ELILONGISO 7

Tukula Ovolandu Ocili

Luka 1:3

CECI O SUKILA OKU LINGA: Tukula ovolandu ocili oco o kuatise olonjeveleli oku kuata elomboloko lia suapo.

Konomuisa olono viulandu wa koleliwa. Talavaya Londaka ya Suku okuti, oyo ono yovina o popia poku tanga muẽle Vembimbiliya nda citava. Nda o kasi oku lombolola eci catiamẽla kuloño, kulandu umue wasapulo, ale kulandu ukuavo, kũlĩhĩsa nda ono yaco ya koleliwa kuenda yokaliye.
Ku ka pongolole ovolandu. Lombolola ovisonehua ndomo ci likuata Lembimbiliya kuenda lalivulu ‘wukuenje wa kolelua haeye wa lunguka,’ catiamẽla kulandu waco. (Mat. 24:45) Nda wa kuama ovolandu opiwa volono vikuavo, ku ka pengise eci usonehi a yonguile oku popia.

Kuata utate oco ku ka vokiye kulandu kuenda atendelo. Kuatavo utate wokuti, nda ondaka yimue ya popia hati, “omanu vamue” ku ka popie hoti, “omanu valua,” ale “olonjanja vimue” o yi tukula hati, “olonjanja viosi” kuenda “mbi oco” o yi tukula hati, “citava okuti.”
Kuatisa omanu oku sokolola. Noke yoku tanga ocisonehua cimue, ale oku tukula ono yimue, linga apulilo lutate, tukula ovindekaise ale alusapo a kuatisa omanu oku sokolola eci va lilongisa kulandu waco.