Job
42 Job da kpahen kẹ Jihova:
2 “Asaọkiephana me rhe riẹn re nẹ wo se ru kemu kemu,
Nẹ o vwo orọnvwọn vuọvo ro rhe we ẹwẹn rọ cha bẹn wẹ eruoo.
3 Wọ tare nẹ, ‘Ọnana ono yen rhurhu uchebro mẹ jẹ o vwo erianriẹẹn?’
Ọtiọyena me da ta ota, ẹkẹvuọvo ababọ rẹ ẹruọ
Rẹ erọnvwọn ri gbe vwe unu mamọ, re me jẹ riẹn.
4 Wọ tare nẹ, ‘Biko kerhọ rere me ta ota.
Me cha nọ wẹ enọ rere wọ kpahen kẹ vwẹ.’
5 Erhọ mẹ nyo kpahen owẹ jovwo re,
Ẹkẹvuọvo asaọkiephana me vwẹ ẹro mẹ vwọ mrẹ wẹ re.
6 Kọyensorọ mi vwo si ota mẹ reyọ,
Mi ji kurhẹriẹ vwẹ ekpẹn vẹ iwurhie.”
7 Jihova vwọ ta eta nana kẹ Job nu, Jihova da ta kẹ Ẹlifaz ohwo ri Timan:
“Ophu mẹ tua kpahen owẹ vẹ igbeyan wẹn ivẹ na, kidie ovwan ta uyota kpahen ovwẹ kirobo rẹ odibo mẹ Job ruruu. 8 Asaọkiephana ovwan reyọ erhuẹn ighwrẹn kugbe egbon ighwrẹn bru odibo mẹ Job ra, rere ovwan ze izobo rẹ ẹtorhẹ vwọ kẹ oma rẹ ovwan. Odibo mẹ Job cha nẹrhovwo kẹ ovwan. Vwọrẹ imuẹro, mi che rhiabọreyọ oyare rọyen* mi vwo jẹ ovwan eruo vwo nene oborẹ ughẹnghẹn rẹ ovwan hepha, kidie ovwan ta uyota kpahen ovwẹ kirobo rẹ odibo mẹ Job ruruu.”
9 Ọtiọyena Ẹlifaz ohwo ri Timan, Bildad ohwo ri Shua, kugbe Zofa ohwo ri Neamat da yanran re ru oborẹ Jihova vuẹ ayen nẹ ayen ru na. Jihova de nyo ẹrhovwo ri Job.
10 Job vwọ nẹrhovwo kẹ igbeyan rọyen na nu, Jihova de si ukpokpogho rọyen no je vwẹ efe rọyen kẹ rhivwin. Jihova kẹ rẹ asakuivẹ* rẹ obo ro vwori jovwo. 11 Iniọvo rọyen eshare vẹ e rẹ eya eje kugbe igbeyan rọyen eje ri jovwo de bro rhe, ayen de nene riemu vwẹ uwevwin rọyen. Ayen nenire vwerhe oma je vwẹ uchebro kẹ fikirẹ okpetu na eje rẹ Jihova vwẹ uphẹn kẹ nẹ i te oma. Ayen ohwo ọvuọvo kẹ rẹ igho kugbe ubiosa rẹ oro.
12 Ọtiọyena Jihova de bruba ukuko rẹ akpeyeren ri Job vwọ vrẹ ọtonphiyọ rọyen, Job de rhi vwo igodẹ 14,000, ikamẹl 6,000, erhuẹn ivivẹ 1,000,* kugbe ekẹkẹtẹ rẹ eya 1,000. 13 O de ji rhi vwo emeshare ighwrẹn efa kugbe emetẹ erha efa. 14 O de se ọmọtẹ rẹsosuọ na Jimaima, ọrivẹ Kezaya, ọrerha na Karẹn-hapọk. 15 O vwo ọmọtẹ vuọvo vwẹ otọ na eje ro vwo erhuvwu te emetẹ ri Job naa, ọsẹ rayen je ghare uku kẹ ayen vẹ iniọvo rayen rẹ emeshare.
16 Ọnana vwọ wan nu, Job da dia te ẹgbukpe 140, ọ mrẹ emọ rọyen vẹ ivwrọmọ rọyen—uvwiẹ ẹne. 17 Ukuotọ rọyen Job de ghwu ro vwo yeren omamọ rẹ akpọ ọke grongron nu.*