Génesi

1 Nel scomìnsio, Dio el ga creà el cielo e la tera. 2 La tera la era sensa forma e voda, e l’era scur sora le àque profonde, e la forsa ativa de Dio la se movea sora le àque. 3 E Dio el ga dito: “Che ghen sìpia la luce.” Alora, l’è vegnesto ciaro. 4 Dopo de questo, Dio el ga visto che la luce la era bona, e Dio el ga scominsià a spartir la luce del scur. 5 Dio el ga ciamà la luce de “giorno”, ma el scur lo ga ciamà de “note”. E la ze vegnesta la sera e la ze vegnesta la matina, primo giorno. 6 E Dio el ga dito: “Che ghen sìpia un grando spàssio intrà le àque, e che le àque le sìpie spartide in due.” 7 E Dio el ga fato un grando spàssio e el ga spartio le àque che ghen’era soto el grando spàssio dele àque che ghen’era sora el grando spàssio. E ga sucedesto pròpio cossita. 8 Dio el ga ciamà el grando spàssio de “cielo”. E la ze vegnesta la sera e la ze vegnesta la matina, secondo giorno. 9 E Dio el ga dito: “Che la àqua soto el cielo la sìpia tuta insieme nte un sol posto, e che vegna fora la tera suta.” E ga sucedesto pròpio cossita. 10 Dio el ga ciamà la tera suta de “tera”, ma le àque che le era tute insieme le ga ciamade de “mari”. E Dio el ga visto che l’era bon. 11 E Dio el ga dito: “Che la tera la fae butar le piante, piante che le produse semense e piante che le produse fruti de acordo cole so spèssie, che le dae fruti con semense.” E ga sucedesto pròpio cossita. 12 E la tera la ga scominsià a produser piante, piante che le produse semense e piante che le produse fruti con semense, de acordo cole so spèssie. E Dio el ga visto che l’era bon. 13 E la ze vegnesta la sera e la ze vegnesta la matina, terso giorno. 14 E Dio el ga dito: “Che le fonte de luce le sìpie nel grando spàssio del cielo par spartir el giorno dela note; e lore le servirà come segnai par marcar le èpoche, i giorni e i ani.” 15 E le fonte de luce nel grando spàssio del cielo le servirà par slusar la tera.” E ga sucedesto pròpio cossita. 16 E Dio el ga fato due grande luce, la pi granda par slusar de di e la pi pìcola par sciarar la note. Lu el ga fato anca le stele. 17 Cossita, Dio le ga meteste nel cielo par slusar sora la tera, 18 par governar el giorno e la note e par spartir la luce del scur. E Dio el ga visto che l’era bon. 19 E la ze vegnesta la sera e la ze vegnesta la matina, quarto giorno. 20 E Dio el ga dito: “Che le àque le sìpie piene de creature vivente, e che ghen sìpia creature che le zola sora la tera, nel grando spàssio del cielo.” 21 E Dio el ga creà tuti i grandi animai che i vive nel mar e tute le creature vivente che se move e che ghen’è tante nela àqua, de acordo cole so spèssie, e tute le creature che el ga ale e che le zola de acordo cole so spèssie. E Dio el ga visto che l’era bon. 24 E Dio el ga dito: “Che la tera la produsa creature vivente de acordo cole so spèssie: animai domèstichi, animai che i se rasta par tera e bestie de mato de acordo cole so spèssie.” E ga sucedesto pròpio cossita. 25 Dio el ga fato i animai de mato de acordo cole so spèssie, i animai domèstichi de acordo cola so spèssie e tuti i animai che i se rasta par tera de acordo cole so spèssie. E Dio el ga visto che l’era bon. 26 E Dio el ga dito: “Femo el omo ala nostra imàgine, de acordo cola nostra someiansa, e che lori i governe sora i pessi del mar, sora i osei del cielo, sora i animai domèstichi, sora tuta la tera e sora tuti i animai che se rasta par tera e che se move sora la tera.” 27 E Dio el ga fato el omo ala so imàgine, lo ga fato ala imàgine de Dio: el ga fato el omo e la dona. 28 Dopo Dio li ga benedidi e el ghe ga dito: “Gàpie tanti fioi. Gavé de impienir la tera e gavé de esser paroni dela tera. Gàpie autorità sora i pessi del mar, sora i osei del cielo e sora tuto quel che vive e che se move sora la tera.” 31 Dopo Dio el ga visto tuto quel che el gavea fato, e tuto l’era tanto bon. L’è vegnesto sera e l’è vegnesto matina, sesto giorno.