Salmi

46 Dio l’è la nostra protession e la nostra forsa. Noantri podemo sempre ricever el so aiuto in tempi de dificoltà. 2 Cossita, no gavaremo paura anca se la tera la càmbie, anca se i monti i vae do fin el fondo del mar, 3 ancora che el mar el sìpia cativo e el fae sgiuma, ancora che la so forsa la fae i monti tremar. 4 Ghen’è un rio che la so àqua la assa contenta la cità de Dio, el santo e grandioso tabernàcolo del Altìssimo. 5 Dio l’è nela cità. Ela no la pol mia esser destruta. Dio el vegnarà giutarla quando sciara el di. 6 Ghen’è stà bacan nele nassion, i regni i ze stati trati do. Lu el ga alsà la so voce, e la tera la se ga desfata. 7 Geovà dei esèrsiti l’è con noantri. El Dio de Giacò l’è la nostra protession. 8 Vegné e vedé quel che Geovà el fà, come el fà robe maraveiose nela tera. 9 Lu el finisse fora con tute le guere che ghen’è nela tera. El spaca el arco e la lansa e el brusa le carete nel fogo. 10 “Ferméve de lotar contra mi. Gavé de saver che mi son Dio. Sarò el pi importante intrà le nassion, sarò el pi importante nela tera.” 11 Geovà dei esèrsiti l’è con noantri. El Dio de Giacò l’è un posto de protession par noantri.