Isaia

55 Vegné tuti valtri che gavé sen! Vegné bever àqua. Vegné valtri che no gavé mia soldi, compré e magné. Vegné e ciapé vin e late sensa soldi e sensa pagar gnente. 2 Parché che valtri seité a guastar i soldi con quel che no l’è mia pan? E parché che magné fora el salàrio con quel che ve assa ancora con fame? Scolteme ben e magné quel che l’è bon, cossita ndaré goderve col meio magnar. 6 Ndé in serca de Geovà intanto che ancora sì boni de catarlo. Domandeghe el so aiuto intanto che lu l’è darente. 7 La persona rugna la ga de assar la so strada, e quel che el fà robe rugne, i so pensamenti. Lori i ga de tornar a Geovà e el gavarà misericòrdia. I ga de tornar al nostro Dio, parché li perdonarà del tuto. 8 Geovà el dise cossita: “I me pensamenti no i ze i vostri pensamenti. E la vostra maniera de far le robe no la ze compagna ala me maniera de far le robe. 9 Come el cielo l’è par sora dela tera, cossita la me maniera de far le robe la ze superior ala vostra e i me pensamenti i ze superiori ai vostri. 10 La piova e la neve le fà che vegna su le piante e le ghe dae fruti, le fà che el colono el gàpia semensa e che le persone le gàpie pan par magnar. Cossita come la piova e la neve le vien do del cielo e no le ritorna sensa vanti bagnar la tera, 11 cossita la sarà la me parola che la vien fora dela me boca. Ela no la tornarà a mi sensa resultadi, ma sicuro che la realisarà quel che mi vui, e sicuro che la farà quel che mi go mandà far.