WA CI KŨLĨHA?

Koloneke via Yesu, olombanjaile via enda oku eciwa ndati vonembele?

Ocikasia colombanjaile vionembele ca kala Kocitali Cakãi. Elivulu losapi hati: O Templo—Seu Ministério e Seus Serviços, li popia ndoco: “Omanu va enda oku li kuama usokosoko oku enda kovikasia ale alumbeta vi soka ekũi latatu vina via kala vovimano viovimbaka vioku kapa ovilumba.”

Olokasia viaco via enda oku tukuiwa hati, olumbeta momo via kala ndasanga okuti komẽla kutito kombuelo kua sanjavala. Okasia lokasia ya kuatele ocisonehua ci lekisa ocimãho colombongo vi kapiwamo, kuenda olombongo viaco vi lingiwa eci via sokiyiwila. Yesu wa kala Vocitali Cakãi eci a mola omanu valua va kala oku eca ovilumba, oku kongelamo ukãi umue ocimbumba haye osuke oku ecavo ocilumba.​—Luka 21:1, 2.

Olokasia vivali va endaile oku kapamo ovilumba​—yatete yoku feta ovina viosi viunyamo wokaliye kuenda yavali, yoku feta ovina viunyamo wa pita. Oku upisa kokasia 3 toke 7 via kala vioku kapa ovilumba viosi ndeci: olonende, olopomba, olohũi, insensu, kuenda ovikuata viulu. Nda omunu eca ocilumba o sukila oku tukula ondando yocilumba caco, ecako onepa yimue yikuavo ya amamako oku kala vokasia. Okasia 8 va enda oku kapamo olombongo viocilumba coku tuvika ekandu. Okasia 9 toke 12, va enda oku kapamo ovilumba vieko, ovilumba violonjila, ovilumba via va Nasiri, kuenda ovilumba via vana va kasi lovilundu. Okasia 13 ya kala yoku kapa ovilumba vi eciwa lutima wosi.

Anga hẽ Ulandu Wembimbiliya wa soneha Luka wa Suapo?

Luka wa soneha Evanjeliu li kuete onduko yaye kuenda Ovilinga Viovapostolo. Luka wa lombolola okuti wa “kũlĩhĩsa ovina viosi lutate,” pole, olonoño vimue via siata oku tatãla ovolandu aco. (Luka 1:3) Anga hẽ ulandu waye wa suapo muẽle?

Luka wa soneha ovolandu ocili a pondola oku kũlĩhĩsiwa. Eye wa tukula olonduko vialua via tatama violombiali vio ko Roma ndeci pretor ale olonganji, ko Filipu, va poliarka ale olombiali vio pocitumãlo, vo ko Tesalonike; kuenda Asiarchs ale asongui vo ko Efeso. (Ovilinga 16:20; 17:6; 19:31) Luka wa tukula Herode Antipas hati, ombiali yofeka yimue kuenda Sergio Paulus, wa tukuiwilevo okuti epalanga lioko Chipre.​—Ovilinga 13:1, 7.

Olonduko viesumbilo Luka a tukula via sunguluka momo eci ekalo liocikanjo cimue co Roma, lia enda oku pongoloka, onduko yombiali yaco yi pongolokavo. Ulume umue ukuakukonomuisa Embimbiliya otukuiwa hati, Bruce Metzger wa popia hati: “Olonduko via tukuiwa kelivulu Liovilinga vi likuata lovitumãlo kuenda lotembo kua pita ovolandu aco.” Onoño yimue o tukuiwa hati, William Ramsay wa tukula Luka hati “ulume umue wa velapo ko ku soneha ovolandu.”