Ebrei

5 Cada somo sasserdote che l’è stà scoliesto intrà i òmini l’è designà par servir a Dio a favor dei òmini, par ofrir doni e sacrifissi par i pecati. 2 Lu l’è bon de tratar con compassion quei che i fà pecati par ignoransa parché anca lu el ga de infrontar le so fiachesse, 3 e l’è par questo che lu el ga de ofrir sacrifissi par i so pecati compagno a come che el fà par i pecati del pòpolo. 4 Nissun el se dà a si stesso questo onor, ma el riceve el onor quando che Dio lo scòlie, compagno a come che el ga sucedesto con Aron. 5 Cossita, gnanca el Cristo el ga dato glòria a lu stesso, no’l se ga mia designà somo sasserdote, ma lu el ga ricevesto glòria de Quel che el ghe ga dito: “Ti te sì el me fiol; ancoi mi son deventà to pare.” 6 Nte nantro posto l’è scrito: “Ti te sì sasserdote par sempre ala maniera de Melchisedeche.” 7 Durante la so vita nela tera, l’è stà con voce forte e con làgrime che Cristo el ga domandà e el ga suplicà a Quel che el podea salvarlo dela morte. E, par via del so temor, Dio lo ga scoltà. 8 Anca se l’era fiol, lu el ga imparà a esser obediente par via de quel che el ga sofrio. 9 E, dopo esser stà fato perfeto, lu l’è deventà quel che dà la salvassion eterna a tuti quei che i obedisse a lu, 10 parché Dio lo ga designà somo sasserdote ala maniera de Melchisedeche. 11 Noantri ghemo tante robe de dir sora lu, ma no l’è mia fàcile spiegarle, parché valtri sì deventadi duri de récie. 12 Romai, valtri gavarìssi de esser istrutori, ma invesse valtri gavé bisogno che qualchedun el ve insegne i insegnamenti bàsichi del messàgio sacro de Dio, e sì tornà a gaver bisogno de late invesse del magnar sòlido. 13 Ma tuti quei che i continua a bever late no i cognosse la parola dela giustìssia, parché i ze bambini. 14 Ma el alimento sòlido l’è par le persone maure, par quei che i ga le so capassità de dissernimento trenade par meso dela pràtica par saver la difarensa tanto del giusto come del sbalià.