Romani

2 Parché la lege del spìrito che dà la vita in union con Cristo Gesù la te ga libertà dela lege del pecato e dela morte. 6 Pensar nele robe dela carne vol dir morte, ma pensar nele robe del spìrito vol dir vita e pace. 15 Parché valtri no gavé mia ricevesto un spìrito par esser schiavi, che el ve fesse gaver paura nantra volta, ma gavé ricevesto un spìrito de adossion come fioi. E l’è questo spìrito che el ne fà dir: “Aba, Pupà!” 16 El spìrito de Dio el ne assa sicuri che semo fioi de Dio. 19 La creassion la ze drio spetar premosa quando che sarà mostrà chi che i ze i fioi de Dio. 20 La creassion la ze stata fata schiava del pecato e dela morte, nò parché ela la volea, ma parché Dio el volea e el ga assà una speransa. 21 Lu el liberarà la creassion del pecato e dela morte e ela la gavarà la gloriosa liberassion dei fioi de Dio. 22 Parché savemo che tuta la creassion la seita piander e sentir dolor insieme fin adesso. 24 Parché semo stati salvi in questa speransa. Ma quando vedemo quel che spetemo, no l’è mia speransa, parché come una persona la pol spetar par una cosa che la vede? 25 Ma se spetemo par quel che no vedemo, seitemo a spetar premosi e con perseveransa. 26 Dela medèsima maniera, el spìrito anca el ne giuta quando che semo fiachi; parché dele volte no savemo par cossa pregar a Dio, ma el spìrito el parla par noantri quando no savemo cossa dir. 27 E Dio, che el esamina el nostro cuor, el sa la intension del spìrito parché el parla de acordo cola volontà de Dio par giutar i santi. 31 Alora, cossa che podemo dir sora questo? Se Dio l’è dela nostra banda, chi che podaria vegnerne contra? 32 Lu el ga fin dato el so caro Fiol par morir par tuti noantri. Sarà che no’l ne darà anca tute le altre robe de volentiera? 35 Chi che va spartirne del amor del Cristo? Sarà che la tribolassion, o la aflission, o la perseghission, o la fame, o la nudessa, o el perìcolo, o la spada? 36 Cossita come l’è scrito: “Par la to causa, semo in perìcolo de morte tuto el tempo. Semo consideradi come piégore destinade a esser copade.” 37 Ma, gràssie a quel che ne ga amà, semo boni de vinser a tute queste cose. 38 Parché mi son sicuro de che gnanca la morte, gnanca la vita, gnanca àngeli, gnanca governi, gnanca cose adesso, gnanca cose par vegner, gnanca poderi, 39 gnanca altessa, gnanca profondità, gnanca qualche altre creassion podarà spartirne del amor de Dio che l’è in Cristo Gesù, nostro Signor.