1 Samuel

2 Alora, Saul el ga scoliesto 3 mila òmini intrà i soldadi de Israel. Dopo, l’è ndà do con lori al deserto de Zife par ndar in serca de Davi. 3 Saul el se ga fermà par acampar nel montesel de Aquilà, che l’è drio la strada davanti de Gesimon. Davi l’era de star nel deserto e el ga sentio dir che Saul l’era vegnesto drio lu nel deserto. 4 Par quela, Davi el ga mandà arquanti òmini par veder se Saul l’era pròpio vegnesto. 5 Pi tardi, Davi l’è ndà al posto che Saul el se gavea fermà par acampar. E lu el ga visto ndove Saul e Abner, el paron del esèrsito, i era drio dormir. Saul l’era drio dormir in meso del acampamento, e i soldadi i era tuti intorno de lu. 6 Alora, Davi el ga domandà a Aimeleche, el itita, e a Abisai, fiol de Zeruia e fradel de Gioabe: “Chi che el ndarà con mi fin Saul?” Abisai el ga rispondesto: “Mi vao con ti.” 7 Cossita, Davi e Abisai i ze ndati de note ndove i soldadi i era e i ga catà Saul. Lu l’era drio dormir e la so lansa la era impiantada nela tera darente dela so testa. Abner e i soldadi i era butadi do intorno de lu. 8 Alora, Abisai el ga dito a Davi: “Ancoi Dio el te ga assà far quel che te vol col to nemigo. E adesso, àssame inciodarlo in tera cola lansa. Lo farò nte un colpo sol e no ghen ocorerà nantro.” 9 Ma Davi el ga dito a Abisai: “No stà farghe mal, parché chi che pol far qualcossa contra quel che Geovà el ga scoliesto e restar sensa colpa?” 10 Davi anca el ga dito: “Cossita come Geovà el vive, son sicuro che Geovà lo coparà, o vegnarà el di che el ndarà morir, o anca el ndarà ala batàlia e el sarà copà. 11 Par rispeto a Geovà, mi mai faria mal al omo che Geovà el ga scoliesto! Par quela, ciapemo adesso la lansa e el giaro de àqua che i ze darente dela so testa e ndemo via.” 12 Cossita, Davi el ga ciapà la lansa e el giaro de àqua che i era darente dela testa de Saul, e lori i ze ndati via. Nissuni i li ga visti gnanca i se ga nicorti de gnente. Tuti i era drio dormir e nissuni i se ga desmissià, parchè Geovà li gavea fato dormir un sono profondo.