Apocalisse

12 Alora l’è stà visto un grando segnal nel cielo: una dona la era vestida col sol; la luna la era soto i so pié, e nela so testa ghen’era una corona de 12 stele. 2 Ela la era drio spetar un fiol e piandea par causa dei so dolori parché l’era belche ora de guadagnar el fiol. 3 L’è stà visto nantro segnal nel cielo: un grando dragon color de fogo, con sete teste e diese corni, e nele so teste sete corone; 4 la so coa la ga strassinà un terso dele stele del cielo e le ga butà do par la tera. El dragon l’è restà fermo davanti dela dona che presto la ndaria guadagnar el so fiol, par magnar el so fiol quando lu el nassesse. 5 E la ga bio un fiol omo, un bambino, che governarà tute le nassion col setro de fero. E el so fiol l’è stà ciapà de colpo e portà a Dio e al so trono. 7 Una guera la ga scominsià nel cielo: Mighel e i so àngeli i ga fato guera contra el dragon, e el dragon e i so àngeli i ga fato guera, 8 ma lori no i ga vinsesto, gnanca ghen’era pi posto par lori nel cielo. 9 Cossita, l’è stà trato do el grando dragon, la serpente original. Lu l’è ciamà Diaol e Sàtana, e lu l’è drio imbroiar tute le persone dela tera. Lu l’è stà trato do ala tera, e i so àngeli i ze stati trati do insieme a lu. 10 Mi go scoltà una voce nel cielo dir ben forte: “Adesso l’è rivà la salvassion, el poder e el Regno del nostro Dio, e la autorità del so Cristo, parché l’è stà butà do quel che acusa i nostri fradei, quel che li acusa di e note davanti a Dio! 11 Lori i ze stati boni vìnserlo par causa del sangue del Piegoreto e par causa del messàgio che i ga proclamà, e no i ga mia fato conta dela so pròpia vita, gnanca quando i ghe ga tocà infrontar la morte. 12 Par quela resté contenti, ò cielo, e valtri che sì de star lì! Guai dela tera e del mar parché el Diaol l’è vegnesto do con granda ràbia parché el sa che el ga sol una scianta de tempo.”