Petulu la Ananiya va Kembele Ulandu Waco u tu Longisa Nye?

Ove wa kũlĩha okuti, oku kemba, ku lomboloka oku popia olondaka vimue viuhembi. Wa kembele ale onjanja yimue?—a Kosimbu, kua kala omanu vamue okuti, ndaño va solele Suku, pole va kembele. Citava okuti wa kũlĩha omanu vamue va tukuiwa Vembimbiliya okuti va kembele. Umue pokati kavo Petulu okuti, wa pangele onepa kueci ci soka 12 kovapostolo va Yesu. Tu kũlĩhĩsi eci co vetiya oku kemba.

Yesu noke yoku kuatiwa, wa tualiwa konjo yocitunda cinene. Ovina viaco via pita vokati kuteke. Petulu wa iñila kocitali cocitunda cinene pole, ka vo limbukile. Osimbu va kala oku yota ondalu, ufeko umue upika wocitunda cinene, wa limbuka Petulu kuenda wo sapuila hati, ‘ove wa kalavo la Yesu.’ Petulu omo liusumba walikalela kovaso a vosi, hati, ‘eci o popia, si ci.’

Embimbiliya li popia okuti noke “ufeko ukuavo upika wo mola,” kuenje wa popia laye hati: “U wa kala kala la Yesu.” Petulu wa likala vali. Noke liokatembo kamue, omanu vakuavo veya ponẽle ya Petulu, kuenje vo sapuila vati: “Ocili ove u wavo.”

Petulu wa saluka. Kuenje onjanja yatatu, wa kemba hati: “Omunu waco siu wi!” Eci Yesu a ñualapo wa mõla Petulu, kuenje Petulu wa ivaluka ondaka Yesu o sapuilile hati: “Osimbu ekondombolo ka lia lilile, o liñala lutatu.” Petulu wa tunda loku livetela evelo kuenda wa lila!

Eci hẽ ci pondolavo oku pita love?—Citava okuti ove o kasi kosikola kuenje olondonge vikuavo vi vangula eci catiamẽla Kolombangi Via Yehova. Ovo va popia okuti, “ovio ka vi sivaya epandela.” Vakuavo va popia ndoco: “Olombangi Via Yehova ovingendeleyi.” Vakuavo hati: “Ovo Hakristãoko, momo ka va lingi ocipito Conatale.” Umue pokati kavo amẽla kokuove kuenda oku pula ndoco: “Ove hẽ Umbangi ya Yehova?” U tambulula ndati?—

Oco ece atambululo awa osimbu kua pitile locitangi caco, o sukila oku lipongiya ciwa. Omo okuti Petulu ka lipongiyile, eci a liyaka locitangi caco wa vetiyiwa oku kemba! Poku livetela evelo omo liocina a linga, Suku wo wecela.

Ananiya okuti umue pokati kolondonge viatete via Yesu, wa kembelevo. Pole, eye kumue lukãi waye Safira Suku ka va ecelele. Momo Safira wa kuatisa ulume waye oku kemba. Tu kũlĩhĩsi esunga lieci Suku ka ecelelele Ananiya kuenda Safira.

Noke yoloneke ekũi tunde eci Yesu a litepa lovapostolo vaye okuti wa tiukila kilu ku Suku, ko Yerusalãi kua papatisiwa eci ci soka 3.000 komanu. Omanu valua va tunda kovitumãlo vikuavo okuti veyile kocipito co Paskoa, va linga Olondonge via Yesu. Kuenje, va kala oloneke vimue ko Yerusalãi oco va pamise ekolelo liavo liokaliye. Vamue pokati kolondonge va eca olombongo viavo oco va kuatise vakuavo.

Ananiya kumue lukãi waye va nõlapo oku eca olombongo vioku kuatisa vana va papatisiwa ndopo. Eci Ananiya a tuala olombongo Kovapostolo, wa popia hati, evi ovio olombongo tua landisa usenge wetu. Pole, wa kemba! Momo olombongo vikuavo va vi seleka! Suku wa situluila Petulu uhembi waco kuenda Petulu wa sapuila Ananiya hati: “Kua kembele omunu, te Suku.” Vepuluvi liaco, Ananiya wa kupukila posi, kuenje wa fa! Noke yolowola vitatu, ukãi waye wo landula. Eye ka kũlĩhĩle eci ca pita lulume waye, omo liaco, wa vangulavo uhembi, kuenje wa kupukila posi kuenda wa fa.

Ulandu owu u tu longisa okuti, oku vangula ocili ci kuete esilivilo! Tu sukila oku kapako ulandu waco! Ocili okuti vosi yetu tu pondola oku lueya ca piãla enene osimbu tu kasi amalẽhe. Ku sanjuka hẽ poku limbuka okuti Yehova oku sole, kuenda o pondola oku ku ecela ndeci a ecela Petulu?— Pole, ivaluka okuti tu sukila oku vangula ocili. Nda tua linga ekandu limue linene, tu sukila oku pinga ku Suku oco a tu ecele. Eci oco Petulu a lingile, kuenje Yehova wo wecela. Omo liaco, nda tua likolisilako oku yuvula oku kemba, Suku o tu ecela!