Luca
19 Alora, lu l’è ndà rento de Gericò e l’era drio passar par la cità. 2 Lì ghen’era un omo che el gavea nome Zacheo. Lu l’era paron de quei che i tolea su imposti e l’era sior. 3 Lu l’era drio proar veder chi che l’era Gesù, ma no l’era bon parché ghen’era tanta gente e parché lu l’era basseto. 4 Cossita, par vederlo, Zacheo l’è ndato avanti de carera e l’è ndà su par un tipo de figher, parché Gesù el ndaria passar lì. 5 Quando Gesù l’è rivà in quel posto, el ga vardà in su e el ghe ga dito: “Zacheo, vien do suito, parché ancoi go de restar nela to casa.” 6 Alora, Zacheo suito l’è vegnesto do e lo ga ricevesto con alegria nela so casa. 7 Quando i ga visto quel che ga sucedesto, tuti i ga tacà sbrontolarghe drio: “Lu l’è vegnesto par restar nela casa de un omo che l’è pecador.” 36 Intanto che el ndea, le persone le metea parte dele so robe nela strada. 37 Quando lu l’è rivà darente dela strada che la vien do del monte dei Olivi, tuti i dissìpoli i ze restadi contenti e i ga scominsià a lodar a Dio in alta voce par causa de tuti i miràcoli che i gavea visto. 38 Lori i disea: “Benedeto l’è quel che el vien come Rè in nome de Geovà! Pace nel cielo e glòria nei posti pi alti!” 39 Ma, arquanti dei farisei, che i era in meso la mùcia de gente, i ghe ga dito: “Istrutor, mandali taser!” 40 E lu el ghe ga dito: “Mi ve digo che, se lori i tasesse, i sassi i ndaria parlar.” 41 E, quando l’è rivà darente, el ga vardà la cità e el ga piandesto par causa de ela. 42 El ga dito: “Ò Gerusalen, se ti ancoi te fussi stà bona de capir le robe che te fà gaver pace! Ma adesso no te sì stata bona de vederle. 43 Parché vegnarà i giorni che i to nemighi i farà su pali con ponte intorno de ti. Lori no i te assarà ndar fora e i te farà patir. 44 Lori i ndarà trar par tera ti e i to fioi e no restarà gnanca un sasso sora el altro, parché no te ghè capio el tempo de esser giulgada.”