2 Timòteo

1 Paolo, apòstolo de Cristo Gesù par volontà de Dio de acordo cola promessa dela vita che la ze par meso de Cristo Gesù, 2 a Timòteo, un fiol amà: che Dio, el nostro Pare, e Gesù, el nostro Signor, i te mostre la maraveiosa bontà e misericòrdia e i te dae pace. 3 Mi son grato a Dio. Mi servo a lu con una cossiensa pura come i me antenati e sempre me ricordo de ti nele me sùpliche giorno e note. 4 Quando che mi me ricordo dele to làgrime, mi go pròpio voia de véderte nantra volta par esser pien de contentessa. 5 Parché mi me ricordo dela to fede sensa ipocrisia, la fede che la to nona Loide e la to mare Eunisse le ga bio vanti de ti e che adesso sicuro che te ghè anca ti. 6 Par quela che mi vui ricordarte de doperar el don che Dio el te ga dato par meso dela imposission dele man, e che te lo fae con entusiasmo, cossita che te lo assi pi vivo come un fogo. 7 Parché Dio no’l ne ga dato un spìrito de covardia, ma un spìrito de poder, de amor e de bon senso. 8 Alora no stà invergognarte de predicar sora el nostro Signor e gnanca de mi, che son in preson par causa de lu. Ma aceta el sofrimento par via dele bone notìssie e fìdate nel poder de Dio. 9 Lu el ne ga salvà e el ne ga ciamà par esser santi, ma nò parché ghemo fato robe bone, ma par la so volontà e par la so maraveiosa bontà. L’è belche tanto tempo che questa maraveiosa bontà la ze mostrada a noantri par meso de Gesù, 10 ma adesso, la ze deventada ciara par meso dela manifestassion del nostro Salvador, Cristo Gesù. Lu el ga finio fora cola morte e, par meso dele bone notìssie, el ga dimostrà come gaver la vita e un corpo che no’l se smarsisse. 11 Mi son stà designà predicador, apòstolo e maestro par questa bona notìssia. 12 L’è par quela che mi sofro queste robe, ma mi no me invergogno, parché mi cognosso Quel che mi credo e son sicuro che lu el pol proteger tuto quel che mi ghe go dato par tender fin quel giorno. 13 Seita a ndar drio el esémpio de parole bone e vere che te ghè scoltà de mi e seita a dimostrar fede e amor che l’è el resultà de star unidi a Cristo Gesù. 14 Col aiuto del spìrito santo che ghen’è in noantri, te ghè de proteger el ben pressioso che l’è stato dato a ti. 15 Come che ti te sè, tuti quei dela provìnsia dela Àsia i me ga abandonà, anca Figelo e Ermògene. 16 Che el Signor el mostre misericòrdia ala fameia de Onesìforo, parché lu el me ga consolà tante volte e no’l se ga invergognà che mi ero in preson. 17 Invesse, quando che lu l’è vegnesto a Roma, lu l’è ndà in serca de mi e el me ga catà. 18 Prego che el Signor Geovà el gàpia misericòrdia de lu in quel giorno. E ti te sè tanto ben tuto quel che lu el ga fato par mi in Èfeso.