Ati dei Apòstoli

27 Alora, lori li ga menadi e li ga metesti davanti del Sinèdrio. El somo sasserdote ghe ga domandà: 28 “Noantri ve ghemo dato el comandamento de no parlar in nome de questo omo. Ma eco, valtri gavé insegnà par tuta la Gerusalen e volé pròpio che ricevemo la colpa par causa dela morte de questo omo.” 29 Piero e i altri apòstoli i ga rispondesto: “Gavemo de obedir a Dio come governante, e nò ai òmini. 30 El Dio dei nostri antenati el ga ressussità Gesù, quel che valtri gavé copà e picà su nte un pal. 31 Dio lo ga metesto ala so drita come Lìder Prinsipal e Salvador, par el pòpolo de Israel ciamarse gramo e par el perdon dei pecati. 32 Noantri semo testimònie de queste robe. Anca el spìrito santo, che Dio el ga dato a quei che i lo obedisse come governante, l’è testimònia.” 33 Quando i ga scoltà questo, i se ga inrabià e i ga volesto coparli. 34 Alora, Gamaliel se ga levà su nel Sinèdrio. Lu l’era un fariseo, maestro dela Lege, che el gavea el rispeto de tuto el pòpolo, e el ga mandà che i òmini li menesse fora par un tempo. 35 E el ghe ga dito a lori: “Òmini de Israel, sté atenti con quel che valtri ndaré far a questi òmini. 36 Par esémpio, un tempo indrio ghen’era Teudas, che l’era un omo che el disea esser importante, e intorno de 400 òmini i ze ndati drio a lu. Ma lu l’è stà morto e tuti quei che i ghe ndea drio i ze stati spaliadi e no ga sucedesto gnente de quel che lu el volea far. 37 Dopo, nei giorni de far el registro, l’è vegnesto Giuda, el Galileo, e tanti i ze ndati drio a lu. Ma anca lu l’è morto e quei che i ghe ndea drio i ze stati spaliadi. 38 Alora, ve digo: No sté meterve con questi òmini, asseli star. Parché, se quel che lori i ga idea de far o el so laoro l’è una roba de òmini, no’l ndarà ben. 39 Ma, se la ze una roba de Dio, valtri no saré boni de fermarli. E òcio che pol esser che sì drio lotar contra Dio.” 40 Alora, i lo ga scoltà. Lori i ga ciamà i apòstoli, i ghe ga dato cola scùria, i ghe ga dito che no l’era pi par parlar nel nome de Gesù e li ga moladi. 41 E lori i ze ndati fora del Sinèdrio contenti parché i ze stati consideradi degni de sofrir par causa del so nome. 42 E tuti giorni, nel témpio e de casa in casa, lori i seitea sensa fermarse a insegnar e a predicar le bone notìssie sora el Cristo, Gesù.