ELILONGISO 14

Lombolola Atosi a Velapo

Va Heveru 8:1

CECI O SUKILA OKU LINGA: Kuatisa omanu oku kuama ohundo yove kuenda lekisa ndomo etosi letosi lia velapo li kuete elitokeko locimãho kuenda losapi yove.

NDOMO O CI LINGA:

Kuata ocimãho. Ocimãho cipi o yongola oku tẽlisa kohundo yove? Oku eca hẽ onumbi, loku vetiya omanu? Sokolola kocimãho cove poku pongiya ohundo kuenda kũlĩhĩsa nda atosi osi a velapo a ku kuatisa oku tẽlisa ocimãho caco.

Sokolola katatahãi omanu va pondola oku kuata catiamẽla kondaka yaco. Epulilo lipi liatete, liavali, leli liatatu omunu nda a linga? Kuenje sokiya ohundo yove vulala waco oco omanu va kuame elomboluilo loku kuata elomboloko kuenda oku tava kueci o popia.
Pitulula osapi yohundo yove. O pondola oku ci linga poku pitolola olonjanja vimue olondaka viosapi, ale tukula olondaka vi kuete elomboloko limuamue.
Lombolola atosi a velapo lonjila ya leluka. Nõla ño atosi a velapo a kuete elitokeko losapi kuenda ndomo ci likuata lotembo ya ku yilikiwila. Tukula ño atosi amue a velapo. Vangula eci catiamẽla ketosi limue, talamapo kamue kuenje pita ketosi likuavo.

Citava oku tukula atosi a velapo kefetikilo liohundo, oco o kuatise omanu oku kuama elomboluilo liaco. O pondolavo oku pitulula atosi a velapo kesulilo, oco ci va kuatise oku a patekela.