula lomanu. Osimbu va vangula yevelela lutate. Pamue oka limbuka okuti ovo va kasi oku liyaka lovitangi vi sukila oku tetuluiwa lonjanga, ndeci ekambo liupange, ekambo liolombongo vioku feta onjo va kasi, oku vela, oku fa kua umue u kuepata, ohele yungangala, elaviso lia umue o kuete omoko yoku tumĩla, oku litepa kuolohuela, oku tekula omãla kuenda ovina vikuavo. Anga hẽ Embimbiliya li pondola oku va kuatisa? Oco muẽle, li pondola.

Eci o fetika ombangulo yimue, pamue o kuete ocisimĩlo cimue vutue wove okuti oko o yongola oku tiamisila ombangulo. Pole, nda omunu wa lekisa ocitangi cikuavo okuti oco ci kasi loku u sakalaisa vali, ku ka vanje konyima, ci vangula nda ci tava, ale u sapuila okuti oka tiuka noke lalomboluilo akuavo a silivila atiamẽlako. Ocili okuti, tu yuvula ‘oku likapa vovitangi via mãle,’ pole tu sanjuka loku sapula ku vakuetu olonumbi Viembimbiliya vi pondola oku va kuatisa. (2 Va Tes. 3:11) Pole, eci cika vetiya vali calua omanu, olonumbi Viembimbiliya vina vi veta kovimuenyo viavo.

Nda omunu ka tẽla oku limbuka ndomo ondaka tu kasi loku kunda yi veta komuenyo waye, ci tava okuti haico a sulisa lonjanga ombangulo. Ndaño okuti pamue o tu ecelela oku vangula, oku siapo oku lekisa esilivilo liondaka tua kunda komuenyo waye, cika lingisa okuti ondaka tua kunda yika kuata esilivilo litito kokuaye. Pole nda tua lekisa ciwa esilivilo lieci tua lombolola, ci pondola oku koka epongoloko komuenyo womanu.

Eci o songola alilongiso Embimbiliya, amamako loku lekisa esilivilo lieci ci kasi loku lomboluiwa. (Olosap. 4:7) Kuatisa olondonge oku kuata elomboloko lialungulo, lolonumbi Viembimbiliya kuenda ongangu yomanu vamue va tukuiwa Vembimbiliya yi lekisa kokuavo ndomo va pondola oku endela volonjila via Yehova. Velisapo oku tukula ovowa eyilila koku ci linga. (Isa. 48:17, 18) Eci cika vetiya olondonge oku linga apongoloko a sukiliwa vomuenyo wavo. Va vetiya oku kuatela ocisola Yehova kuenda oku kuata onjongole yoku u sanjuisa. Ecelela okuti onjongole yoku kapako alungulo a sangiwa Vondaka ya Suku, yi tunda muẽle vutima wavo.