Levìtico

16 Geovà el ga parlà a Moisè dopo dela morte dei due fioi de Aron che i ze morti parché i ze rivadi darente de Geovà. 2 Geovà el ga dito a Moisè: “Dighe a to fradel Aron che lu no’l ga de ndar rento el posto santo a qualche ora, par de drio dela coltrina, davanti el quèrcio che l’è sora la Arca, senò lu el va morir, parché mi vao vegner nte una nùvola par sora del quèrcio. 3 “Questo l’è quel che Aron el ga de portar quando che el va rento el posto santo. Lu el ga de portar un vedel come oferta par el pecato e un multon come oferta brusada. 4 E Aron el ga de lavarse nela àqua e meter su le veste sante. Lu el ga de meter su la longa veste santa de lin, e le budande de lin le ga de querzer el so corpo. Lu el ga de ligar la fassa de lin nela sintura e el turbante de lin nela testa. 5 “Lu el ga de ciapar dela assemblea de Israel due cavreti come oferta par el pecato e un multon come oferta brusada. 6 “E Aron el darà la oferta del vedel par i so propi pecati, e lu el domandarà el perdon par i so propi pecati e par i pecati dela so fameia. 7 “Alora lu el ciaparà i due bechi e li meterà davanti de Geovà, nela entrada dela tenda de riunion. 8 Aron el ndarà tirar la sorte sora i due bechi. Un sarà par Geovà e quel altro el sarà par Azazel. 9 Aron el farà la oferta par el pecato col beco che l’è stà scoliesto cola sorte par Geovà e lu lo darà come oferta par el pecato. 10 Invesse, el beco che l’è stà scoliesto par meso dela sorte par Azazel el ga de esser portà vivo davanti de Geovà par domandar el perdon dei pecati sora lu, cossita, se podarà mandarlo via al deserto, par Azazel. 11 “Aron el darà la oferta del vedel par i so propi pecati, e lu el domandarà el perdon par i so propi pecati e par i pecati dela so fameia. Alora, lu el coparà el vedel dela oferta par i so propi pecati. 12 “Alora, lu el ciaparà el porta insenso pien de bronse che le ze state ciapade del altar, che l’è davanti de Geovà, e due sbranche de insenso profumà in polver, e li portarà par de drio dela coltrina. 13 Lu el meterà el insenso sora le bronse davanti de Geovà, e la nùvola del insenso la sarà sora el quèrcio dela Arca del Testimònio. Cossita lu no’l ndarà morir. 14 “E lu el ciaparà un poco del sangue del vedel e lo sgossarà col deo davanti el quèrcio, nela banda leste. Col so deo, lu el sgossarà un poco del sangue sete volte davanti el quèrcio. 15 “Alora, lu el coparà el cavreto dela oferta par el pecato del pòpolo. Lu el portarà el so sangue par de drio dela coltrina e el farà col sangue la medèsima roba che el ga fato col sangue del vedel. Lu el ga de sgossarlo davanti el quèrcio. 16 “Lu el gavarà de far una oferta par el posto santo par causa dela impuressa dei israeliti e par causa dei so sbali e dei so pecati. Questo l’è quel che lu el ga de far par la tenda de riunion, che la ze in meso de lori, intrà le impuresse che lori i ga fato. 17 “Nissun altro el ga de esser nela tenda de riunion dela ora che lu el va rento par far la oferta par el so pecato nel posto santo fin la ora che lu el va via. Lu el ga de far la oferta par el so pròpio pecato, par i pecati dela so fameia e par tuta la congregassion de Israel. 20 “Quando el finirà de purificar el posto santo, la tenda de riunion e el altar, Aron el darà el beco vivo come oferta. 21 Aron el meterà le man sora la testa del beco vivo e el ndarà confessar sora de lu tuti i sbali dei israeliti, tute le so robe sbaliade e tuti i so pecati. Lu el ndarà meterli sora la testa del beco. E, par meso de un omo scoliesto, el ndarà mandar via el beco par el deserto. 22 El beco el portarà sora de lu tuti i pecati de lori nte una region che no ghen’è persone. E el beco el sarà mandà via par el deserto.