Nùmeri

11 Alora Balache el ga dito a Balaon: “Cossa gheto fato contra mi? Te go menà qua par maledir i me nemighi, ma ti te li ghè benedidi.” 12 E lu el ga dito: “Sarà che mi no go de dir tute le parole che Geovà el mete nela me boca?” 13 Balache el ghe ga dito: “Par favor, vien insieme de mi a nantro posto ndove te podarè vederli. Lì te vederè sol arquanti de lori, nò tuto el pòpolo. E lì te ghè de maledirli par mi.” 14 Cossita, Balache lo ga menà nel campo del Zofin nel Monte Pisga. Lu el ga fato su sete altari ndove el ga dato come oferta un toro e un multon in cada altar. 15 Alora, Balaon el ga dito a Balache: “Resta qua cola to oferta brusada intanto che vao lì parlar con Lu.” 16 E Geovà el ga parlà con Balaon e el ga metesto queste parole nela so boca: “Torna a Balache e l’è questo che te ghè de dir.” 17 Cossita, lu l’è tornà fin Balache che l’era cola so oferta brusada insieme coi prìnsipi de Moabe. Balache el ghe ga domandà: “Cossa che Geovà el ga dito?” 18 Lu el ga rispondesto con questo poema: “Leva su Balache e scolta. Scóltame, fiol de Zipor. 19 Dio no l’è un omo che el dise busie, no l’è un fiol de un omo che el càmbia de idea. Quando lu el dise qualcossa, lu no la farà? Quando lu el parla, lu no la realisarà? 20 Varda, son stà ciamà par benedir. Lu el ga benedio, e no posso mia cambiar questo. 21 Lu no’l assa che nissuni i fae magia contra Giacò, gnanca el assa che vegna desgràssia sora Israel. Geovà, so Dio, l’è con lori, e par lori lu l’è el so rè. 22 Dio li ga fati ndar fora del Egito. Lu l’è par lori come i corni de un toro cativo. 23 Parché no ghen’è bruti segnai contra Giacò, gnanca indovinassion contra Israel. Adesso se pol dir sora Giacò e Israel: ‘Vardé cossa che Dio el ga fato!’ 24 Questo pòpolo el se levarà su come un leon, e come un leon el se alsarà su. No’l va butarse do vanti de magnar quel che el ga cassà e de bever el sangue de quei che i ze stati copadi.” 25 Alora Balache el ghe ga dito a Balaon: “Se no te sì bon de maledirlo, no te ghè gnanca de benedirlo.” 26 Balaon el ga rispondesto a Balache: “Te gonti mia dito che mi faria tuto quel che Geovà el me gavea dito?”