Momo Lie Yesu a Tukuiwila Okuti Omõla a Suku?

Etambululo Liembimbiliya

Embimbiliya li tukula Yesu okuti “Omõla a Suku.” (Yoano 1:49)Ondaka yokuti Omõla a Suku” yi lekisa okuti Suku eye Ululiki, ale eye Ono yomuenyo wosi, oku kongelamo omuenyo wa Yesu. (Osamo 36:9; Esituluilo 4:11) Embimbiliya ka li longisa okuti Suku wa cita omõla ndeci omanu va siata oku cita.

Embimbiliya li tukula ovangelo okuti “omãla va Suk yocili.” (Yovi 1:6) Handi vali, olio li lekisa okuti Adama, ulume watete wa kala “omõla a Suku.” (Luka 3:38) Omo okuti Yesu eye ociluvo catete Suku a lulika kuenda eye uveli, Embimbiliya li tukula Yesu okuti eye Omõla wa velapo wa Suku.

• Hanga hẽ Yesu wa kala kilu osimbu ka citiwile palo posi?

• Nye Yesu a lingaile kilu osimbu keyile palo posi?

Hanga hẽ Yesu wa kala kilu osimbu ka citiwile palo posi?

Oco. Yesu wa kala ociluvo cimue cokilu osimbu ka citiwile palo posi. (Yoano 6:38; 8:23)

Suku wa lulika Yesu osimbu ka lulikile ovina vikuavo. Kũlĩhĩsa eci Embimbiliya lia popia catiamẽla ku Yesu:

• “Eye . . . uveli woviluvo viosi.” —Va Kolosai 1:15.

• Eye “efetikilo lioviluvo viosi via Suku.” —Esituluilo 3:14.

Yesu wa tẽlisa ocitumasuku cokuti “ocikoti caye ci tunda kotembo yosimbu, koloneke viosimbu.” —Mika 5:2; Mateo 2:4-6.

Nye Yesu a lingaile kilu osimbu keyile palo posi?

Eye wa kuata ocikele cimue ca velapo kilu. Eye wa tukula ocikele caye poku likutilila hati: “A Tate, muise ulamba . . . ulamba una nda kala lawo kumue love osimbu oluali ka lua lulikiwile.” —Yoano 17:5.

Eye wa kuatisa isiaye oku lulika ovina viosi vikuavo. Yesu wa talavaya la Suku “ndomesele ya loñoloha.” (Olosapo 8:30.) Poku lombolola catiamẽla ku Yesu Embimbiliya liti: “Momo ovina viosi via lulikiwa pocakati caye, ci kaile vio kovailu, ci kaile vio posi.” —Va Kolosai 1:16.

Yehova wa talavaya la Yesu oco a lulike ovina viosi. Omu mua kongela ovangelo kuenda oviluvo vi kasi voluali. (Esituluilo 5:11) Volonepa vimue, omunga ya kala pokati ka Suku la Yesu, yi sokisiwa leyi yomesele kuenda yukukuakutunga. Omesele yi sokiya upange umue kuenda ukuakutunga o kuama onumbi yaco poku tunga.

Eye wa kala Ndaka. Poku popia catiamẽla komuenyo wa Yesu osimbu keyile palo posi, Embimbiliya li u tukula hati, “Ndaka.” (Yoano 1:1) Eci ci lekisa okuti Suku wa talavaya Lomõlaye oco a ece olonumbi koviluvo vikuavo vio kilu.

Citava okuti, Yesu wa talavayavo Ndakapitiya ka Suku ale “Ndaka” oco a sapele lomanu. Eci Suku a enda oku eca olonumbi ku Adama la Eva vocumbo Cedene, citava okuti oco Suku a linga pocakati ca Yesu. (Efetikilo 2:16, 17) Citava okuti Yesu eye wa kala ungelo wa songuila va Isareli vekalasoko, kuenda citava okuti eye wa kala ocinyi ccina va Isareli va sukilile oku pokola. — Etundilo 23:20-23.a