Ebrei

10 Parché la Lege la ze una ombria dele bone cose che le ga de vegner, ma nò la pròpia realità. Ela mai la podaria far deventar perfeti quei che i riva darente de Dio, par meso dei medèsimi sacrifissi che i ze fati tuti i ani. 2 Par nantra banda, no se fermaria de far sacrifissi? Parché quei che i serve a Dio, quando che i ze purificadi, no i se sentiria pi colpadi dei so pecati. 3 Ma, questi sacrifissi i fà le persone ricordarse dei so pecati tuti i ani, 4 parché el sangue de tori e de bechi no’l pol mia finir coi pecati. 5 Par quela che, quando Cristo l’è vegnesto al mondo, lu el ga dito a Dio: “‘No te ghè volesto gnanca sacrifissi, gnanca oferte, ma te me ghè parecià un corpo”. 6 Ti no te ghè acetà le oferte brusade, gnanca le oferte par el pecato.’ 7 Alora mi go dito: ‘Eco! Mi son vegnesto par far la to volontà, ò Dio. Nel rolo l’è scrito sora mi.’” 10 Noantri semo deventadi santi par causa de questa “volontà” de Dio, parché Gesù Cristo el ga dato el so corpo come sacrifìssio una volta par sempre. 12 Invesse, lu el ga dato sol un sacrifìssio par i pecati, una volta par sempre, e el se ga sentà ala drita de Dio, 19 Alora fradei, come ghemo tuta la confiansa par doperar la strada par ndar rento al posto santo par meso del sangue de Gesù, 20 la strada nova e viva che el ga verto par noantri par meso dela coltrina, o sìpia, la so carne, 21 e adesso che ghemo un grando sasserdote sora la casa de Dio.” 22 Rivemo darente col cuor sinsiero e con tuta la fede, con un cuor purificà de una cossiensa rugna e el corpo bagnà con àqua neta. 23 Seitemo proclamar la nostra speransa, sensa dubi, parché quel che el ga prometesto l’è fedele. 24 E ghemo de preocuparse un col altro par motivarse a mostrar amor e a far bone assion, 25 sensa assar de riunirse, come arquanti i fà, ma ghemo pròpio de incoraiarse un al altro, ancora de pi quando valtri vedé rivar el giorno. 35 Alora, seité a esser coraiosi, cossita saré tanto ricompensadi. 36 Valtri gavé de perseverar. Cossita, dopo de far la volontà de Dio, riceveré quel che el ve ga prometesto. 37 Parché, ancora “nantro pochetin”, e “quel che el vien el rivarà, sensa tardigar”. 38 “Ma el giusto el ndarà viver par via dela so fede”, e “se lu el torna indrio, mi no restarò contento con lu”. 39 Ma noantri no semo mia de quei che i torna indrio par esser finidi fora, ma semo de quei che i ga fede par salvar la vita.