Génesi

28 Alora Isache el ga ciamà Giacò, lo ga benedio e el ghe ga comandà: “No stà maridarte con gnanca una dele done che le ze de Canaan. 2 Va a Padan-Aran, la casa de Betuel, pare de to mare, e lì marìdate con una dele fiole de Labon, fradel de to mare. 3 El Dio Tuto Poderoso ndarà benedirte e te farà gaver fioi e tanti dissendenti. E l’è sicuro che tanti pòpoli i vegnarà de ti. 4 E lu el darà a ti e ala to dissendensa la benedission de Abraon. Cossita, te gavarè la tera ndove te sì drio viver come straniero, la tera che Dio el ga dato a Abraon.” 5 Alora, Isache el ga assà che Giacò el ndesse via. Giacò l’è ndà a Padan-Aran, ndove l’era de star Labon, fiol de Betuel, el arameo. Lu l’era so fradel de Rebeca, che la era so mare de Giacò e de Esaù. 10 E Giacò l’è ndato via de Berseba e l’è ndato a Aran. 11 Nela strada, el ga parecià un posto par passar lì la note, parché el sol l’era belche ndato do. El ga ciapà un sasso in quel posto e el se ga butà do col sasso soto la testa. 12 E lu el se ga insognà. El ga visto una scala che la scominsiea nela tera e la rivea fin el cielo. I àngeli de Dio i ndea su e do par questa scala. 13 E varda, Geovà l’era là su e el disea: “Mi son Geovà, el Dio de Abraon, to pare, e el Dio de Isache. La tera ndove che te sì butà do la darò a ti e ala to dissendensa. 17 Lu el ga bio paura e el ga dito: “Questo posto el fà gaver rispeto! Sol pol esser la casa de Dio e la porta del cielo.”