Deuteronómio

15 “Nel fin de cada sete ani te ghè de perdonar i dèbiti. 2 Te ghè de far cossita: quel che el ga dato in préstio el ndarà perdonar el dèbito del so pròssimo. Lu no’l ga de obrigar che el so pròssimo e gnanca el so fradel i paghe el dèbito, parché tuti i dèbiti i sarà perdonadi davanti a Geovà. 3 Te pol obrigar che el straniero te paghe, ma te ghè de perdonar i dèbiti del to fradel. 4 Nissuni ga de deventar poareto intrà de valtri, parché sicuro che Geovà el te benedirà nela tera che Geovà, el to Dio, el te darà come eransa. 5 Lu sol farà questo se te obedissi tuto quel che Geovà, el to Dio, el te dise de far e se te obedissi a tuti questi comandamenti che te dao ancoi. 6 Parché Geovà, el to Dio, el te benedirà pròpio come el te ga prometesto. Te darè in préstio a tante nassion, ma no te gavarè bisogno de ciapar in préstio. Te ndarè controlar tante nassion, ma lore no le ndarà mia controlarte. 7 “No stà esser tirano. Invesse, te ghè de verder la to man se qualchedun dei to fradei el deventa poareto intrà de valtri nte una dele cità dela tera che Geovà, el to Dio, el te darà. 8 Te ghè de verder la to man e esser generoso con lu e darghe in préstio tuto quel che ghe manca. 9 Stà atento de no seitar pensar nel to cuor: ‘El sètimo ano, el ano de perdonar i dèbiti, l’è darente’. Questo saria pròpio bruto, parché cossita, no te sarissi generoso col to fradel poareto e no te ndarissi darghe gnente. Se lu el piande e el domanda aiuto de Geovà par causa de ti, te sarè drio far un pecato. 10 No te ghè de darghe par obrigassion, ma te ghè de darghe de volentiera. Cossita Geovà, el to Dio, el te benedirà in tuti i to laori e in tuto quel che te fè. 11 Sempre ghen sarà poareti in questa tera. Par quela, mi ve comando: ‘Te ghè de verder la to man de volentiera par el to fradel che el ga de bisogno e par el poareto che l’è nela to tera.’ 12 “Se qualchedun el te ga vendesto un dei to fradei, un ebreo o ebrea, e questa persona la te ga servio par sei ani, alora, nel sètimo ano te ghè de libertarla. 13 E quando te la liberti no stà mandarla via sensa gnente. 14 Te ghè de darghe qualcossa de intrà le to bèstie, del to campo e del to tòrcio de vin e de òio, e te ghè de darghe de volentiera. Te ghè de darghe de acordo con quel che Geovà, el to Dio, el te ga benedio.