Marco

17 Infati, Erode el gavea mandà ciapar Gioani e lo ga metesto in preson parché Erode el se gavea maridà cola dona de so fradel Filipe, Erodia. 18 Gioani el disea a Erode: “No te ghè el dirito de maridarte cola dona de to fradel.” 19 Par quela, Erodia la gavea tanta ràbia de lu e la volea coparlo, ma no la podea. 20 Erode el gavea temor de Gioani e lo protegea, parché el savea che l’era un omo giusto e santo. Tute le volte che lo scoltea, el restea maraveià, sensa saver cossa far, ma el gavea caro de scoltarlo. 30 I apòstoli i se ga riunio intorno de Gesù e i ghe ga dito tuto quel che i gavea fato e quel che i gavea insegnà. 31 E lu el ghe ga dito: “Vegné insieme, ndemo nte un posto par restar noantri soli e riposar un pochetin.” Parché ghen’era tante persone che le vegnea e le ndea, e lori no i gavea gnanca tempo par magnar qualcossa. 32 Par quela, i ze ndati de barco nte un posto par restar lori soli. 33 Ma le persone li ga visti ndar via, e tanti i ga savesto ndove lori i ndea. Alora, persone de tute le cità le ze ndate fin là a pié e le ze rivade prima de lori. 34 Ben, dopo che i ze ndati do del barco, lu el ga visto tante persone e ghe ga fato pecà de lore, parché le era come piégore sensa pastor. E el ga scominsià a insegnarghe tante cose. 35 Quando l’è deventà tardi, i dissìpoli i ze ndati darente de Gesù e i ghe ga dito: “No ghen’è gnente qua e romai l’è tardi. 36 Dighe che i vae via. Cossita i podarà comprar qualcossa de magnar in colónia e nei paeseti che ghen’è qua intorno.” 37 Lu el ghe ga dito: “Deghe valtri qualcossa de magnar.” Lori i ghe ga domandà: “Vuto che ndemo comprar pan par darghe de magnar ale persone? Gavarìssino de bisogno de 200 denari.” 38 Lu el ghe ga dito: “Quanti pan valtri gavé? Ndé veder!” Dopo che i ga vardà, i ghe ga dito: “Sinque pan e due pessi.” 39 E lu el ga mandà che tuti i se sentesse do spartidi in grupi nela grama verda. 40 Alora, le persone le se ga sentà do in grupi de sento e de sinquanta. 41 Lu el ga ciapà i sinque pan e i due pessi, el ga vardà su al cielo e el ga pregà. Dopo, el ga spartio i pan e li ga dati ai dissìpoli, cossita lori i podea dargheli ale persone. E el ga spartio i due pessi par tute le persone. 42 Cossita, tuti i ga magnà fin che ghe bastesse. 43 E i ga tolto su 12 seste piene de tochi de pan e dei pessi che i ga vansà. 44 I ze stati 5.000 òmini che i ga magnà i pan.