Wa Siata hẽ Oku Tambula “Okulia ... Kotembo ya Tukuiwa”?

TU KASI kotembo yimue okuti, omanu va siata oku liyaka lovitangi vialua. (2 Tim. 3:1-5) Ocisola cetu ku Yehova, kuenda onjongole yetu yoku kuata omuenyo u litava lolonumbi viaye, via siata oku setekiwa eteke leteke. Yesu wa popele eci catiamẽla kotembo yohali, kuenda wa likuminyile kolondonge viaye hati, via laikele oku tambula ekuatiso vi sukila oco vi pandikise toke kesulilo. (Mat. 24:3, 13; 28:20) Oco vi pamise ekolelo liavo, Yesu wa nõla ukuenje wa kolelua, oco a ece ‘okulia kuespiritu kokuavo kotembo ya tukuiwa.’—Mat. 24:45, 46.

Tunde kunyamo wo 1919 eci kua nõliwa ukuenje wa kolelua, omanu valua va panga onepa ku “vakuanjo” va tunda kalimi osi, va kasi oku kongeliwa vocisoko ca Yehova, kuenda va siata oku tekuiwa konepa yespiritu. (Mat. 24:14; Esit. 22:17) Pole, okulia kuaco, ka kua sandekiwile kalimi osi, kuenda omanu valua ka va kuete o Internet, oco va tambule alivulu etu. Omanu valua, ka va kuete olovideo, kuenda ovipama vikuavo via siata oku sandekiwa vo jw.org. Anga hẽ eci ci lekisa okuti, omanu vamue ka va tambula okulia va sukila oco va pamise ekolelo liavo? Oco tu kuate elomboloko lia suapo, tu konomuisi atambululo kapulilo akuãla a kuãimo.

1. Ocina cipi ci kuete esilivilo lia velapo kokulia Yehova a siata oku tu ĩha?

Eci Satana a seteka Yesu oco a pongolole ovawe okuti a linga olombolo, Yesu wo tambulula hati: “Omunu ka muila omuenyo kombolo lika, te kondaka yosi yi tunda vomẽla wa [Yehova].” (Mat. 4:3, 4) Olondaka via Yehova vi sangiwa Vembimbiliya. (2 Pet. 1:20, 21) Embimbiliya olio ocina ca velapo koku sandeka okulia kuespiritu.—2 Tim. 3:16, 17.

Ocisoko ca Yehova ca siata oku pongoluila o Tradução do Novo Mundo das Escrituras Sagradas, kueci ci pitahãla 120 kalimi, kuenda, unyamo lunyamo alimi alua a siata oku fetika oku linga upange waco. Ndaño tu kuete o Tradução do Novo Mundo, pole, kulivo Ambimbiliya akuavo a pongoluiwa kalimi alua, ale olonepa vimue Viambimbiliya aco, ovio lika via pongoluiwa kalimi alua. Upange waco u likuata locipango ca Yehova cokuti, ‘omanu vosi va kuata ukũlĩhĩso wa suapo wocili oco va popeliwe.’ (1 Tim. 2:3, 4) Omo okuti ku Yehova “ka kuli ociluvo ca salamisua,” tua kolela okuti, o pondola oku nena vocisoko caye omanu ‘va kasi onjala lenyona liesunga,’ oco a ece kokuavo okulia kuespiritu va sukila.—Va Hev. 4:13; Mat. 5:3, 6; Yoa. 6:44; 10:14.

Esilivilo lipi alivulu etu a kuete koku eca okulia kuespiritu?

