1 Corinti

15 Fradei, adesso vui ricordarve dele bone notìssie che ve go parlà, che valtri gavé acetà e che ve gavé fidà. 2 Ndé anca salvarse se ve taché del tuto ale bone notìssie che ve go parlà. Senò, sì deventadi credenti par gnente. 3 Una dele robe pi importante che ve go dito la ze una roba che anca mi la go imparà, o sia, che Cristo l’è morto par i nostri pecati, de acordo cole Scriture. 4 I lo ga metesto nel sepolcro e Dio lo ga ressussità nel terso giorno, de acordo cole Scriture. 7 El ga capità a Tiago e dopo a tuti i apòstoli. 18 Alora, anca quei che i ze morti come dissìpoli de Cristo i ze morti par sempre. 21 Parché cossita come la morte la ze vegnesta par meso de un omo, anca la ressuression dei morti la vien par meso de un omo. 22 Cossita, par causa de Adon tuti i more, ma par causa del Cristo tuti i riceverà la vita. 23 Ma cada un nela so ora giusta: el primo l’è el Cristo. Dopo, quando el Cristo el vien, i sarà ressussitadi quei che i ze soi. 24 Dopo, nela fin, lu el ghe darà el Regno al so Dio e Pare, dopo che el ga finio fora con tuti i governi e tute le autorità e poderi. 25 Parché lu el ga de governar fin che Dio el ghe mete tuti i so nemighi soto i so pié. 26 El ùltimo nemigo che el sarà finio fora el sarà la morte. 27 Parché Dio “el ghe ga metesto tute le robe soto i so pié”. Ma quando lu el ga dito che tute le robe le ze state meteste soto de lu, l’è ciaro che questo no’l vol dir quel che el ga metesto soto de lu tute le robe. 28 E quando tute le robe le sarà meteste soto de lu, alora anca el pròpio Fiol el se meterà soto de quel che ga metesto soto de lu tute le robe, cossita Dio el sarà tute le robe par tuti. 30 Parché che anca noantri semo in perìcolo tuto el tempo? 31 Tuti i giorni mi infonto robe che le pol coparme. Fradei, mi son sicuro de questo come son sicuro del orgòlio che go de valtri par causa de Cristo Gesù, el nostro Signor. 32 Se, come altri òmini, mi go lotà con bèstie cative in Èfeso, cossa guadagno con questo? Se i morti no i va levar su nantra volta, “ndemo magnar e bever, parché doman moriremo”. 33 No sté mia farve imbroiar. Le brute compagnie le rovina i boni comportamenti. 35 Ma qualchedun el ndarà dir: “Ma come che i morti i ndarà levar su? Come che i sarà i so corpi?” 36 Che bauco! Prima la semensa la more e sol dopo la deventa una pianta. 37 Ti no te semeni una pianta che la ze belche granda, ma te semeni un grano, sìpia de formento o de qualche altro tipo de semensa. 38 Ma Dio el fà la semensa vegner su come che lu el vol, e quando le semense le vien su, no le ze mia tute compagne. 39 Le carne no le ze tute compagne, parché ghen’è la carne dei umani, dei boi, dele bèstie che zola e dei pessi. 40 Ghen’è corpi par viver nel cielo e corpi par viver nela tera, ma cada un el ga la so pròpia glòria. 41 El sol el ga un tipo de glòria, la luna la ga nantro e le stele ancora nantro. E cada stela la ga la so pròpia glòria. 42 La ze cossita anca la ressuression dei morti. L’è semenà in corussion, l’è levà su sensa corussion. 43 L’è semenà sensa onor, l’è levà su in glòria. L’è semenà in fiachessa, l’è levà su in poder. 44 L’è semenà corpo fìsico, l’è levà su corpo spiritual. Se ghen’è un corpo fìsico, ghen’è anca un corpo spiritual. 45 Cossita l’è scrito: “El primo omo, Adon, l’è deventà una ànima che vive.” El ùltimo Adon l’è deventà un spìrito che el dà vita. 49 Cossita come semo compagni al omo che l’è stato fato dela polver, saremo compagni al omo che l’è vegnesto del cielo. 53 Parché quel che el smarsisse el ga de deventar quel che no’l se smarsisse, e quel che l’è mortal el ga de deventar imortal. 55 Morte, ndove ze el to poder? Morte, no te pol pi far le persone sofrir! 58 Par quela, me fradei amadi, sìpie forti, firmi. Gàpie sempre tanto da far nel laoro del Signor, e sàpie che tuto el vostro laoro par el Signor no l’è par gnente.