Ebrei

11 La fede la ze la forte confiansa de che se realisarà quel che se speta. La ze la prova sicura che le robe le ze vere anca se no se le vede. 2 Par via dela fede, i òmini dei tempi antighi i ga visto che i ga bio la aprovassion de Dio. 3 Par via dela fede, capimo che i sistemi de robe i ze stà metesti in òrdine par meso dela parola de Dio, cossita che Dio el ga doperà robe che no se pol veder par far robe che se pol veder. 4 Par via dela fede, Abel el ga oferessesto a Dio un sacrifìssio de valor pi grando de quel de Cain. Par meso de questa fede Dio lo ga considerà giusto parché Dio el ga aprovà le so oferte. E, anca se l’è morto, la so fede la seita a insegnarne. 5 Par via dela fede, Enoche l’è stà trasferio, cossita no’l ga mia visto la morte, e no l’è stà pi catà parché Dio lo ga trasferio. Parché, prima che el fusse transferio, el ga savesto che el gavea la aprovassion de Dio. 6 Sensa fede no se pol contentar a Dio. Parché quei che i riva darente de lu i ga de creder che lu el esiste e che el ricompensa quei che i fà sforso par ndar in serca de lu. 7 Par via dela fede, Noè, dopo de gaver ricevesto aviso de Dio dele robe che ancora no se le vedea, el ga bio tanto rispeto par Dio e el ga fato su una arca par la salvassion dela so fameia. E par meso de questa fede, lu el ga condanà el mondo e lu l’è stà considerà giusto par via dela so fede. 8 Par via dela fede, Abraon, quando che Dio lo ga ciamà, lu el ga obedio e l’è ndà par un posto che el riceveria come eransa; lu l’è partio sensa saver ndove che l’era drio ndar. 9 Par via dela fede, lu el ga vivesto nela tera dela promessa nte un paese straniero, e el ga vivesto in tende con Isache e Giacò, che anca lori i gavea eredità la medèsima promessa. 10 Parché lu el spetea la cità che la ga una vera fondassion, che Dio el ga progetà e che Dio la ga fata. 11 Anca par via dela fede, Sara la ze restada gràvida anca se no la gavea pi la età par gaver fioi, parché la credea che Quel che el ghe gavea fato la promessa l’era fedele. 12 Par quela, un sol omo, che no’l gavea pi la capassità de gaver fioi par causa dela so età, el ga bio tanti fioi come le stele del cielo e tanti quanti i grani dela areia del mar. 13 Tuti lori i ga bio fede fin la so morte, anca se le promesse no le se ga realisade nei so giorni. Ma i le ga viste de lontan e le ga acetade con alegria. I ga dito a tuti che lori i era stranieri e che i era de star in quela tera par poco tempo. 14 Quei che i parla cossita i dimostra che i ze in serca, de maniera sèria, de un posto par lori. 15 Infati, se i gavesse seità pensar nel posto de ndove che i ze partidi, lori i gavaria bio la oportunità de tornar. 16 Ma adesso i va in serca de un posto meio, o sìa, de un posto che l’è relassionà col cielo. Alora, Dio no’l se invergogna de lori, de esser ciamà el so Dio, parché Dio el ga parecià par lori una cità. 19 Ma lu el ga capio che Dio el saria bon de ressussitar Isache, e lo ga ricevesto dela morte come segnal de qualcossa pi granda. 24 Par via dela fede, dopo grando, no’l ga mia volesto esser ciamà de fiol dela fiola del Faraò, 25 e el ga scoliesto esser maltratà insieme el pòpolo de Dio invesse de goder i piaseri del pecato par un tempo. 26 Parché el catea el disonor del Cristo una granda richessa, meio che i tesori del Egito. Si, el vardea atento par el pagamento dela ricompensa. 27 Par via dela fede, Moisè el ga assà el Egito, sensa gaver paura dela ràbia del rè, parché el se mantegnea firme come se el vedesse Quel che no se pol mia veder. 29 Par via dela fede el pòpolo el ga passà par el mar Rosso come se el fusse in tera suta. Ma quando i egìpsi i ga proà passar anca lori, el mar li ga mandadi do. 31 Par via dela fede, Raabe, la prostituta, no la ze mia morta insieme de quei che i ze stati desobedienti, parché la ga ricevesto i spioni de maniera passìfica. 32 Cossa che posso dir ancora? Me mancaria tempo se mi parlesse anca sora Gideon, Barache, Sanson, Geftè, Davi, Samuel e i altri profeti. 33 Par via dela fede, lori i ga vinsesto regni, i ga stabilio la giustìssia, i ga ricevesto le promesse, i ga sarà la boca dei leoni, 34 i ga fermà la forsa del fogo, i ga scampà via de esser copadi par meso dela spada, quando i era fiachi i se ga fati forti, i ze deventàdi poderosi nela guera, i ga vinsesto i esèrsiti dei nemighi. 35 I parenti de arquante done i ze stati ressussitadi, ma arquanti òmini i ze stati torturadi parché no i ga acetà de esser liberadi, cossita lori i podea gaver una ressuression meio. 36 E altri i ze stati provadi quando i ze stati tolti in giro e i ga ciapà scùrie, infati, lori i ze stati anca incadenadi e metesti in preson. 37 Arquanti i ghe dea sassade, lori i ze stati provadi, taiadi in due, i ze stati copadi cola spada, i era vestidi con pel de piégore e de cavre, i era massa poareti, i tribolea, i era maltratadi; 38 e el mondo no li meritea. Lori i ndea par el deserto, i monti, le caverne e le grute dela tera.