Orọnvwọn ọvo re se yono vwo nẹ orharhe rẹ orhiẹn rẹOvie Joash yẹn e vwo mu omamọ rẹ igbeyan re cha nẹrhẹ avwanre vwo omamọ rẹ uruemu—igbeyan ri vwo ẹguọnọ ri Jihova re je guọnọ ru obo re vwerhọn oma. Ọ dia ihwo rẹ avwanre vẹ ayen gba hẹ edje ọvo yẹn o fori nẹ e vwo mu igbeya-an. Karophiyọ nẹ, Joash omotete dibi dibi vwọ kẹ ugbeyan rọyen Jehoiada. Vwọ kpahen igbeyan ru wo vwori, nọ oma wẹn: ‘Ayen vwẹ ukẹcha kẹ vwẹ vwo ruẹ esegbuyota ri mi vwo kpahen Jihova ganphiyọ? Ayen jiro kẹ vwẹ nẹ mi yeren akpọ nene iwan rẹ Ọghẹnẹ? Ayen ta ota kpahen Jihova vẹ uyota eghanghanre rọyen? Ayen muọghọ kẹ iwan rẹ Ọghẹnẹ? Obo re me guọnọ nyo ọvọ yen ayen vuẹ vwẹ, gbanẹ ayen fiudugberẹ vuẹ vwẹ asan re me da yan chọ?’ (Isẹ 27:5, 6, 17) Vwọrẹ uyota, igbeyan wẹn rhe vwo ẹguọnọ ri Jihova-a, o fori nẹ wọ yan jẹ ayen vwo. Ẹkẹvuọvo wo de vwo igbeyan ri vwo ẹguọnọ ri Jihova, tinkamu ayen—ayen cha vwẹ ukẹcha kẹ wẹ!—Isẹ 13:20. w23.09 9-10 ¶6-7

Ota na alfa yen ton ibiẹbe ri Grik na phiyọ, ota na omẹga de rhe kuophiyọ. Rọ vwọ tanẹ ọyen yen “Alfa kugbe Omẹga na,” Jihova jẹ avwanre riẹn nẹ ọyen da ton orọnvwọn phiyọ, o che ruo re. Jihova vwọ ma Adam vẹ Ivi nu, Ọ da ta kẹ ayen: We vwiẹ ri we bun phihọ, re wa vọn akpọ na, ru we phio kparobọ.” (Jẹ 1:28) Rọ ghwa vwọ ta oborẹ ọhọre rọyen mudiaphiyọ ẹsosuọ, ọ ghwa họhọ nẹ ọ tanẹ ọ yehẹ “Alfa” na. Ọke cha rẹ emọ rẹ Adam vẹ Ivi ri nyẹme re je dia ihwo re gbare cha vwọ vọn otọrakpọ na ji ruo hirhephiyọ iparadaisi. Ọke yena de rhi te re, ko che ghwe mudiaphiyọ nẹ Jihova tanẹ ọ yehẹ “Omẹga” na. Rọ vwọ ma erọnvwọn rehẹ “odjuvwu vẹ akpọ kugbe obo re vọnrọ ejobi” nu, Jihova da vwẹ imuẹro phia nẹ o vwo emu vuọvo rọ cha dobọ rọyen ji ro vwo jẹ ọhọre rọyen eruo gba kẹ emọ rẹ ihworakpọ kugbe otọrakpọ na-a. O che ru ọhọre eje gba vwẹ oba rẹ ẹdẹ ighwrẹn na.—Jẹ 2:1-3. w23.11 5 ¶13-14

Oyan ọgangan ro nẹ Babilọn kpo Izrẹl na sa reyọ emeranvwe ẹne soso, ẹkẹvuọvo Jihova veri nẹ ọyen che si kemu kemu rọ sa dia ekprowọ kẹ ayen no vwẹ oyan na. Vwọ kẹ ihwo ri Ju re fuevun, erere rẹ ayen cha mrẹ siẹrẹ ayen de rhivwin kpo Izrẹl rho vrẹ kemu kemu rẹ ayen cha yan jovwo. Ebruphiyọ rọ marho yen ẹga rẹ ayen cha vwọ kẹ Jihova. Uwevwin rẹ ẹga ri Jihova vuọvo hẹ evunrẹ Babilọni-i. O vwo agbada vuọvo rẹ emọ rẹ Izrẹl de se ze izobo kirobo rẹ Urhi ri Mosis tare-e, o ji vwo irherẹn vuọvo re vwo mu ri che mudia ze izobo na-a. Vwọba, egedjọ rehẹ ẹkuotọ na, ri muọghọ kẹ Jihova-a re je yan nene iwan rọye-en, bun vrẹ idibo ri Jihova dibidibi. Ọtiọyena ihwo ri Ju buebun ri vwo oshọẹdjẹ rẹ Ọghẹne—rhẹro rẹ ọke rẹ ayen che vwo rhivwin kpo ẹkuotọ rayen rhoma ra vwẹ ẹga rẹ uyota vwo mu. w23.05 14-15 ¶3-4