Apocalisse

7 Dopo questo go visto quatro àngeli in pié nei quatro cantoni dela tera che i tegnea forte i quatro venti dela tera, cossita che gnanca un vento el podesse sufiar sora la tera gnanca sora el mar gnanca sora le piante. 2 E go visto nantro àngelo vegner su del leste, e el gavea un selo del Dio che el vive. Lu el ga osà con voce alta par i quatro àngeli che i gavea ricevesto el poder par far dano ala tera e al mar: 3 “No sté far dano ala tera gnanca al mar gnanca ale piante, fin che metemo el selo nel viso dei schiavi del nostro Dio.” 4 E mi go sentio el nùmero de quei che i ga ricevesto el selo: 144.000. Lori i era de tute le tribo dei fioi de Israel: 5 dela tribo de Giudà, 12.000 i ga ricevesto el selo; dela tribo de Ruben, 12.000; dela tribo de Gade, 12.000; 6 dela tribo de Aser, 12.000; dela tribo de Naftali, 12.000; dela tribo de Manassè, 12.000; 7 dela tribo de Simeon, 12.000; dela tribo de Levi, 12.000; dela tribo de Issacar, 12.000; 8 dela tribo de Zebulon, 12.000; dela tribo de Giusepe, 12.000; dela tribo de Bengiamin, 12.000 che i ga ricevesto el selo. 9 Dopo de questo, go visto una mùcia de gente, che gnanca un omo el podea contar, de tute le nassion, tribo, pòpoli e léngue. Lori i era in pié davanti del trono e davanti del Piegoreto, vestidi de longhe robe bianche, e ghen’era rami de palmere nele so man. 10 E i osea con alta voce: “La salvassion la vien del nostro Dio che l’è sentà nel trono, e del Piegoreto.” 11 Tuti i àngeli i era in pié intorno del trono, dei ansiani e dei quatro cherubini; e lori i se ga indenocià cola fàcia in tera davanti del trono e i ga adorà a Dio, 12 disendo: “Amen! Che el nostro Dio el riceva el lode, la glòria, la sabedoria, el ringrassiamento, el onor, el poder e la forsa par sempre. Amen.” 13 Alora, un dei ansiani el me ga dito: “Chi che i ze questi che i ze vestidi de longhe robe bianche e de ndove i ze vegnesti?” 14 Mi go dito suito cossita: “Me signor, te sì ti che te sè.” E lu el me ga dito: “Questi i ze quei che i vien fora dela granda tribolassion, e i ga lavà le so longhe robe e le ga fate vegner bianche nel sangue del Piegoreto. 15 L’è par questo che i ze davanti del trono de Dio, e i lo serve giorno e note nel so témpio. Quel che l’è sentà nel trono el ndarà stirar la so tenda sora lori. 16 No i gavarà mia pi fame gnanca sen, gnanca el sol gnanca el caldo che brusa no i ghe farà dano. 17 Parché el Piegoreto, che l’è in meso del trono, li tenderà e li guidarà ale fontane dela àqua dela vita. E Dio sugarà tute le làgrime dei soi òci.”