Vana va pokola ku Suku va kuata Asumũlũho

Uprofeto Mose wa popia okuti nda tu pokola kovihandeleko via Suku, tu ka tambula asumũlũho. (Esinumuĩlo 10:13; 11:27) Etu ka tu pokola ku Suku omo okuti tu kuetele usumba eyambulo liaye. Ovituwa via Suku vi tu vetiya oku u pokola, momo tu u sole kuenda tu yongola oku yuvula oku linga cimue cu sumuisa. “Eci oco ci lomboloka ocisola ca Suku okuti, tu pokola kovihandeleko viaye.”—1 Yoano 5:3.

Pole, asumũlũho api eyilila koku pokola ku Suku? Kũlĩhĩsa ovina vivali.

1. NDA TU POKOLA KU SUKU TU KUATA OLONDUNGE

“Ame ndi Yehova Suku yove, hu longisa eci cu ku kuatisa, hu songuila vonjila ya ku sungulukila.”—ISAYA 48:17.

Yehova Suku, Ululiki wetu, wa tu kũlĩha ciwa kuenda o tu ĩha olonumbi tu sukila. Nda tu yongola okuti alongiso aye a tu kuatisa oku nõla onjila ya sunguluka, tu sukila oku lilongisa Lovisonehua vi Kola eci Suku a yongola okuti oco tu linga kuenda oku ci ka kapako.

2. NDA TU POKOLA KU SUKU TU KUATA ESANJU

“Va sumũlũha vana va yeva ondaka ya Suku kuenje va yi kapako!”—LUKA 11:28.

Koloneke vilo olohuluwa viomanu va pokola kondaka ya Suku, va kuete esanju liocili. Ndeci, kũlĩhĩsa ulandu wulume umue wo ko Espanya okuti wa kala ukuacinyeñousa loku tata vakuavo lungangala oku kongelamo ukãi waye. Eteke limue eye wa tanga ulandu umue wa sonehiwa luprofeto Mose watiamẽla kokuomboka kua Yosefe, omola a Yakoba. Yosefe wa landisiwa ndupika kuenda wa kapiwa vokayike lekambo liesunga; pole, ndaño ndoco, eye wa amamako lumbombe, oku kala ukuambembua kuenda ukuakuecela. (Efetikilo ocipama 37-45) Ulume wo ko Espanya wa popia hati: “Oku sokolola kulandu wa Yosefe ca mbetiya oku kala ukuepandi, ukuembombe kuenda ukuakulikandangiya. Kuenje cilo ñuete esanju komuenyo.”

Ovisonehua vi Kola vi tu ĩha olonumbi vi tu kuatisa ndomo tu tata vakuetu. Kũlĩhĩsa lutate olonumbi viaco vocipama ci kuãimo.