Génesi

3 E Israel el ghe volea pi ben a Giusepe che a tuti i so altri fioi, parché l’era el fiol che el ga bio quando deromai l’era vècio. El ga mandà che i ghe fesse a Giusepe una bela roba longa de meter su. 4 Quando i so fradei i ga visto che el so pare el ghe volea pi ben a lu de che a tuti i so altri fradei, i ga scominsià a gaver òdio de lu. Lori no i era pi boni de parlarghe cole bone. 5 Pi tardi, Giusepe el ga bio un sogno e el ghe ga contà ai so fradei. Par quela i lo ga odià ancora de pi. 6 Lu el ghe ga dito: “Par piaser, scolté el sogno che go bio. 7 Èrino drio ligar le mede in meso el campo quando la me meda la se ga levà su e la ze restada in pié, e le vostre mede le ze restade intorno e le se ga sbassade davanti dela me meda.” 8 I so fradei i ghe ga dito: “Vuto dir che te vè deventar rè sora noantri par comandarne?” Cossita, i lo ga odià ancora de pi par causa dei so sogni e de quel che el ghe ga dito. 9 Dopo de questo, Giusepe el ga bio nantro sogno e el ghe ga contà ai so fradei: “Go bio nantro sogno. Questa volta el sol, la luna e 11 stele i se sbassea davanti de mi.” 10 Alora el ghe ga contà el sogno al so pare e anca ai so fradei. E el so pare el ghe ga dito su: “Cossa vol dir questo sogno che te ghè bio? Vuto dir che mi, anca to mama e i to fradei gavaremo pròpio de vegner e sbassarse fin tera davanti de ti?” 11 E i so fradei i ze restadi gelosi de lu, ma so pare el se ga tegnesto in mente quel che el gavea dito. 23 Alora, quando Giusepe l’è rivà, i so fradei i ga tirà via la bela roba longa che el gavea su, 24 e i so fradei i lo ga ciapà e lo ga trato rento el posso. In quela època, el posso l’era vodo e no ghen’era mia àqua rento. 28 E, quando comersianti de Midian i era drio passar lì, i fradei de Giusepe i lo ga tirà fora del posso e i lo ga vendesto ai ismaeliti par 20 tochi de argento. Questi òmini i ga menà Giusepe al Egito. 29 Pi tardi, quando Ruben l’è tornà al posso e el ga visto che Giusepe no l’era mia pi là rento, el ga sbregà le so robe. 30 Quando l’è tornà ai so fradei, el ga dito: “El toso no l’è pi là! E mi, cossa fao adesso?” 31 Alora i ga ciapà la bela roba longa de Giusepe, i ga copà un beco e i ga trato la roba rento del sangue. 32 Dopo i ghe ga mandà al so pare quela bela roba longa e i ghe ga dito: “Ghemo catà questo. Varda se no la ze pròpio la roba del to fiol.”