Génesi

22 Dopo de questo, el vero Dio el ga metesto a prova Abraon e el ghe ga dito: “Abraon!” e Abraon el ga rispondesto: “Son qua!” 2 Alora lu el ga dito: “Par piaser, ciapa el to fiol, el to ùnico fiol, che te ami tanto, Isache, e va ala tera de Morià e te ghè de darlo come oferta brusada nte un dei monti che mi te mostrarò.” 3 Cossita Abraon el se ga levà su de matina bonora, el ga parecià el so mul e el ga ciapà due dei so servi e el so fiol Isache par ndar insieme. E lu el ga taià la legna par la oferta brusada, e dopo l’è partio par el posto che el vero Dio el ghe gavea mostrà. 4 Nel terso giorno Abraon el ga vardà su e el ga visto el posto de distante. 5 E Abraon el ga dito ai so servi: “Valtri resté qua col mul intanto che mi e el toso ndemo là par adorar a Dio e dopo tornemo qua.” 6 Alora el ga ciapà la legna par la oferta brusada e la ga metesta nela spala del so fiol Isache. Dopo el ga ciapà el fogo e el cortel e i due i ga seità ndar insieme. 7 Alora Isache el ga dito al so pare Abraon: “Pare!” E lu el ga rispondesto: “Si, me fiol!” E lu el ga dito: “Ghemo el fogo e la legna, ma ndove che la ze la piégora par la oferta brusada?” 8 Par quela Abraon el ga dito: “Me fiol, Dio, lu pròpio, el ne darà la piégora par la oferta brusada.” Alora tuti i due i ga seità ndar insieme. 9 Quando lori i ze rivadi nel posto che el vero Dio el ghe gavea mostrà, Abraon el ga fato su un altar e el ga parecià la legna lì. Lu el ga ligà i pié e le man del so fiol Isache e lo ga metesto nel altar sora la legna. 10 Alora Abraon el ga stirà la man, el ga ciapà el cortel par copar el so fiol. 11 Ma del cielo el àngelo de Geovà lo ga ciamà e el ghe ga dito: “Abraon, Abraon!” e lu el ga rispondesto: “Son qua!” 12 Alora el àngelo el ghe ga dito: “No stà far mal al toso, no stà farghe gnente, parché adesso mi sò che ti te ghè temor de Dio, parché ti no te ghè ricusà de darme el to fiol, el to ùnico fiol.” 15 E del cielo el àngelo de Geovà el ga ciamà Abraon par la seconda volta, 16 e el ga dito: “‘Mi giuro par mi stesso’, el dise Geovà, ‘che come che te ghè fato questo e no te ghè ricusà de darme el to fiol, el to ùnico fiol, 17 sicuro che mi te benedirò e sicuro che mi farò che la to dissendensa la sìpia tanto granda come le stele del cielo e come i grani de areia del mar, e la to dissendensa la gavarà le cità dei so nemighi. 18 E, par meso dela to dissendensa, tute le nassion dela tera le riceverà una benedission, parché te ghè scoltà la me voce.’”