Génesi

36 Questa la ze la stòria de Esaù, che anca el se ciamea Edon. 2 Esaù el se ga maridà con done che le era dela tera de Canaan: Ada, fiola de Elon, el itita; Oolibama, fiola de Anà e neta de Zibeon, el eveo; 3 e anca el se ga maridà con Basemate, fiola de Ismael e sorela de Nebaiote. 4 Esaù el ga bio un fiol con Ada che el se ciamea Elifaz, e con Basemate lu el ga bio un fiol che se ciamea Reuel, 5 e con Oolibama el ga bio Geùs, Gialon e Corà. Questi i ze i fioi de Esaù, che i ze nassesti nela tera de Canaan. 6 Dopo Esaù l’è ndato par nantra tera, che la era distante de so fradel Giacò. Lu el ga menà insieme le so done, i so fioi, le so fiole, tute le persone dela so casa, le so bèstie e tuta la richessa che col tempo el ga bio nela tera de Canaan. 7 No i podea mia pi seitar de star insieme parché lori due i gavea fato massa capital. E la tera ndove che i era de star no la bastea pi par lori, par via dele so bèstie. 8 Alora Esaù l’è ndato de star nele montagne de Seir. Esaù l’è Edon. 9 Questa la ze la stòria de Esaù, so pare de Edon, nele montagne de Seir. 10 Questi i ze i nomi dei fioi de Esaù: Elifaz, fiol de Ada, so dona de Esaù; Reuel, fiol de Basemate, so dona de Esaù. 11 I fioi de Elifaz i ze stati Teman, Omar, Zefó, Gatan e Chenàs. 12 Elifaz, so fiol de Esaù, el ga bio una concubina che la se ciamea Timna. Ela la ga bio un fiol con Elifaz che el se ciamea Amaleche. Questi i ze stati i fioi de Ada, so dona de Esaù. 13 Questi i ze i fioi de Reuel: Naate, Zerà, Samà e Mizà. Questi i ze stati i fioi de Basemate, so dona de Esaù. 14 Questi i ze i fioi che i ze nassesti a Oolibama, so dona de Esaù, fiola de Anà e neta de Zibeon: Geùs, Gialon e Corà. 15 Questi i ze i paroni de tribo intrà i dissendenti de Esaù. I fioi de Elifaz, el primo fiol de Esaù: paron de tribo Teman, paron de tribo Omar, paron de tribo Zefó, paron de tribo Chenàs, 16 paron de tribo Corà, paron de tribo Gatan e paron de tribo Amaleche. Questi i ze i paroni de tribo dissendenti de Elifaz, nela tera de Edon. Questi i ze i fioi de Ada. 17 Questi i ze i fioi de Reul, so fiol de Esaù: paron de tribo Naate, paron de tribo Zerà, paron de tribo Samà e paron de tribo Mizà. Questi i ze i paroni dele tribo dissendenti de Reuel, nela tera de Edon. Questi i ze i fioi de Basemate, so dona de Esaù. 18 E questi i ze i fioi de Oolibama, so dona de Esaù: paron de tribo Geùs, paron de tribo Gialon e paron de tribo Corà. Questi i ze i paroni de tribo dissendenti de Oolibama, fiola de Anà, so dona de Esaù. 19 Questi i ze i fioi de Esaù, e questi i ze i paroni de tribo. Lu l’è Edon.