Oku Lavulula Ku Nena Onima
KAPULUVI o ku ka kundila vocikanjo cekongelo liene, wa siata hẽ oku lavulula? Ulandu wa pita la vamanjetu kolupale luo Turku, kofeka yo Finlândia, u lekisa okuti oku lavulula ku kuete esilivilo.
Vamanji volupale luo Turku va limbuka okuti ocimunga calume vo kocifuka co Asia va pitila vofeka eci va kala oku tunga ocimbaluku cimue cinene petapu lio volupale luaco. Noke, manji umue wa mola owotele omu ovingendeleyi viaco via sikĩla. Eye wa molavo okuti komẽle yaco, olonalavayi via kala oku ambatiwa lokalela oku tunda kowotele toke petapu liolonaviyu. Vepuluvi liaco haico a sapuilako vamanji va vangula elimi Liongelesi vekongelo lio Turku.
Akulu vekongelo va limbuka okuti oku molẽha kuovingendeleyi, kua va ĩha apuluvi alua oku eca uvangi Wusoma, kuenje lonjanga yalua va sokiya oku kundila alume vaco. Vocalumingu yosemana yaco, akundi ekũi va liongoluila ocipepi locitumãlo coku talamela olokalela, kelivala liepanduvali komẽle. Vepuluvi liaco, ka kua molẽhele onalavayi layimue. Vamanji va lipula ndoco: ‘Anga hẽ tua cilua? Ale ka va kasi vali volupale luo Turku?’ Noke, kua molẽha onalavayi yimue luwalo wupange. Kuenje va fetika oku molẽha umosi umosi. Owiñi wolonalavayi wa liongoluila pocitumãlo coku talamẽla olokalela. Akundi va fetika oku eca uvangi lalivulu elimi Liongelesi. Omo okuti pa pita ci soka owola oco vosi va tumale kolomangu vokalela, eci ca ecelela ku vamanji oku eca uvangi kolonalavayi vialua. Eci okalela ka fetika ungende, olonalavayi via ambata 126 kolombrochura kuenda 329 kolorevista!
Onima va kuata, ya vetiya vamanji oku pitulula upange ulikasi woku eca uvangi vosemana ya kuamamo, eci va pasuisiwa la mitavaso ukuakunyula akongelo. Eci ombela ya kala oku loka, kelivala liepandu komẽle, mitavaso ukuakunyula akongelo wa endisa ohongelo yupange woku kunda pocitumãlo coku talamẽla olokalela, kuenda kua kala 24 kakundi. Keteke liaco, ovo va ambatavo alivulu kelimi lio Tagalog, omo va sangele ovingendeleyi vialua via tunda kofeka yo Filipinas. Komẽle yaco, eci okalela ka pitila petapu, olonalavayi via ambata 7 kalivulu, 69 kolombrochura kuenda 479 kolorevista. Hesanjukuolio vamanji va yeva omo lioku kuata onepa kupange ulikasi woku eca uvangi!
Osimbu handi ovingendeleyi ka via endele kolofeka via tundilila, vamanji va va nyula nyula vowotele muna va kala kuenda va va lomboluila ciwa esapulo Liusoma. Olonalavayi vimue via lombolola okuti va enda oku sapela Lolombangi via Yehova kolonepa vikuavo violuali. Olonalavayi via sanjukila calua vamanji omo liolombangulo va kuata osimbu va kala kofeka yo Finlândia.
Wa siata hẽ oku lavulula eci ku molẽha epuluvi lioku ka kundila kocikanjo cekongelo liene? O kuete hẽ ocimãho oku kundila omanu vakuavisoko viñi viñi? Nda oco, o pondola oku yeva esanju ndeci ca pita la vamanjetu kolupale luo Turku.
[Omapa kemẽla 32]
FINLÂNDIA
Turku
HELSINQUE