Oco omunu a pamise ekolelo liaye, ka sukila lika oku tanga Embimbiliya. Pole, o sukilavo oku kuata elomboloko liovina a tanga, kuenda oku vi kapako. (Tia. 1:22-25) Ulume umue wo kofeka yo Etiopia wa pita locitangi caco kocita catete. Eye, wa kala oku tanga Ondaka ya Suku eci Filipu o pula hati: “Eci o kasi loku tanga hẽ, ca ku lomboloka?” Kuenje, wo kumbulula hati: “Ci ndomboloka ndati nda lomue o ndomboluila?” (Ovil. 8:26-31) Noke, Filipu wo tambulula poku u kuatisa oku kuata elomboloko Liondaka ya Suku. Ulume waco weya oku kuata esanju lialua omo liovina a kala oku lilongisa, kuenje, wa papatisiwa. (Ovil. 8:32-38) Cimuamue haico ci kasi oku pita koloneke vilo okuti, alivulu etu a lombolola ovina vi kasi Vembimbiliya, a siata oku tu kuatisa oku kuata ukũlĩhĩso wocili. Ovina tu tanga valivulu aco, via siata oku tu vetiya oku kapako ovina tu lilongisa.—Va Kol. 1:9, 10.

Lekuatiso lialivulu, afendeli va Yehova va siata oku tambula okulia kualua kuespiritu oco va litekule, kuenda ovina vioku nyua konepa yespiritu. (Isa. 65:13) Utala Wondavululi u kasi oku sandekiwa kueci ci pitahãla 210 kalimi, u lombolola ovitumasuku Viembimbiliya, u vokiya elomboloko lietu kovina via longa viocili, kuenda u tu vetiya oku ambata omuenyo u likuata lolonumbi Viembimbiliya. O Despertai!, yi kasi oku sandekiwa kueci ci soka 100 kalimi, yi vokiya ukũlĩhĩso wetu watiamẽla kovina Yehova a lulika, kuenda yi lekisa ndomo tu pondola oku kapako alungulo a sangiwa Vembimbiliya. (Olosap. 3:21-23; Va Rom. 1:20) Ukuenje wa kolelua, wa siata oku sandeka alivulu a lombolola ovina vi sangiwa Vembimbiliya, a pongoluiwa kueci ci pitahãla 680 kalimi! Ove hẽ, wa siata oku sokiya otembo yoku tanga Embimbiliya oloneke viosi? Wa siata hẽ oku tanga olorevista viokaliye, kuenda alivulu osi okaliye a sandekiwa kelimi liove unyamo lunyamo?

Handi vali, ocisoko ca Yehova, ca siata oku pongiya olohundo viopiwa Vembimbiliya, oco vi ­lingiwe kolohongele viekongelo, kolohongele vimbo, kuenda viofeka. Wa sanjukila hẽ olohundo viaco, olondalama, ovindekaise, kuenda apulilo a siata oku lingiwa ku vamanji kolohongele viaco? Ocili okuti, Yehova wa siata oku tu ĩha okulia kua lua kuespiritu! —Isa. 25:6.

Nda ka kuli alivulu a sandekiwa kelimi liove, ci lekisa hẽ okuti o pondola oku hongua konepa yespiritu?

Sio, hacoko. Ovina viaco ka vi tu komõhisa, momo afendeli vamue va Yehova kosimbu, va kuatelevo okulia kualua kuespiritu okuti, vakuavo ci sule. Momo lie? Konomuisa ulandu wovapostolo. Ovo, va tambuile olonumbi via lua okuti olondonge vikuavo vio kocita catete ci sule. (Mar. 4:10; 9:35-37) Pole, olondonge vikuavo ka via honguele konepa yespiritu momo via enda oku tambula ovina via sukilile.—Va Efe. 4:20-24; 1 Pet. 1:8.

