Ati dei Apòstoli

25 Tre giorni dopo de esser rivà nela provinsia e de gaver ciapà un posto de star, Festo l’è ndà de Cesarea a Gerusalen. 2 I sasserdoti prinsipai e i òmini pi importanti intrà i giudei i ghe ga dito le acusassion contra Paolo. Dopo i ghe ga domandà 3 de mandar Paolo a Gerusalen. Lori i gavea fato una cospirassion par scondersi e copar Paolo nela strada. 4 Sol che Festo el ga rispondesto che Paolo gavea de seitar in preson in Cesarea, e che anca lu el tornaria presto là. 5 “Alora quei che i ga autorità intrà de valtri,” lu el ga dito, “vegné con mi e fé le acusassion contra de lu, se l’è vero che questo omo el ga fato qualcossa de sbalià.” 6 Dopo de esser restà con lori intorno de oto o diese giorni, lu l’è ndà a Cesarea. El giorno dopo, lu el se ga sentà in tribunal e el ga mandà che i menasse Paolo lì. 7 Quando Paolo l’è rivà, i giudei che i era vegnesti de Gerusalen i se ga metesti tuti intorno de lu, e i ga dito contra de lu tante acusassion serie che no i era mia boni provar. 8 Ma Paolo el ga dito in so difesa: “No go mia fato gnanca un pecato contra la Lege dei giudei gnanca contra el témpio gnanca contra Cesar.” 9 Festo, che el volea la aprovassion dei giudei, el ga rispondesto a Paolo: “Vuto ndar a Gerusalen e esser giudicà là sora queste cose?” 10 Ma Paolo el ga dito: “Mi son davanti del tribunal de Cesar, ndove go de esser giudicà. No go fato gnente de mal ai giudei, roba che ti te sì drio veder pròpio ben. 11 Se mi son pròpio un criminoso e go fato qualcossa che mi mèrito la morte, no me ricuso mia a morir; ma se le acusassion che questi òmini i ze drio far contra de mi no le ze mia vere, nissuni ga el dirito de darme in man a lori sol par gaver la so aprovassion. Mi apelo a Cesar!” 12 Alora Festo, dopo de gaver parlà cola assemblea dei consilieri, el ga rispondesto: “Ti te ghè apelà a Cesar; a Cesar te vè.”