Romani

10 Fradei, mi vui de tuto cuor e sùplico a Dio che i israeliti i se salve. 2 Son sicuro che lori i vol piaserghe a Dio de verità, ma lori no i ga cognossensa giusta de lu. 3 Parché par via che lori no i cognosse la giustìssia de Dio, ma i vol dimostrar che lori i ze giusti dela so maniera, lori no i aceta la giustìssia de Dio. 4 Parché Cristo l’è el fin dela Lege. Par quela, tuti quei che i dimostra fede i pol esser consideradi giusti. 5 Moisè el ga scrito sora la giustìssia che vien dela lege: “Quei che i fà queste cose, i viverà gràssie a queste cose.” 6 Ma la giustìssia che la vien dela fede la dise: “No stà dir nel to cuor: ‘Chi che ndarà in cielo?’ o sia, chi che fà vegner do Gesù. 7 O ‘Chi che ndarà do nel abismo’? o sia, par far vegner su Cristo dei morti.” 8 Ma cossa che la dise? “La parola la ze darente de ti, la ze nela to boca e nel to cuor”, o sia “la parola” dela fede che noantri predichemo. 9 Parché se cola boca ti te disi publicamente che Gesù l’è Signor e col cuor ti te ghè fede che l’è stà ressussità dei morti, ti te sarè salvo. 10 Parché col cuor se ga fede par esser consideradi giusti, ma cola boca se fà declarassion pùblica par la salvassion. 11 La Scritura la dise: “Quel che el ga fede in lu no’l restarà disgustà.” 12 Parché no ghen’è difarensa intrà el giudeo e el greco. Tuti i ga el medèsimo Signor che l’è generoso con tuti quei che i lo ciama. 13 Parché “tuti quei che i invoca el nome de Geovà i sarà salvi”. 14 Ma come che i ndarà invocar se no i ga fede in lu? E come che i gavarà fede in lu se no i ga mai sentio parlar de lu? E come che i sentirà parlar de lu sensa qualchedun che ghe prediche? 15 E come che i predicarà se no i ze stati mandadi? Cossita come l’è scrito: “Che bei che i ze i pié de quei che i proclama le bone notìssie!” 16 Magari, gnanca tuti i ga obedio ale bone notìssie. Parché Isaia el dise: “Geovà, chi che ga bio fede in quel che ghemo parlà?” 17 Parché la fede la vien de quel che se scolta. E quel che se scolta el vien par meso dela parola sora Cristo.