Tu sukila oku ivaluka okuti, ovina vimue Yesu a popia eci a kala palo posi, ka via sonehĩwile Vembimbiliya. Upostolo Yoano wa soneha ndoco: “Kulivo ovina via lua vikuavo Yesu a linga. Nda viosi via sonehiwile, [ndi sima okuti,] voluali, alivulu aco a sonehiwa, nda ka a suimo.” (Yoa. 21:25) Ocili okuti, Akristão vo kocita catete, va kũlĩhĩle ovina vialua viatiamẽla ku Yesu okuti, etu ci sule. Pole, ka tu kasi oku tatekiwa oku tambula ovina tu sukila. Omo liaco, Yehova wa siata oku linga esokiyo liokuti, tu kuata ukũlĩhĩso watiamẽla ku Yesu, oco tu kuame ongangu yaye.—1 Pet. 2:21.

Sokololavo ovikanda ovapostolo va tumile kakongelo o kocita catete. Umue pokati kovikanda upostolo Paulu a soneha, ka wa sonehiwile Vembimbiliya. (Va Kol. 4:16) Anga hẽ eci ci lekisa okuti ka tu kuete okulia kua suapo kuespiritu omo okuti ukanda waco ka u sangiwa Vembimbiliya? Sio hacoko. Yehova wa kũlĩha ovina tu sukila, kuenda wa siata oku tu ĩha okulia kuespiritu ku pamisa ekolelo lietu.—Mat. 6:8.

Koloneke vilo, afendeli vamue va Yehova va kuete okulia kualua kuespiritu okuti, vakuavo ci sule. Ove hẽ o vangula elimi limue okuti, kuli lika alivulu amue a sandekiwa? Nda oco, Yehova o pondola oku ku ĩha ovina o sukila. Lilongisa alivulu a sandekiwa kelimi liove, kuenda kuata ocituwa coku endaenda kolohongele vi lingiwa kelimi lina o tẽla oku vangula. Nda wa ci linga, o pamisa ukamba wove la Yehova.—Osa. 1:2; Va Hev. 10:24, 25.

4. Nda ku pondola oku kuata alivulu a sandekiwa vo jw.org, ci lekisa hẽ okuti o hongua konepa yespiritu?

Vonumbi yetu yo Internet, mua siata oku sandekiwa olorevista kuenda alivulu akuavo alongisa ovina viatiamẽla Kembimbiliya. Mua siatavo oku sandekiwa ovipama vi kuatisa olohueli, amalẽhe, kuenda vana va kuete omãla okuti amalẽhe. Apata a pondola oku kuatisiwa poku konomuisa ovipama viaco Vefendelo Liepata. Handi vali, vonumbi yetu yo Internet, mu sangiwavo ovipama vilikasi ndeci: Oku malusuiwa Kuosikola yo Gileada, Ohongele yunyamo, ovolandu atiamẽla ku vamanji va pita lovilunga voluali, kuenda ovolandu a lekisa ndomo afendeli va Yehova va yula kombonge. (1 Pet. 5:8, 9) Vonumbi yaco, mu sangiwavo ovipama vi tu kuatisa kupange woku kunda olondaka viwa toke kolofeka vina okuti, upange wetu wa tatekiwa.

Cikale okuti o kuete o Internet ale sio, o pondola oku pamisa ekolelo liove. Ukuenje wa kolelua wa siata oku talavaya calua okuti ku sandekiwa alivulu oku eca ku vakuanjo yaye, oco va litekule konepa yespiritu. Omo liaco, ku ka sime okuti, o kisikiwa oku landa omakina yimue oco upe alivulu vo jw.org. Ndaño omanu vamue va siata oku linga esokiyo lioku upa alivulu etu a sandekiwa vo Internet oco a eciwe ku vamanji vana ka va kuete epondolo lioku upa alivulu aco vo Internet, pole, akongelo ka a kisikiwa oku ci linga.

Tu eca olopandu ku Yesu omo lioku tẽlisa ohuminyo yaye yoku tu ĩha okulia kuespiritu tu sukila, oco tu pamise ekolelo lietu. Osimbu esulilo lioluali lulo ka lieyile handi, tua kolela okuti, Yehova o ka amamako oku tu ĩha okulia kuespiritu “kotembo ya tukuiwa.”