Ati dei Apòstoli

3 Dopo che el ga sofrio, el ghe ga mostrà che l’era vivo par meso de tante prove vere. Lori i lo ga visto par 40 giorni, e lu el ga parlà del Regno de Dio. 4 Intanto che l’era insieme de lori, el ghe ga ordinà: “No sté ndar via de Gerusalen, ma seité spetar quel che el Pare el ga prometesto, cossita come ve go parlà. 5 Gioani el batesea con àqua, ma de qua pochi giorni valtri saré batesadi con spìrito santo.” 6 Cossita, quando i se ga riunio, lori i ghe ga domandà: “Signor, l’è adesso che Israel el sarà un regno nantra volta?” 7 Lu el ghe ga dito: “Sol el Pare el ga la autorità par scòlier el tempo che questo ndarà suceder, alora no gavé bisogno de saverlo. 8 Ma, quando valtri riceveré el spìrito santo, riceveré poder e gavaré de esser testimònie de mi in Gerusalen, in tuta la Giudea e Samaria, e fin la parte pi distante dela tera.” 13 Quando che i ze rivadi, i ze ndati su de sora nel posto ndove che i era ospedadi. La ghen’era Piero e anca Gioan, Tiago e Andrè, Filipe e Tomè, Bartolomeo e Mateo, Tiago, fiol de Alfeo, Simon, el Zeloso, e Giuda, fiol de Tiago. 14 Tuti de acordo, i seitea a far orassion, insieme con arquante done, anca Maria, la mare de Gesù, e i fradei de Gesù.