Gioani
11 Ma Maria la ze restada fora, darente dela tomba, e la seitea piander. Intanto che la piandea, la se ga stirà avanti par proar vardar rento la tomba. 12 Ela la ga visto due àngeli de bianco sentadi do ndove el corpo de Gesù l’era stà metesto. Un ntela testa e quelaltro ntei pié. 13 Lori i ghe ga domandà: “Dona, parché te sì drio piander?” Ela la ghe ga rispondesto: “I ga portà via el me Signor, e no sò ndove i lo ga metesto.” 14 Dito questo, la ga vardà indrio e la ga visto Gesù in pié, ma no lo ga ricognossesto. 15 Gesù el ghe ga domandà: “Dona, parché te sì drio piander? De chi veto in serca?” Come la pensea che fusse quel che el tendea del giardin, la ghe ga dito: “Signor, se te lo ghè menà via de qua, dime ndove te lo ghè metesto e ndarò torlo.” 16 Gesù el ghe ga dito: “Maria!” La se ga girà e la ghe ga dito in ebraico: “Raboni!” (che vol dir: “Maestro!”). 17 Gesù el ga dito: “Férmate de tegnerme, parché ancora no son ndà su insieme al me Pare. Ma va dirghe ai me fradei: ‘Mi vao su insieme al me Pare, che anca l’è el vostro Pare, si, vao su insieme al me Dio, che anca l’è el vostro Dio.’” 25 Alora, quei altri dissìpoli i ghe ga dito: “Noantri ghemo visto el Signor!” Ma lu el ghe ga dito: “Se mi no vedo la marca dei ciodi nele so man, se no meto el deo nela marca dei ciodi e se no meto la man nela so banda, mai vao creder.” 27 Dopo, el ga dito a Tomè: “Meti qua el to deo e varda le me man. Meti la to man qua nela me banda. Basta de gaver dùbio, pitosto credi.”