Proverbi

7 Me fiol, te ghè de obedir ale me parole e meter via nel to cuor i me comandamenti. 2 Obedissi ai me comandamenti e te ndarè viver. Sìpia atento ale me istrussion cossita come te fè cola pupila dei to oci. 3 Te ghè de ligarli nei to dei e scriverli nele tole del to cuor. 6 Dela finestra dela me casa, go vardà in do par meso dele sfese, 7 e intanto che vardea quei che no i ga speriensa, go visto un toso che no’l gavea giudìssio. 8 Lu el ga passà par la strada che ndea ndove ela la era e l’è ndato par la banda dela casa dela dona. 9 El sol l’era ndato do e l’era belche sera. L’era drio vegner note e restar scuro. 10 Alora, go visto una dona ndar incontro a lu. La era vestia come una prostituta e pronta par imbroiar. 11 La ghe piase sprosiarse e no la ga vergogna. No la ze mai casa. 12 Dele volte la ze nele strade e dele volte nele piasse. La resta ndove tuti i pol vederla, pronta par ciapar qualchedun. 13 Alora, ela lo ciapa e la ghe dà un baso. Ela lo varda e la ghe dise: 14 “Mi gavea de far sacrifissi de pace, e ancoi go fato quel che gavea prometesto. 15 Par quela, son vegnesta in serca de ti e te go catà. 16 Mi go fato su el me leto con bele querte de lino del Egito con tanti colori. 17 Mi go profumà el me leto con mira, aloès e canela. 18 Vien, ndemo butarse insieme fin de matina. Ndemo restar contenti col amor che ghen’è intrà de noantri. 19 Parché el me omo no l’è casa. Lu el ga viaià a un posto distante. 20 Lu el ga portà insieme una mùcia de soldi e no’l tornarà vanti del giorno che ghen sarà el colmo dela luna.” 21 Con abilità, ela la imbroia el toso. Lu el fà quel che ela la vol par via de quel che la ghe ga parlà. 22 De colpo lu el ghe va drio, come un toro menà par esser copà, come un bauco incadenà par esser castigà, 23 fin che una flessa lo sbusa nel figà. Come un osel che el zola par ndar rento la tràpola, el toso no’l sa che tuto questo lo farà morir. 24 Adesso, me fioi, scolteme. Sté atenti a quel che ve digo. 25 No sté assar che el vostro cuor el ve fae ndarghe drio questa dona e no sté far le robe che ela la fà. 26 Parché ela la ga tirà via la vita de tanti, e no se pol gnanca contar quei che ela la ga copà. 27 La so casa la mena al Sepolcro. Quei che i va nela so casa i more.