1 Corinti

10 Adesso, fradei, mi vui che savé che i nostri antenati i ze stati tuti soto la nùvola, i ga passà rento el mar, 2 i ze stati batesadi come seghidori de Moisè par meso dela nùvola e del mar, 3 i ga magnà tuti el medèsimo magnar 4 e i ga bevesto tuti la medèsima roba spiritual. Parché i ga bevesto del sasso spiritual che li seghia, e quel sasso l’era el Cristo. 5 Ma Dio no l’è stà mia contento cola pi granda parte de lori, e par quela i ze morti nel deserto. 6 Adesso queste robe le ze deventade par noantri esempi, cossita che no volemo mia le robe rugne che lori i volea. 7 No sté mia deventar idòlatri compagno de lori, cossita come l’è scrito: “El pòpolo el se ga sentà par magnar e bever. Dopo i se ga levà su e i ga fato festa.” 8 No ghemo mia de far imoralità sessual, compagno i ga fato arquanti de lori, par quela che in un sol giorno i ze cascadi do 23.000 de lori. 9 No ghemo de meter Geovà a prova, come arquanti de lori i ga fato e i ze stati copadi par causa dele bisse. 10 No sté mia sbrontolar, come i ga fato arquanti de lori, sol par dopo morir par causa de quel che el finisse fora tuto. 11 Queste cose le ga sucedesto come esempi e le ze state scrite come aviso par noantri, che vivemo nel fin del sistema de cose. 12 Alora, quel che el pensa che l’è in pié, che el stae atento par no cascar. 13 Le tentassion che gavé infrontà no le ze difarente de quele che i altri i infronta. Ma Dio l’è fedele e no’l assarà che valtri sìpie provadi de pi de quel che podé soportar. Ma quando vegnarà la tentassion, lu anca el ve giutarà a darghene fora, e cossita valtri saré boni soportarla. 14 Alora, me cari, scampé via dela idolatria. 15 Mi parlo a valtri che sé persone de giudìssio: gavé de dessider valtri stessi se quel che son drio dirve l’è giusto o sbalià. 16 Quando bevemo del càlisse dela benedission no l’è drio partissipar del sangue de Cristo? Quando magnemo el pan che ghemo spartio, no semo drio partissipar del corpo de Cristo? 17 E come che semo un sol pan, anca se noantri semo tanti, noantri semo un sol corpo parché tuti partissipemo de questo ùnico pan. 21 Valtri no podé bever del bicier de Geovà e del bicier dei demoni, no podé magnar dela “tola de Geovà” e dela tola dei demoni. 22 O ‘volemo che Dio el reste geloso’? Sarà che semo pi forti che lu? 23 Se pol far tute le robe, ma no le ze tute che le dà benefìssio. Se pol far tute le robe, ma no le ze tute che le fà una persona pi forte. 24 Cada un el seite ndar in serca, nò del so interesse, ma de quel dei altri. 25 Magné de tuto quel che se vende nel mercà, sensa domandarve se podé magnar o nò 26 parché “la tera e tuto quel che ghen’è sora ela i ze de Geovà”. 31 Alora, se magné, se bevé o se fé qualche altra roba, gavé de far tute le robe par la glòria de Dio. 32 Sté atenti parché quel che valtri fé no’l fae giudei, grechi o la congregassion de Dio far un pecato. 33 Anca mi son drio far sforso par contentar a tuti in tute le robe. No fao quel che l’è bon par mi, ma quel che l’è bon par tante persone, cossita le sarà salve.