Ati dei Apòstoli

28 Quando èrino belche salvi, noantri ghemo savesto che la ìsola la se ciamea Malta. 2 Quei che i era de star nela ìsola i ne ga mostrà tanta bontà. Par via che piovea e fea fredo, lori i ga impissà un fogo e i ne ga ricevesto ben a tuti. 11 Tre mesi dopo, semo partidi nte un bastimento de Alessandria che gavea una imàgine dei Fioi de Zeus. El bastimento el gavea passà el inverno nela ìsola. 14 Lì ghemo catà arquanti fradei, che i seitea a dirne par restar lì par sete giorni. E dopo semo ndati a Roma. 15 Quando i fradei de Roma i ga sentio notìssie sora noantri, i ze ndati fin la piassa de Apio e le Tre Taverne par catarne. Quando Paolo li ga visti, el ga ringrassià a Dio e el se ga incoraià. 16 Quando par fin semo rivadi a Roma, i ga assà Paolo restar lu sol col soldà che lo tendea. 17 Tre giorni dopo Paolo el ga fato ciamar i òmini pi importanti intrà i giudei. Quando i era tuti insieme, lu el ghe ga dito: “Òmini, fradei, anca se mi no go mia fato gnente contra el pòpolo o contra i costumi dei nostri antenati, son stà metesto in preson in Gerusalen e dato in man ai romani.