Génesi

21 Isache el fea sùpliche a Geovà par la so sposa, parché ela no la podea gaver fioi. Alora Geovà lo ga scoltà, e so sposa Rebeca la ze restada gràvida. 27 Quando i tosi i ze vegnesti grandi, Esaù l’è deventà un bon de un cassador, che ghe piasea star fora nei campi, ma Giacò l’era un omo calmo che l’era de star in tende. 28 Isache el amea de pi Esaù parché el ghe portea carne par magnar, ma Rebeca la amea de pi Giacò. 29 Un giorno Giacò l’era drio pareciar una minestra quando Esaù l’è rivà del campo pròpio straco. 30 Alora Esaù el ghe ga dito a Giacò: “Presto, par piaser, dame un poco dela to minestra rossa parché mi son pròpio straco!” L’è par quela che lu el ga ricevesto el nome de Edon. 31 Alora Giacò el ghe ga dito: “Prima vendame el to dirito de primo fiol!” 32 e Esaù el ga rispondesto: “Son quasi drio morir! Par cossa che me serve el dirito de primo fiol?” 33 E Giacò el ga dito: “Prima te ghè de giurarme!” Alora Esaù el ga giurà e el ga vendesto a Giacò el so dirito de primo fiol. 34 Alora Giacò el ga dato a Esaù pan e minestra de lente, e lu el ga magnà, el ga bevesto, el se ga alsà e l’è ndato via. Cossita Esaù el ga fato de poco del so dirito de primo fiol.