Mateo

5 Quando Gesù el ga visto tuta quela gente, l’è ndà su al monte. Dopo che el se ga sentà do, i so dissìpoli i ze vegnesti fin lu, 2 “Quei che i sa che i ga bisogno de Dio i ze felici, parché el Regno de Dio che l’è in cielo l’è par lori. 3 “Quei che i sa che i ga bisogno de Dio i ze felici, parché el Regno de Dio che l’è in cielo l’è par lori. 4 “Quei che i piande i ze felici, parché i sarà consoladi. 5 “Quei che i ze mansi i ze felici, parché Dio ghe darà la tera. 6 “Quei che i vol tanto che ghen sìpia giustìssia i ze felici, parché Dio ghe farà gaver quel che i vol. 7 “Quei che i perdona i ze felici, parché lori i sarà perdonadi. 8 “Quei che i ga un cuor sinsiero i ze felici, parché i ndarà capir come Dio l’è. 9 “Quei che i fà la pace coi altri i ze felici, parché i sarà ciamadi de fioi de Dio. 10 “Quei che i sofre parché i fà el ben i ze felici, parché el Regno de Dio che l’è in cielo l’è par lori. 11 “Valtri sì felici quando le persone le ve dise su, le ve trata mal, le dise busie o robe brute contra valtri par causa de mi. 12 Resté pròpio contenti, parché Dio el ve darà una granda ricompensa. L’è stà cossita che quei che i ga portà el messàgio de Dio nel passà i ze stati perseghidi. 13 “In questo mondo, valtri sì come sal. Ma se el sal no’l ga pi gusto de gnente, come che el sarà salà nantra volta? No’l serve pi par gnente, ma i lo buta via e la gente ghe camina sora. 14 “Valtri sì come luce in questo mondo scuro. No se pol sconder una cità che la ze su el monte. 15 Quando le persone le impissa una làmpada, no la mete soto una sesta. Lore la mete sora una tola, e la luce la slusa sora tuti quei che i ze nela casa. 16 Anca valtri gavé de assar che la vostra luce la sluse. Cossita tuti i ndarà veder le robe bone che valtri fé e i ndarà lodar el vostro Pare che l’è in cielo. 17 “No sté pensar che son vegnesto par finir cola Lege e con quel che i profeti i ga dito. Invesse son vegnesto par far suceder quel che l’è scrito. 18 Sarà pi fàcile che el cielo e la tera i se finisse vanti de no suceder qualcossa che l’è nela Lege. 19 Alora, quei che desobedisse a un comandamento che le persone le pensa che no l’è mia importante e i ghe insegna ai altri a far compagno no i ndarà nel Regno del cielo, ma quei che i obedisse ala Lege e i insegna i altri a obedirla i ndarà nel Regno del cielo. 20 Parché mi ve digo che se no gavé de pi fede che i farisei e quei che i insegna la Lege, mai ndaré nel Regno del cielo. 21 “Valtri savé quel che l’è stà dito ai vostri antenati: ‘No stà copar, e quel che el copa el sarà giulgà nel tribunal.’ 22 Ma mi ve digo che quel che seita cativo col so fradel el sarà giulgà nel tribunal. E quel che el dise su a so fradel el sarà giulgà nel Supremo Tribunal. E quel che el dise a so fradel: ‘Te sì un inseminio!’ el sarà finio fora. 23 “Alora, se te sì drio portar un sacrifìssio a Dio e te te ricordi che un fradel l’è disgustà con ti, 24 assa lì el to sacrifìssio davanti al altar. Prima, te ghè de far pace col to fradel. Dopo, torna indrio par far el to sacrifìssio. 25 “Se te ghè un problema con qualchedun, fà presto risolverlo intanto che valtri sì drio ndar al tribunal. Senò, el podarà portarte davanti el giuis, e el giuis el podarà darte al guarda, e lu el te meterà in preson. 26 Alora, sicuro che no te sarè molà dela preson fin che no te paghi con tuti i to soldi. 27 “Valtri savé quel che l’è stà dito: ‘No stà tradir to omo o to dona.’ 28 Ma mi ve digo che quel che el seita vardar nantra dona con una voia sbaliada el ga belche tradio la so dona nel cuor. 29 Se el to òcio el te fà pecar, te ghè de cavarlo via e butarlo fora. Pitosto perder una parte del to corpo che tuto el to corpo esser destruto. 30 E se la to man la te fà pecar, te ghè de taiarla via e butarla fora. Pitosto perder una parte del to corpo che tuto el to corpo esser destruto. 31 “L’è stà anca dito: ‘Quel che el se divorsia dela so dona el ga de darghe el documento del divòrsio.’ 32 Ma mi ve digo che un omo no’l ga de divorsiarse dela so dona se ela no la ga fato imoralità sessual. Senò, pol esser che la se bute do con nantro omo, e anca questo omo el saria drio far imoralità sessual. 33 “Valtri savé anca quel che l’è stà dito ai vostri antenati: ‘No te ghè de prometer far qualcossa e dopo no far. Te ghè de far tuto quel che te ghè prometesto a Geovà.’ 34 Ma mi ve digo: No sté far gnanca un tipo de giuramento. No sté dir: ‘Giuro par el cielo’, parché là l’è el trono de Dio. 35 No sté gnanca dir: ‘Giuro par la tera’, parché Dio el mete i so pié sora ela. No sté dir: ‘Giuro par Gerusalen’, parché la ze la cità de Dio. 36 No sté dir: ‘Giuro par la me vita’, parché no te pol far deventar bianco o negro gnanca un fil dei to cavei. 37 Se te disi che te vè far una roba, te ghè de farla. Se te disi che no te vè mia far una roba, no te ghè de farla. Quando te prometi far robe che no te pol far, te sì drio far compagno el Diaol. 38 “Valtri savé quel che l’è stà dito: ‘Se qualchedun el fà mal al òcio de nantra persona, i ga de far mal al so pròpio òcio. Se qualchedun el spaca el dente de nantra persona, i ga de spacar el so pròpio dente.’ 39 Ma, mi ve digo: Se una persona rugna fà qualcossa contra ti, no stà darghe indrio. Se qualchedun te dà un sciafon nela to fàcia, te ghè de assar che el te dae nela altra banda dela fàcia. 40 E se qualchedun el vol portarte al tribunal par ciapar la to veste longa, assa che el te ciape anca el to manto. 41 E se qualchedun che ga autorità el te domanda de far qualcossa, te ghè de far de pi de quel che el te ga domandà. 42 Se qualchedun el te domanda qualcossa, te ghè de darghela. E se qualchedun el te domanda qualcossa in préstio, no stà dirghe de nò. 43 “Valtri savé quel che l’è stà dito: ‘Te ghè de amar el to pròssimo e odiar el to nemigo.’ 44 Ma mi ve digo: Seité a amar i vostri nemighi e pregar par quei che i ve trata mal. 45 Se fé cossita, saré drio far compagno el vostro Pare che l’è in cielo. Lu el fà el sol vegner su sora i rugni e sora i boni. E lu el fà piover sora i boni e sora i rugni. 46 Se valtri amé sol quei che i ve ama, caté che merité qualcossa? Anca quei che i tol su imposti i fà cossita. 47 E se valtri traté ben sol i vostri amighi, no sì drio far gnente de spessial. Anca le persone che no le cognosse a Dio le fà cossita. 48 Gavé de amar del tuto, come el vostro Pare in cielo el fà.