Génesi

8 Ma Dio el se ga ricordà de Noè, e de tute le bèstie de mato e dele bèstie che le vive intrà le persone che le era con lu nela arca. Dio el ga fato sventar sora la tera e la àqua la ga scominsià a sbassarse. 2 Se ga serà le fontane de àque e le porte che tegnea le àque nel cielo. Cossita la piova la se ga fermà. 3 Alora la àqua sora la tera la ga scominsià a calar pin pianeto. Dopo de 150 giorni, la àqua la se gavea sbassà. 4 Nel giorno disassete del sètimo mese, la arca la se ga fermà sora le montagne de Ararat. 5 La àqua la ga seità a calar fin el dèssimo mese. E nel primo giorno del dèssimo mese, se podea veder i colmi dei monti. 6 Dopo de 40 giorni, Noè el ga verto la finestra che el gavea fato nela arca 7 e el ga molà un corbo. El corbo el zolea banda de fora e tornea ala arca, fin che le àque che le era vegneste sora la tera se sughesse. 8 Un tempo dopo, el ga molà una colomba par veder se la àqua la gavea calà sora la tera. 9 La colomba no la ga catà un posto par fermarse, e la ze tornada ala arca parché ghen’era ancora àqua sora tuta la tera. Alora Noè el ga stirà la man e el ga ciapà la colomba par meterla rento la arca. 10 El ga spetà sete giorni e dopo el ga molà nantra volta la colomba. 11 Rente sera, la colomba la ze tornada e el ga visto che ela la gavea nel bèco una foia del oliver pena tirada via. Par quela Noè el ga savesto che la àqua la gavea calà sora la tera. 12 El ga spetà altri sete giorni. Alora el ga molà nantra volta la colomba, ma no la ze pi tornada. 13 Quando Noè el gavea 601 ani, nel primo giorno del primo mese, no ghen’era pi tuta quela àqua sora la tera. El ga tirà via el querto dela arca e el ga visto che la tera la era suta. 14 Nel giorno 27 del secondo mese, la tera la era suta del tuto. 15 Alora Dio el ga dito a Noè: 16 “Te pol ndar fora dela arca cola to dona, coi to fioi e cole done dei to fioi. 17 Mena fora con ti tute le bèstie, le creature che zola, i animai e le bèstie che le se rasta par tera. Lori i se reproduserà e i deventarà tanti, cossita la tera la restarà piena.” 18 Alora Noè l’è ndato fora insieme coi so fioi, cola so dona e cole done dei so fioi. 19 Tute le creature vive, o sia, le bèstie che se rasta, le creature che zola e le creature che se move sora la tera, le ze vegneste fora dela arca de acordo col so tipo. 20 Alora Noè el ga fato un altar par Geovà. El ga ciapà arquanti de tuti i animai puri e de tute le creature pure che zola, e el ga fato oferte brusade nel altar. 21 E Geovà el ga scominsià a sentir un profumo che el ghe piasea. Par quela Geovà el ga dito nel cuor: “Mai pi ndarò maledir la tera par causa del omo, parché de gióveno avanti el so cuor el vol sempre far quel che l’è rugno. E mai pi ndarò far come go pena fato, de finir fora tuto quel che vive. 22 De adesso avanti, la tera mai pi la assarà de gaver la època de semenar e de tor su, el fredo e el caldo, el istà e el inverno, e el di e la note.