1 Gioani

1 Quel che l’era del scomìnsio, quel che noantri ghemo scoltà, quel che noantri ghemo visto coi nostri oci, quel che ghemo visto e che le nostre man le ga tocà: la parola dela vita. 2 (Infati, la vita la ze stata rivelada, e noantri lo ghemo visto, e semo drio dar testimònio e dechiarar a valtri la vita eterna che la era col Pare e la ze stata rivelada a noantri.) 3 Quel che ghemo visto e ghemo scoltà semo drio parlar a valtri, cossita anca valtri podé restar unidi con noantri. E noantri semo unidi col Pare e col so Fiol, Gesù Cristo. 4 E semo drio scriverve queste robe, cossita la nostra alegria la sìpia completa. 5 Questo l’è el messàgio che ghemo scoltà de lu e semo drio dechiarar a valtri: Dio l’è luce, e no ghen’è gnanca una scuridon in lu. 6 Se noantri disemo che semo in union con lu, ma seitemo ndar nela scuridon, noantri semo drio dir busie e no semo drio viver de acordo cola verità. 7 Ma, se semo drio ndar nela luce come lu stesso l’è nela luce, noantri semo unidi intrà de noantri, e el sangue de Gesù, el so Fiol, ne purifica de tuti i pecati. 8 Se noantri disemo che no ghemo gnanca un pecato, semo drio imbroiar a noantri stessi e la verità no la ze in noantri. 9 Ma, se confessemo i nostri pecati, Dio el ne perdonarà e ne purificarà de tuta la ingiustìssia, parché lu l’è fedele e giusto. 10 Se noantri disemo che no ghemo gnanca un pecato, semo drio far de lu un busier, e la so parola no la ze in noantri.