Génesi

2 Cossita i ze stati fati el cielo, la tera e tuto quel che ghen’è lì. 2 Nel sètimo giorno, Dio el gavea finio de far tuto el so laoro. E nel sètimo giorno Dio el ga scominsià a riposar dopo tuto quel che el gavea fato. 3 Dio el ga benedio el sètimo giorno e el ga dito che el saria sacro, parché l’è in questo giorno che Dio l’è drio riposar dopo che el ga creà tuto de acordo con quel che el volea far. 9 Alora Geovà Dio el ga fato cresser dela tera tuti i tipi de bele piante e con fruti boni de magnar. E anca el ga fato cresser la pianta dela vita in meso del giardin e la pianta dela cognossensa del ben e del mal. 15 Geovà el ga metesto el omo nel Giardin del Èden, par ténderlo e par coltivarlo. 16 Geovà Dio el ga dato al omo anca questa òrdine: “De tute le piante del giardin te pol magnar quanto che te vol. 17 Ma el fruto dela pianta dela cognossensa del ben e del mal, no stà mia magnarlo, parché nel giorno che te lo magni, sicuro che te ndarè morir.” 18 Alora Geovà el ga dito: “L’è mia bon che el omo el reste lu sol. Vao far una che lo giute, come compagnera par lu.” 21 Alora, Geovà Dio el ga fato el omo dormir un sono profondo. Intanto che el dormia, el ghe ga tirà via una costela e dopo el ga serà la carne. 22 E, dela costela che el ga tirà via del omo, Geovà Dio el ga fato la dona e la ga menada al omo. 23 Alora el omo el ga dito: “Questa la ze par fin osso dei me ossi e carne dela me carne. Questa la sarà ciamada ‘dona’, Parqué del omo la ze stata tirada.” 24 Par quela el omo el assarà el so pare e la so mare, e el se unirà ala so sposa, e i due i deventarà una sol carne.