Efesi

5 Alora, fé compagno a Dio, come fioi amadi, 2 e seité a gaver amor, cossita come anca el Cristo el ne ga amà e el ga dato la so vita par noantri come oferta e sacrifìssio, un bon profumo par Dio. 3 No sté gnanca parlar sora imoralità sessual, sora qualche tipo de impuressa e sora voler sempre de pi, parché l’è questo che se speta de quei che i serve a Dio. 4 No sté gnanca parlar sora panciane, fròtole sporche e comportamento che l’è una vergogna. Tute queste robe no le ze giuste. Invesse, gavé de ringrassiar a Dio. 5 Parché valtri savé pròpio ben che quei che i fà imoralità sessual, quei che no i ze puri, quei che i vol sempre de pi, che la ze la medèsima roba de esser idòlatri, lori no i riceverà in eredità el Regno del Cristo e de Dio. 6 No sté assar che nissuni ve imbroie con parole sensa valor, parché l’è par via de queste robe che Dio el resta cativo con quei che no i ghe obedisse. 7 Alora, no sté far gnente insieme de lori. 8 Vanti, valtri eri scuridon, ma adesso che sì insieme al Signor, valtri sì luce. Seité a far le robe come fioi dela luce, 9 parché tuto quel che vien dela luce l’è bon, giusto e vero. 10 Seité farve sicuri de quel che el Signor el aceta. 15 Alora, sté ben atenti par no far come i stùpidi, ma come quei che i ga sabedoria. 16 Gavé de doperar el vostro tempo dela meio maniera, parché i giorni i ze rugni. 17 Par quela, fermeve de esser bauchi, ma gavé de capir quala che la ze la volontà de Geovà. 18 Anca, no sté far la ciuca con vin, parché el ve fà perder el controlo. Pitosto, resté pieni de spìrito santo. 19 Parlé intrà de valtri con salmi, lodi a Dio e càntichi. Gavé de cantar e far mùsica de cuor a Geovà. 20 e sempre ringrassiar par tute le robe al nostro Dio e Pare, in nome del nostro Signor Gesù Cristo. 22 La dona la ga de rispetar de cuor la autorità del so omo come la ga de rispetar la autorità del Signor, 23 parché el omo el ga la autorità sora la so dona, cossita come anca Cristo el ga la autorità sora la congregassion e lu l’è el salvador de questo corpo. 24 Alora, cossita come la congregassion la ga de rispetar la autorità del Cristo, anca la dona la ga de rispetar la autorità del so omo in tuto. 25 Sposo, continua a amar la to sposa, come el Cristo anca el ga amà la congregassion e el ga dato la so vita par ela, 26 par santificarla, par purificarla col bagno del’àqua par meso dela parola, 27 cossita lu el podea presentar la cogregassion a sé stesso nel so splendor, sensa màcia o ruga o gnanca nantra roba compagna, ma santa e sensa difeto. 28 Dela medèsima maniera i sposi i ga de amar le spose come el so pròpio corpo. El omo che el ama la so sposa el ama sì stesso, 29 parché gnanca un omo el ga mai odià el so pròpio corpo, ma lu lo alimenta e lo tende, come el Cristo el fà cola congregassion, 31 “Par quela, el omo el assarà so pare e so mare, e el se unirà ala so sposa, e i due i sarà una sol carne.” 33 Cossita, cada un de valtri el ga de amar la so sposa come a si stesso, e anca la sposa la ga de ver un grando rispeto par so sposo.